Post News Media ព័ត៌មានសិល្បៈ និងកម្សាន្ត គឹម ថាណា រិះគ...

គឹម ថាណា រិះគន់ត្រង់ៗចំពោះអ្នកសិល្ប: ចេញមុខលើកជើងគណបក្ស

ចែកចាយបន្ត

ក្នុងបទសម្ភាសន៍មុននេះបន្តិចតារាចម្រៀងផលិតកម្ម BN លោកគឹម ថាណា បានអះអាងថាឲ្យតែកម្មវិធីបក្សគឺទោះជាចង់ជួលលោកក្នុងតម្លៃណាក៏ដោយ ក៏លោកប្រកាន់ជំហរមិនច្រៀងដាច់ខាត។ លោកថាសុខចិត្តទទួលច្រៀងមិនគិតកម្រៃនូវរាល់សកម្មភាពសប្បុរសធម៌ ឬកម្មវិធីសង្គមនានា តែបើឲ្យលោកច្រៀងឃោសនាឲ្យគណបក្សនេះឬគណបក្សនោះគឺលោកសុំបដិសេធទាំងស្រុង។ ក្នុងនោះលោកក៏សម្ដែងការហួសចិត្តផងដែរ បន្ទាប់ពីឃើញតារាសិល្ប:ច្រើនឡើង ដោយរួមមានទាំងតារាល្បីៗដែលមានប្រជាប្រិយខ្ពស់ផង ធ្វើសកម្មភាពក្នុងបក្សនេះបក្សនោះយ៉ាងពេញទំហឹង ដោយលោកបានអះអាងថា មានការជេរប្រមាថដល់អ្នកសិល្ប:ទាំងនោះយ៉ាងខ្លាំង ដែលលោកបញ្ជាក់ថា ឮហើយឈឺជំនួស។

លោកគីម ថាណា និយាយថាក្នុងនាមតារាសិល្ប:គឺពិតជាមានសេរីភាពគ្រប់គ្រាន់ក្នុងការគាំទ្រគណបក្សណាមួយដែលខ្លួនស្រលាញ់ ប៉ុន្តែមិនគួរលេចធ្លោពេកទេជាពិសេសនៅតាមរយ:ហ្វេសប៊ុក ដើម្បីកុំអ្នកមិនសប្បាយចិត្តខ្លះមាក់ងាយ។ លោកថាតារាសិល្ប:ទទួលបានភាពល្បីល្បាញមិនមែនដោយសារគណបក្សណាមួយលើកស្ទួយនោះទេ គឺសុទ្ធតែកើតមានឡើងដោយសារមហាជនគាំទ្រឲ្យបានល្បីល្បាញទាំងអស់ទើបបក្សសំឡឹងឃើញ អ៊ីចឹងបើបានល្បីហើយ បែរជាយកប្រជាប្រិយភាពរបស់ខ្លួនទៅចេញមុខគាំទ្របក្សណាមួយលេចធ្លោខ្លាំងពេក គឺមិនខុសពីធ្វើឲ្យតម្លៃជាបុគ្គលមហាជនរបស់ខ្លួនរងការរិះគន់នោះឡើយ។ លោកថាគ្មានអ្វីដែលមានតម្លៃ និងមានកិត្តិយសជាជាងនៅឈរចំណុចកណ្ដាលនោះឡើយ ហើយបើទៅធ្វើសកម្មភាពគាំទ្រទៅហើយក៍មិនគួរផុស ឬផ្សាយនោះដែរ ដើម្បីកុំមានការដឹងឮទូលំទូលាយ ហើយមានការជេរប្រមាថណាមួយ ធ្វើឲ្យតម្លៃអ្នកសិល្ប:ប៉ះពាល់។ លោកថាមិនដឹងថាតារាដែលប្រឹងចេញមុខលើកជើងគណបក្សនេះលើកជើងគណបក្សនោះយ៉ាងផ្កាប់មុខ ទទួលបានលាភសក្ការ:អ្វីខ្លះជាថ្នូរនោះទេ ប៉ុន្តែលោកនៅតែយល់ថាអ្វីដែលពួកគេទទួលបានគឺការិះគន់ និងធ្វើឲ្យអ្នកសិល្ប:នោះខូចឈ្មោះ។ លោកប្រកាសមិនច្រៀងបម្រើបក្សណាមួយដាច់ខាត ដោយលោកនិយាយថាបើលោកហ៊ានចេញមុខឃោសនាគាំទ្រគណបក្សដូចតារាមួយចំនួន ដែលគេចេញមុខ គឺលោកសុខចិត្តមិនបន្តទទួលសម្ដែង ឬទទួលច្រៀងនាំឲ្យស្អុយឈ្មោះរបស់ខ្លួនតែម្ដង។ លោកថាតារាសិល្ប:ដែលបានចេញមុខគាំទ្របក្ស រមែងខឹងសម្បារនឹងការជេរប្រមាថរបស់មហាជនមួយចំនួនដែលមិនពេញចិត្ត ប៉ុន្តែ បញ្ហាកើតឡើងលោកនៅតែយល់ឃើញថាកើតចេញដោយសារតែតារាសិល្ប:ខ្លួនផ្ទាល់ ជាអ្នកធ្វើឡើងប៉ុណ្ណោះ។ លោកថាមហាជនជាអ្នកធ្វើឲ្យតារាម្នាក់ៗមានឈ្មោះបោះសំឡេង ហើយពួកគាត់មិនខុសនោះទេប្រសិនបើពួកគាត់ប្រើសិទ្ធិរិះគន់តបវិញ។ យ៉ាងណាមិញ លោកថា នោះជាការសម្រេចរបស់តារាម្នាក់ៗ ប៉ុន្តែសម្រាប់រូបលោកគឺនៅតែយល់ថា ក្នុងនាមជាតារាសិល្ប:ជាពិសេសគឺតារាល្បីតែម្ដង មិនគួរប្រឡូកប្រឡាក់ក្នុងរឿងនេះទេ ដោយសារកិត្តិយសដែលតារាសិល្ប:ខំសាងដោយលំបាក មិនអាចត្រូវបាត់បង់ ដោយសារតែការប្រមាថ និងការលាភពណ៍ត្រឹមមួយពព្រិចភ្នែក៕