Post News Media ព័ត៌មានសិល្បៈ និងកម្សាន្ត គ្រាន់តែក្រុង...

គ្រាន់តែក្រុងពាលីសោះ ផលិតកររឿង«សំបុត្រចោលទុក្ខ» លេងអស់ទាស់!

ចែកចាយបន្ត

ក្នុងចំណោមផលិតកម្មដែលក្រុងពាលីប្រកាសចេញថតរឿង គេអាចនិយាយបានថាប្រហែលមានតែរឿង«សំបុត្រចោលទុក្ខ!»របស់ផលិតកម្មគិលិសក្កិគារ៉ាប៉ុណ្ណោះ ដែលរៀបចំឡើងអស់ទាស់ ដោយបានទាំងចំណាយលុយជួលទីតាំងនៅផ្សារទំនើបអ៊ីអន ធ្វើពិធីប្រកាសចេញថតរឿង ដើម្បីលើកមុខលើកមាត់តួសម្ដែង។

ផលិតកម្មនេះបានក្រុងពាលីមានថ្វាយភ្លេងភ្លាត់ និងអុជធូបយ៉ាងកគ្រឹគគគ្រេងនៅបុរីវិមានភ្នំពេញ សុំទឹកសុំដីឲ្យគម្រោងចេញថតរឿងទទួលបានជោគជ័យ និងនៅពេលល្ងាចក៏ធ្វើពិធីដើរលើកម្រាលព្រំបង្ហាញតួសម្ដែងយ៉ាងធំមួយនៅផ្សារទំនើបអ៊ីអនទៀត។

អ្នកនាង ថានណា ម្ចាស់ផលិតកម្មគិលិសសក្ដិគារ៉ា បានអះអាងថាដោយសារតែភាពយន្តរឿង«សំបុត្រចោលទុក្ខ»គឺជារឿងភាគធំមួយដែលក្នុងរឿងនេះមានរឿងតូចៗរហូតដល់ទៅ៥រឿង ដែលតម្រូវឲ្យមានតួអង្គដោយឡែកពីគ្នាខ្លះ និងជារឿងដែលមានរហូតដល់ជាង១០០ភាគសម្រាប់ដាក់ផ្សាយលើកញ្ចក់ទូរទស្សន៍MY TV ទើបផលិតកម្មសម្រេចចិត្តធ្វើពិធីក្រុងពាលី និងបង្ហាញវត្តមានតារាជាទ្រង់ទ្រាយកម្រមានតែម្ដង។ អ្នកនាងថារឿងនេះនឹងផ្ដើមចេញថតក្រោយពីការប្រកាសតួឲ្យដឹងជាសាធារណ: ដែលបានធ្វើឡើងកាលពីថ្ងៃទី១៩ មិថុនា និងគ្រោងដាក់បញ្ចាំងនៅដើមខែមករា ក្នុងឆ្នាំ២០១៨ ខាងមុខ។ នេះជាភាពយន្តភាគខ្នាតធំដែលអ្នកនាងបញ្ជាក់ថាមានការសម្ដែងដោយតួអង្គច្រើន ហើយក៏មានដល់ជាងរយភាគមិនធ្លាប់មានសម្រាប់រឿងខ្មែរ តែជារឿងដោយឡែកៗពីគ្នា ដែលធ្វើឲ្យអ្នកទស្សនាចង់តាមដាន។

អ្នកនាងថា បានទស្សនាតែរឿងនេះមួយគឺមិនខុសបានទស្សនា៥រឿងបញ្ចូលគ្នានោះទេ ទើបអ្នកនាងសម្រេចចិត្តចំណាយទុនយ៉ាងអស់ដៃតែម្ដង ដោយសូម្បីតែការប្រកាសក្រុងពាលីត្រៀមចេញថតរឿង ក៏ធ្វើចង់ធំជាង ពិធីសម្ពោធរឿងខ្លះ។ អ្នកនាងថាដើម្បីឲ្យភាពយន្តមួយមានការចាប់អារម្មណ៍តាំងពីដំណាក់កាលក្រុងពាលីឡើងទៅ គឺក្រុមហ៊ុនត្រូវតែហ៊ានចំណាយ។ អ្នកនាងរំពឹងថាយ៉ាងខ្លាំងថារឿង«សំបុត្រចោលទុក្ខ»នឹងក្លាយជារឿងទទួលការគាំទ្រខ្លាំងនៅដើមឆ្នាំ២០១៨ ដោយសារតែក្នុងរឿងនោះក៏បានជម្រើសសុទ្ធតែតារាយុវ័យ និងល្បីឈ្មោះនៅក្នុងពិភពសិល្ប:ឲ្យបានសម្ដែងប៉ះគ្នា។

ក្នុងពិធីប្រកាសចេញថតនោះ តារាសម្ដែងដែលបានបង្ហាញខ្លួននៅលើកម្រាលព្រំក្រហម រួមមានវត្តមានលោក ញ៉ែម សុគន្ធ កញ្ញាលី ឌីណា ហៅភីយ៉ា លោកព្រហ្ម ប្រសិទ្ធី លោកហេង នរកក្កដា កញ្ញាតាក់ម៉ា កញ្ញាយីវ ម៉ូលីកា លោកប៊ឺរី កញ្ញាជេស៊ីកា កញ្ញាពេជ្រ ចរណៃ អ្នកនាងង៉ែត សុវណ្ណលីតា កញ្ញាពឹង រ៉ូហ្សា លោកថូមី និងតារាសម្ដែងយ៉ាងច្រើនកុះករជាច្រើនរូបទៀត។

សូមទស្សនាទិដ្ឋភាពប្រកាសចេញថតរឿង«សំបុត្រចោលទុក្ខ»ដែលត្រូវគេឃើញរៀបចំចង់ធំជាងពិធីសម្ពោធរឿងថ្មីនោះ ៖