Post News Media ព័ត៌មានសិល្បៈ និងកម្សាន្ត តារាចម្រៀងប៊ូ...

តារាចម្រៀងប៊ូ ស៊ីណា ដាក់បញ្ចាំដីវះកាត់មហារីកសុដន់

ចែកចាយបន្ត

ក្នុងឱកាសទទួលជំនួយ ពីតារាចម្រៀងលោក សន វិជ្ជបុត្រ និងសប្បុរសជនផ្សេងទៀត កាលពីល្ងាចថ្ងៃទី២៦ ឧសភា តារាចម្រៀងអ្នកនាងប៊ូ ស៊ីណា ដែលជំងឺមហារីកសដន់ធ្វើទុក្ខធ្ងន់ជាង២០ថ្ងៃមកហើយ បានអះអាងថា អ្នកនាងមិនមានថវិកាសម្រាប់ព្យាបាលខ្លួននោះឡើយ ទើបសម្រេចចិត្តដាក់បញ្ចាំប្លង់ដី ដើម្បីយកលុយទៅវះកាត់នៅពេទ្យសុរិន្ទប្រទេសថៃ។ អ្នកនាងនេះគឺជាជម្រើសចុងក្រោយសម្រាប់ជីវិត ខណ:ដែលអ្នកនាងក៍ស្ថិតក្នុងការភ័យបារម្ភថា បើដាច់ដីដែលបានបញ្ចាំនោះ តើជំងឺបានជា ឬយ៉ាងណា។

លោកសន វិជ្ជបុត្រ និងតារាចម្រៀងអេណា មកពីផលិតកម្មM បានបង្ហាញអារម្មណ៍តក់ស្លុត ចំពោះការលើកឡើងរបស់អ្នកនាង និងបានប្រកាសអំពាវនាវសុំឲ្យសប្បុរសជនគ្រប់ទិសទី ចែករំលែកជួយដល់អ្នកនាង ដើម្បីជួយសង្គ្រោះដល់អ្នកនាង។ លោកថា ខ្លួន និង អេនណាបានរៃអង្គាសថវិកាបានជាង៤ពាន់ដុល្លារយកមកប្រគល់ជូន តែថវិកាទាំងនោះមិនគ្រប់សម្រាប់ អ្នកនាង ប៊ូ ស៊ីណា យកទៅវះកាត់នៅថៃនោះទេ។ លោកថាអ្នកនាង នឹងចេញទៅកាន់ប្រទេសថៃ នៅថ្ងៃ២៧ ឧសភា ឆ្នាំ២០១៧នេះ ដោយមានតែប្រាក់ជំនួយដែលផ្ដល់ឲ្យដោយលោក សន វិជ្ជបុត្រ និង ថវិកាដែលបានពីការដាក់បញ្ចាំដីប៉ុណ្ណោះ។

អ្នកនាងប៊ូ ស៊ីណា វ័យ៣៩ឆ្នាំ និងជាអ្នកខេត្តកំពង់ចាម បានអះអាងថា អ្នកនាងបានចាប់អាជីពជាអ្នកចម្រៀងតាំងពីឆ្នាំ២០០៣មកម្ល៉េះ ប៉ុន្តែមកពីអ្នកនាងមិនសូវមានកេរ្តិ៍ឈ្មោះបោះសំឡេង ទើបអ្នកនាងមិនសល់ប្រាក់កាសណាស់ណា ក្នុងពេលជំងឺមហារីកត្រូវបានកើតឡើង។ អ្នកនាងថាកាលឆ្នាំ២០០០ អ្នកនាងបានចូលប្រលងចម្រៀងនៅប៉ុស្តីបាយ័ននៅក្រុងតាខ្មៅហើយជាប់ចំណាត់លេខ៥ទូទាំងប្រទេស។ ក្រោយមកនៅឆ្នាំ២០០៣ទើបសម្រេចចិត្តចូលច្រៀងតាមរយ:ដើរច្រៀងក្នុងកម្មវិធីមង្គលការនានានិងតាមបៀហ្គាឌិនរង្គសាលមួយចំនួនដោយមិនបានឡើងប៉ុស្តី៍ទូរទស្សន៍ច្រើនដូចគេទេ។ អ្នកនាងថាជំងឺនេះផ្ដើមធ្វើទុក្ខធ្ងន់កាលពីជាង២០ថ្ងៃមុន ហើយអ្នកនាងក៍សម្រេចដាក់បញ្ចាំប្លង់ដីនៅខេត្តកំពង់ចាម១៥០០ដុល្លារ ដោយសុខចិត្តបង់ការប្រាក់មួយខែ១៥០ដុល្លារក្នុងមួយខែ ដើម្បីយកលុយព្យាបាល។ អ្នកនាងថាថវិកាដាក់បញ្ចាំនោះ នៅសល់តែប៉ុន្មានរយដុល្លារប៉ុណ្ណោះ ទើបអ្នកនាងយកថវិកាជំនួយរបស់លោក សន វិជ្ជបុត្រ និង កញ្ញា អេនណា ថាជាការផ្ដល់ជីវិត និងក្ដីសង្ឃឹមឲ្យខ្លួន មុនចេញទៅថៃ។

លោកសន វិជ្ជបុត្រ បានទទូចឲ្យមានការជួយសង្គ្រោះដល់អ្នកចម្រៀងរូបនេះ ដោយសារតែស្ថានភាពចំណាយលើការព្យាបាលរបស់អ្នកនាង គឺមានកម្រិតខ្ពស់។

ចែកចាយបន្ត