Post News Media ព័ត៌មានសិល្បៈ និងកម្សាន្ត រឿង«អាមោកលក់ម...

រឿង«អាមោកលក់ម៉ាំ» ដែលរំលេចលោក ប៉ែន ចំរ៉ុង សម្ពោធភ្លាម ដាក់លក់សំបុត្រភ្លែត

ចែកចាយបន្ត

ខុសពីរឿងផ្សេងៗដែលគេបើកសម្ពោធ ហើយត្រាំត្រែងដំអក់ដល់ច្រើនថ្ងៃទើបដាក់បញ្ចាំងសម្រាប់ភាពយន្តរឿង«អាមោកលក់ម៉ាំ»ដែលសម្ដែងតួឯកដោយលោកប៉ែន ចំរ៉ុង បែរជាប្រកាសបញ្ចាំងភ្លាមនៅថ្ងៃទី១៨ ឧសភានេះដោយមិនបង្អង់យូរ បើទោះជាក្នុងពិធីសម្ពោធកាលពីល្ងាចថ្ងៃទី១៧ ឧសភា ហាក់មិនសូវមានភាពគគ្រឹកគគ្រេង។ ក្រុមហ៊ុនដែលទទួលសិទ្ធិចែកចាយនៅតែមានជំនឿចិត្តថារឿងនេះនឹងទទួលបានការគាំទ្រខ្ពស់ ថ្វីដ្បិតថាលោកប៉ែន ចំរ៉ុង នៅមានចំហាយរិះគន់។

លោកស៊ីថេន ម្ចាស់ក្រុមហ៊ុនពូព្រហ្មដែលជាអ្នកទទួលសិទ្ធិចែកចាយរឿង«អាមោកលក់ម៉ាំ»បានអះអាងថាលោកប៉ែន ចំរ៉ុងមិនបានអញ្ជើញចូលរួមក្នុងពិធីសម្ពោធនោះទេប៉ុន្តែសម្រាប់តារាដែលបានរួមសម្ដែងក្នុងរឿងជាច្រើនគឺបានបង្ហាញខ្លួន ដោយតារាម្នាក់ៗទទួលបានកិត្តិយសក្នុងពិធីសម្ពោធនោះផង។ លោកថាខ្សែរឿង«អាមោកលក់ម៉ាំ»ផលិតកម្មមហាហង្សបានប្រគល់សិទ្ធិឲ្យខ្លួនធ្វើចែកចាយរឿងនេះ ដោយសារតែខាងផលិតកម្មមិនមានពេលចាត់ចែង និងចង់ទុកពេលវេលាបន្តផលិតភាពយន្តជាច្រើនផ្សេងទៀតដែលលោកមិនអាចឆ្លៀតបាន។ លោកថាខ្សែរឿង«អាមោកលក់ម៉ាំ»ដ្បិតថាបានសម្ដែងតួឯកដោយលោកប៉ែន ចំរ៉ុងតែលោកនៅតែមានជំនឿខ្ពស់ថាកន្ទ្រាក់ការទិញសំបុត្រទស្សនាបានច្រើន ដោយសារតែផ្អែកលើផ្ទៃរឿងមានភាពរស់រវើក និងទាក់ទាញ ហើយមានការអញ្ជើញទស្សនាដោយតារាល្បីឈ្មោះយ៉ាងច្រើនកុះករផ្សេងទៀតដូចជាកញ្ញាជីជី និងតារាល្បីឈ្មោះផ្សេងទៀតជាដើម។ លោកថាខ្សែរឿងមួយនេះ នឹងដំណើរបញ្ចាំងនៅថ្ងៃទី១៨ ឧសភា តទៅ ដោយការដាក់បញ្ចាំងនឹងកំណត់ដល់អស់អ្នកទិញសំបុត្រទស្សនាទើបទម្លាក់ចេញពីរោង។ លោកថារឿងនេះមានចំណុចខ្លាំងត្រង់កំប្លែង និងផ្ទៃរឿងប្រទាក់ក្រឡាគ្នា ហើយសម្រាប់គុណភាពក្នុងការផលិតក៏គ្រប់គ្រាន់ដែរទើបលោកទទួលសិទ្ធិយកមកចែកចាយ ដើម្បីឲ្យស្នេហាភាពយន្តដែលមានភាពកំប្លុកកំប្លែង និងសាច់រឿងប្រទាក់ក្រឡា បានចូលរួមគាំទ្រ។

ខាងក្រោមនេះជាទិដ្ឋភាពសម្ពោធរឿង«អាមោកលក់ម៉ាំ»កាលពីយប់ថ្ងៃទី១៧ ឧសភានៅផ្សារទំនើបអ៊ីអនម៉ល