Post News Media ព័ត៌មានសិល្បៈ និងកម្សាន្ត ភាពយន្តថ្មី ន...

ភាពយន្តថ្មី និយាយពីផ្ទះខ្មោចរស់នៅមួយកន្លែង ដាក់បញ្ចាំងផ្លូវការ

ចែកចាយបន្ត

ខុសពីការគ្រោងទុកដែលនឹងមានពិធីសម្ពោធរឿងគគ្រឹកគគ្រេង ភាពយន្តរឿង«រាជិនី»របស់ផលិតកម្មបដិហារ្យមិនបានធ្វើពិធីសម្ពោធរឿងនោះទេ ពោលគឺដំណើរការដាក់បញ្ចាំងលក់សំបុត្រតែម្ដងនៅថ្ងៃទី១៥ មិថុនា នេះដោយសារតែលោកក៏មិនមានពេលគ្រប់គ្រាន់ក្នុងការរៀបចំ ហើយរោងដែលលោកចង់បានធ្វើជាទីតាំងធ្វើពិធីក៏មិនទំនេរ។

យ៉ាងណាមិញ លោកបានបញ្ចេញវីដេអូមួយស្ដីពីផ្ទះខ្មោចរស់នៅពិតប្រាកដស្ថិតក្នុងខណ្ឌដង្កោ ជាយរាជធានីភ្នំពេញ ដែលលោកបញ្ជាក់ថាជាផ្ទះដែលលោកប្រើសម្រាប់ថតរឿង«រាជិនី» និងជាចំណុចដែលលោកយល់ថានឹងជួយឲ្យភាពយន្តនេះនេះទទួលបានការចាប់អារម្មណ៍ បើទោះមិនមានពិធីសម្ពោធ។

លោក ស៊ុម ភារិន ចាងហ្វាងផលិតកម្មបដិហារ្យបានមានប្រសាសន៍ថា ផ្ទះខ្មោចដែលលោកបានជ្រើសជាទីតាំងថតនេះ គឺផ្ទះខ្មោចរស់នៅពិតប្រាកដដោយអ្នកស្រុក សូម្បីតែព្រះសង្ឃក៏មិនហ៊ានស្នាក់នៅនោះដែរដោយសារតែមានវិញ្ញាណនៅសណ្ឋិត។

លោកថាលោកបានសម្រេចចិត្តជ្រើសយកផ្ទះនេះជាទីតាំងសម្រាប់ថតរឿង«រាជិនី»គឺដើម្បីរំលេចផ្ទះរឿងឲ្យមានភាពទាក់ទាញ បើទោះជាទម្រាំថតចប់គឺទាំងក្រុមការងារ និងតួសម្ដែងសុទ្ធតែមានផលលំបាក។ លោកមិនបានបង្ហើបថាសាច់រឿងដែលលោកបានផលិតមាននិយាយពីរឿងរ៉ាវប្រវត្តិនឹងផ្ទះខ្មោចនៅនេះប៉ុន្មានភាគរយនោះទេ ប៉ុន្តែលោកមានគឺមានបញ្ចូលខ្លះៗ ទើបលោកត្រូវប្រើពេលធ្វើពិធីស្នើសុំវិញ្ញាណដែលថែរក្សាផ្ទះគ្រប់ដំណាក់កាល ទម្រាំថតរឿងប្លង់ទាំងអស់នៅក្នុងផ្ទះនោះបាន។

លោកទទូចឲ្យមានការគាំទ្រភាពយន្តរឿង«រាជិនី»ដែលបានដាក់លក់សំបុត្រគ្រប់រោងចាប់ពីថ្ងៃទី១៥ មិថុនានេះទាំងនៅភ្នំពេញ និងសៀមរាប ដើម្បីឲ្យបានដឹងថាតើមានអ្វីខ្លះនិយាយពីផ្ទះខ្មោចនោះ ក្នុងពេលដែលផ្ទះខ្មោចដែលលោកជ្រើសយកមកថត គឺសូម្បីតែអ្នកស្រុកក៏មិនចង់ហ៊ានដើរកាត់ និងសូម្បីតែព្រះសង្ឃក៏មិនហ៊ានចូលជិត។ លោកថាផ្ទះនេះមានវិញ្ញាណនារីចងករស់នៅ ហើយវិញ្ញាណរបស់នាងនៅតែបន្តអុកឡុកក្នុងផ្ទះ ទើបត្រូវបានគេទុកចោលយ៉ាងអាថ៌កំបាំង។

ចែកចាយបន្ត