Post News Media ព័ត៌មានសិល្បៈ និងកម្សាន្ត លី ច័ន្ទសីហា ...

លី ច័ន្ទសីហា រៀបការ១២០តុ តែប្រកាសថាមង្គលការតូច

ចែកចាយបន្ត

ក្នុងពេលដែលតារាសិល្ប:គ្រប់រូបខ្វែងដៃខ្វែងជើងដើរកម្សាន្តនៅតាមបណ្ដាខេត្តផ្សេងៗដើម្បីបង្អួតពីសកម្មភាពរបស់ខ្លួនក្នុងឱកាសបុណ្យចូលឆ្នាំនោះ តារាសម្ដែងកញ្ញាលី ច័ន្ទសីហា បែរជាសកម្មនឹងពិធីចាត់ចែងមង្គលការទៅវិញ។

នាងថាខ្លួននឹងរៀបការរហូតដល់១២០តុនៅថ្ងៃទី៥ ខែ៥ ឆ្នាំ២០១៧នេះ តែថាចំនួនតុដែលគ្រោងធ្វើនោះជាចំនួនតិចទេ ដោយសារតែនាង និងអនាគតស្វាមី សុទ្ធតែបានបន្ថយចំនួនភ្ញៀវរៀងខ្លួន។
លី ច័ន្ទសីហា និយាយថាបើទោះជានាងមានពិធីបណ្ដាក់គ្នារាប់ទាំងឡើងផ្ទះថ្មី និងបើកហាងថ្មីដែលសុទ្ធតែតម្រូវឲ្យភ្ញៀវរវល់នឹងការចងដៃ ក៏ក្នុងពិធីអាពាហ៍ពិពាហ៍របស់នាងនៅតែគ្រោងអញ្ជើញភ្ញៀវក្នុងបរិមាណច្រើន។

នាងថាខ្លួននិងភាគីខាងប្រុសនឹងអញ្ជើញភ្ញៀវសរុបចំនួន១២០តុ ដោយគម្រោងត្រូវធ្វើនៅកោះពេជ្រឯណោះទេ ប៉ុន្តែដោយសារតែគ្មានកន្លែងជួល ទើបនាងសម្រេចចិត្តជួលម៉ូដេន២នៅចាក់អង្រែដើម្បីរៀបចំពិធីវិញ។ នាងថាខ្លួនមានភ្ញៀវត្រូវអញ្ជើញច្រើនជាងនេះ ប៉ុន្តែដោយសារខ្លាចទទួលមិនអស់ ទើបខាងប្រុសសម្រេចអញ្ជើញភ្ញៀវតែ៥០តុ ខាងនាងតែ៥០តុ ហើយ២០តុផ្សេងទៀតសម្រាប់បម្រុងទុក។

នាងនិយាយថា«១២០តុហ្នឹង ខ្ញុំថាអត់ទាន់ធំទេ បើតាមតែខាងខ្ញុំមានភ្ញៀវជិត១០០តុអីណោះ ហើយខាងគួដណ្ដឹងខ្ញុំក៏រង្វង់១០០តុអីដែរ តែពួកយើងសម្រេចកាត់ភ្ញៀវរៀងខ្លួនៗទើបម្ខាងៗនៅសល់តែ៥០តុម្នាក់!»។ នាងថាមួយជាតិការម្ដង ត្រូវតែធ្វើឲ្យអឺកអធឹក ហើយបើកុំតែនាងទើបនាងបានអញ្ជើញភ្ញៀវឡើងផ្ទះ និងបើកហាងមុននេះ គឺនាងអាចនឹងអញ្ជើញដល់១០០តុសម្រាប់មួយគ្រួសារនាង ហើយខាងប្រុសនឹងអញ្ជើញច្រើនជាងនេះ បើជួលបានទីតាំងនៅកោះពេជ្រ។

លី ច័ន្ទសីហា ប្រកាសថាអនាគតឪពុកក្មេករបស់នាងមានងារជាឯកឧត្តម ប៉ុន្តែនាងមិនពឹងអាស្រ័យលើមុខតំណែងរបស់គ្រួសារខាងប្ដីនោះទេ ទើបនាងខំប្រឹងទិញផ្ទះជារបស់ផ្ទាល់ខ្លួនសម្រាប់រស់នៅ និងបើកហាងលក់កាបូបធំដុំមួយទៀត មុនពេលរៀបការ។ នាងថាខ្លួនមិនចង់បានពាក្យរិះគន់ណាមួយថាតារាសិល្ប: ទៅរៀបការជាមួយគ្រួសារអ្នកមានដើម្បីសំឡឹងឃើញប្រាក់នោះទេ ទើបនាងជម្នះចំពោះការតំនៀលទាំងនោះ ហើយអះអាងថាត្រូវតែរឹងមានទាំងមុខរបរ និងប្រាក់ចំណូលឲ្យជាក់លាក់ជាមុន មុនពេលសំពះផ្ទឹម៕

ចែកចាយបន្ត