Post News Media ព័ត៌មានសិល្បៈ និងកម្សាន្ត ខ្ញុង ឆេះសក់ម...

ខ្ញុង ឆេះសក់មែនទែនក្នុងរឿង«ស៊ុបភើរម៉ាំ»

ចែកចាយបន្ត

ក្នុងរឿង«ស៊ុបភើរម៉ាំ» ឬ«Super Mom » ដែលគ្រោងដាក់បញ្ចាំងនៅថ្ងៃទី៦ មេសានេះ តារាសម្ដែងផ្នែកកំប្លែងអ្នកនាងខ្ញុងបានអះអាងថាអ្នកនាងបានសម្ដែងជាតួឯកធំនៅក្នុងរឿងនេះ ដោយធ្វើជាម្ដាយចិត្តខ្លាំង និងឌឺដងលេខមួយ ជាមួយនឹងតារាកំប្លែងម្នាក់ទៀតគឺអ្នកនាងកាតុដែលជាតួឯកម្ដាយម្នាក់ទៀត។ នៅក្នុងរឿងនេះ អ្នកនាងក៏ត្រូវផលិតករឲ្យសម្ដែងក្នុងប្លង់ឆេះផ្ទះ ដោយត្រូវរត់ចូលក្នុងភ្លើងទៅយកឥវ៉ាន់ ហើយឆេះសក់មែនទែនឡើងឈ្ងៀមផងដែរ។

អ្នកនាងខ្ញុងបញ្ជាក់ក្នុងពិធីសម្ពោធរឿងកាលពីថ្ងៃទី៣ មេសា ថា ជាលើកទី១ដែលលោក អ៊ិន សុភិន ផលិតករមហាហង្សបានឲ្យអ្នកនាងសម្ដែងជាតួធំក្នុងរឿង ហើយប៉ះគ្នាជាមួយអ្នកនាងកាតុ ដោយបានសម្ដែងជាតួប៉ះគ្នាជាមួយតារាសម្ដែងអ្នកនាង សុខ សោម៉ាវត្តីផង។

អ្នកនាងថាកន្លងមកធ្លាប់បានសម្ដែងជាមួយអ្នកនាងកាតុតែ លើឆាកទូរទស្សន៍ប៉ុណ្ណោះ ដោយការសម្ដែងក្នុងរឿងគឺមិនធ្លាប់នោះទេ ក្នុងពេលជាមួយនឹងសុខ សោម៉ាវត្តី ឯណោះវិញ គឺអ្នកនាងធ្លាប់សម្ដែងតែជាតួរាយរងប៉ះគ្នា ប៉ុន្តែសម្រាប់ការសម្ដែងជាតួឯកធំហើយប៉ះគ្នាបែបនោះក៏មិនធ្លាប់ដែរ។

អ្នកនាងនិយាយថានៅក្នុងរឿង«ស៊ុបភើរម៉ាំ» ឬ«Super Mom » អ្នកនាងសម្ដែងពីដើមដល់ចប់ ដោយប្លង់ភាគច្រើនគឺសម្ដែងបែបកំប្លែងជាមួយអ្នកនាងកាតុ និងអ្នកនាង សុខ សោម៉ាវត្តី ដែលអ្នកនាងចាត់ទុកថាជាប្លង់មិនពិបាកនោះទេ។ យ៉ាងណាមិញ នាងថានៅក្នុងរឿងនេះ គឺមានប្លង់មួយដែលអ្នកនាងពិបាកសម្ដែងបំផុត ដោយសារតែខាងផលិតករតម្រូវឲ្យអ្នកនាងត្រូវរត់ចូលផ្ទះដែលកំពុងឆេះ ដើម្បីរំលេចឈុតឆាកទាក់ទាញ។
អ្នកនាងសារភាពថាទម្រាំថតមួយប្លង់នោះ គឺអ្នកនាងឆេះសក់ឡើងឈ្ងៀមឡប់ ដោយសារតែរត់ចូលភ្លើង ហើយភ្លើងបានឈួលឆេះសក់មែនទែន ដែលអ្នកនាងថាសូម្បីតែក្រុមការងារ និងតារាដែលថតជាមួយក៏អស់សំណើចនឹងនាង។

អ្នកនាងនិយាយថា«មួយប្លង់ហ្នឹង(រត់ចូលភ្លើងឆេះផ្ទះ) ខ្ញុំពិបាកជាងគេ និងខ្លាចជាងគេ តែដោយសារលុយដល់សុខចិត្តរត់ចូលភ្លើងម្មង ឡើងឆេះសក់មែនទែន!»។ អ្នកនាងថានេះជាការសម្ដែងមិនធ្លាប់មាន ដែលធ្វើឲ្យអ្នកនាងឆេះសក់ ប៉ុន្តែមិនខ្លាំងក្លានោះទេ ដោយសារតែពេលរត់ចូលផ្ទះកំពុងឆេះនោះ ក៏មិនសូវមានភ្លើងចេះខ្លាំង។ អ្នកនាងរំពឹងយ៉ាងថាខ្លាំងថារឿង«ស៊ុបភើរម៉ាំ» ធ្វើឲ្យនាងអ្នកនាងលេចធ្លោ ដោយសារតែក្នុងរឿងនោះ អ្នកនាងលេងខ្លាំង ហើយក៏បញ្ចេញចរឹតឌឺដងមួយដឺក្រេ ជាមួយនឹងសុខ សោម៉ាវត្តី និងអ្នកនាងកាតុ។ អ្នកនាងបញ្ជាក់ថាការសម្ដែងមិនសុទ្ធតែស្រួលនោះទេ ប៉ុន្តែដើម្បីបំពេញតាមការចង់បានរបស់ផលិតករគឺអ្នកនាងត្រូវតែប្ដូរ។

លោកអ៊ិន សុភិន ចាងហ្វាងផលិតកម្មមហាហង្សបញ្ជាក់ថា ឈុតភ្លើងចេះដែលបណ្ដាលឲ្យអ្នកនាងខ្ញុងឆេះសក់មែនទែននោះ មិនបណ្ដាលឲ្យនាងមានគ្រោះថ្នាក់នោះទេ ដោយគ្រាន់តែរោលសក់ហើយឈ្ងៀមដោយសារភ្លើងរោលប៉ុណ្ណោះ។ លោកថារឿងនេះចំណាយអស់ច្រើនម៉ឺន ហើយលោកក៏ជឿជាក់នឹងទទួលបានការចាប់អារម្មណ៍ក្រោយការដំណើរលក់សំបុត្រនៅថ្ងៃទី៦ មេសាខាងមុខ នៅគ្រប់រោងផងដែរ៕

ចែកចាយបន្ត