Post News Media ព័ត៌មានសិល្បៈ និងកម្សាន្ត លី ចាន់សីហ បញ...

លី ចាន់សីហ បញ្ចប់ភាពក្រមុំថ្ងៃនេះ

ចែកចាយបន្ត

ធ្លាប់តែឮមហាជនឲ្យរហស្សនាមថាកញ្ញាៗ ឬហៅសមញ្ញថានៅក្រមុំមិនទាន់រៀបការ ថ្ងៃទី៥ ឧសភា តារាសម្ដែងនាង លី ចាន់សីហា នឹងត្រូវបានគេប្ដូរឈ្មោះថាអ្នកនាងវិញហើយ ដែលមិនខុសពីនាងត្រូវបញ្ចប់ភាពក្រមុំទាំងស្រុង មិនអាចវិលថយក្រោយ។ នៅក្នុងថ្ងៃនេះ នាងក៏ជាកូនក្រមុំយ៉ាងមានកិត្តិយស ដែលអ្នកណាៗក៏សរសើរពីសម្រស់ និងសំណាងរបស់នាងនោះដែរ។ ក្រៅពីបានប្ដីក្មេងមានការងាររដ្ឋច្បាស់លាស់ ឪពុកក្មេងរបស់នាងក៏មានងារជាឯកឧត្តមយ៉ាងកាលីពផងដែរ នៅក្នុងក្រសួងមួយ ដោយមិនទាន់វិភាគពីទ្រព្យសម្បត្តិរបស់គ្រួសារស្វាមីនាងផង។ យ៉ាងណាមិញ លី ចាន់សីហានៅតែត្រូវគេមើលឃើញថា មិនមែនជាសិល្បការិនីដែលពឹងសំណាងស្វាមី ដោយសារតែមុនរៀបការនាងបានទិញផ្ទះផ្ទាល់ខ្លួន និងបើកហាងថែមមួយទៀត បន្ថែមពីលើសម្អាងការដែលជោគជ័យស្រាប់។ អ្នកនាងថាក្រោយរៀបការអ្នកនាងមិនចង់ឲ្យមានពាក្យថានាងទៅផ្អែកខ្នងទ្រព្យសម្បត្តិខាងប្ដីទេ ទើបនាងពន្យារពេលរៀបការមួយឆ្នាំជា២ឆ្នាំ ដើម្បីឲ្យសម្រេចគោលដៅរឿងផ្ទះ និងហាងទី២។ អ៊ីចឹងហើយទើបតារាសិល្ប:សរសើរថានាង ក្រៅពីក្លាយជានារីបានប្ដី សំបូរទ្រព្យមានឋាន:ល្អប្រសើរ ហើយថែមទាំងមានសមត្ថភាពធ្វើអាជីវកម្មយ៉ាងជោគជ័យដោយខ្លួនឯងទៅទៀត ដែលអ្នកណាក៏មើលឃើញថាមិនពិបាកយកភាពមានបានក្រោយពីបញ្ចប់ភាពក្រមុំ។

លី ចាន់សីហា និយាយថានាងរៀបការ១០០តុ ដោយមង្គលការនោះគម្រោងធ្វើនៅកោះពេជ្រ និងហាងក្នុងភ្នំពេញធំៗឯណោះទេ ប៉ុន្តែមកពីទីតាំងទាំងនោះអត់ទំនេរ ទើបសម្រេចរៀបចំទទួលភ្ញៀវល្ងាចនេះនៅហាងម៉ូឌែន២នៅចាក់អង្រែវិញ។ យ៉ាងណាមិញ អ្នកនាងថាខ្លួនក៏ចំណាយច្រើនក្នុងការតុបតែងឲ្យកាលីបផងដែរដោយសារតែនាងយល់ថាមួយជាតិការម្ដង ត្រូវតែការឲ្យធំ និងមិនអាចសន្សំសំចៃលុយបាន។ អ្នកនាងថាខ្លួនអញ្ជើញតារាសិល្ប: និងផលិតករ ច្រើនជាង៣០តុ ទើបរំពឹងមង្គលការរបស់នាងល្ងាចនេះ នឹងសប្បាយផ្ដាំចាស់៕