Post News Media ព័ត៌មានសិល្បៈ និងកម្សាន្ត ១ឆ្នាំគត់ ដែល...

១ឆ្នាំគត់ ដែលវ៉ានីឡា ទទួលរងអយុត្តិធម៌រឿងបង្ហោះរូបអាក្រាត

ចែកចាយបន្ត

គិតត្រឹមដើមសប្ដាហ៍ទី៤ក្នុងខែមិថុនានេះ មានរយ:ពេលមួយឆ្នាំគត់ដែលតារាចម្រៀងប្រចាំផលិតកម្ម Phleng Record របស់ហង្សមាសត្រូវបានអតីតសង្សារបង្ហោះរូបអាក្រាតធ្វើឲ្យនាងរងការអាម៉ាស់ ហើយមិនឃើញមានចំណាត់ការផ្លូវច្បាប់ណាមួយធ្វើឲ្យជនបង្កនោះទទួលទោសទណ្ឌ។ ពាក្យបណ្ដឹងរបស់នាងនៅតែត្រូវគេអះអាងថារុញចុះរុញឡើយនៅក្នុងកណ្ដាប់ដៃតុលាការ និងក្រឡាបញ្ជីប៉ុណ្ណោះ ខណ:ដែលអតីតសង្សាររបស់នាង ដែលនាងបានប្ដឹងពីបទប្រើអំពើហិង្សា គំរាមកំហែង និងបង្ហោះរូបអាក្រាតនៅតែមានសេរីភាពយ៉ាងព្រងើយ។

ក្រឡេកទៅកាន់ខែមិថុនាក្នុងឆ្នាំ២០១៦ គ្មានអ្នកណាមិនដឹងនោះទេថាមានព័ត៌មានយ៉ាងរសើបជុំវិញការទម្លាយរូបថតអាក្រាតរបស់តារាចម្រៀងនាងវ៉ានីឡា ពីសំណាក់អតីតសង្សារ។ នៅលើបណ្ដាញសារព័ត៌មានទាំងកាសែត ទាំងអេឡិចត្រូនិច និងទូរទស្សន៍នៅក្នុងពេលនោះ បានលើកយកប្រធានបទមួយនេះមកធ្វើការផ្សព្វផ្សាយយ៉ាងកក្រើកមហាជន ដែលធ្វើឲ្យសាមីខ្លួនខាងស្រី និងក្រុមគ្រួសាររងការអាម៉ាស់។

នៅអំឡុងពេលនោះចលនាជ្រោមជ្រែងដល់នាងពីសំណាក់តារាសិល្ប:មួយក្រុមដែលដាក់ឈ្មោះខ្លួនឯងថា«គ្រួសារតារាកម្ពុជា»ក៏បានលេចឡើងផងដែរ ដោយស្ថាបនិក និងតារាសំខាន់ៗនៅក្នុងក្រុមនេះ បានដើរតួស្វែងរកស្នាមមេដៃរហូតជាង៤០០មេដៃ ធ្វើញត្តិយកទៅប្រគល់ជូនក្រសួងវប្បធម៌ និងវិចិត្រសិល្ប: ដើម្បីសុំឲ្យក្រសួងមួយនេះធ្វើបទអន្តរាគមន៍បន្តទៅកាន់ក្រសួងពាក់ព័ន្ធ ដើម្បីជំរុញឲ្យមានការផ្ដន្ទាទោសអ្នកបង្ហោះរូបអាក្រាតរបស់នាង ដែលនាំឲ្យតម្លៃស្ត្រីខ្មែរ និងជាការប្រមាថវប្បធម៌ទទួលខុសត្រូវចំពោះមុខច្បាប់។

មិនខុសពីការចង់បានមន្ត្រីក្រសួងវប្បធម៌ក៏បានបញ្ជូនញត្តិដែលចេញពីទឹកចិត្តរបស់តារាសិល្ប: និងផលិតកររហូតដល់ជាង៤០០នាក់ ទៅកាន់ក្រសួងមហាផ្ទៃ ហើយការពន្លឿនលើពាក្យបណ្ដឹងរបស់នាងក៏ត្រូវចាត់ការ។ យ៉ាងណាមិញក្រោមអន្តរាគមន៍ជួយជាមេធាវីដោយអង្គការអ្នកនាង ចន ច័ន្ទលក្ខិណា ផ្សំផង ស្ថានភាពនៃបណ្ដឹងនៅទើបត្រឹមតែនៅតុលាការប៉ុណ្ណោះដោយ មិនឃើញឈានដល់ចំណាត់ការចាប់ខ្លួនអតីតសង្សាររបស់នាងដែលជាកូនផ្កាយ៣ និងមិនព្រមចូលខ្លួនមកបំភ្លឺមកធ្វើការកាត់ទោសនោះទេ។

ពាក្យបណ្ដឹងនេះហាក់ត្រូវគេបំភ្លេចចោល បើទោះជាមេធាវីរបស់កញ្ញាវ៉ានីឡាបានអះអាងថាចាប់ផ្ដើមមានការដោះស្រាយ។ អ្នកគាំទ្រនៅតែមើលឃើញថាករណីរងគ្រោះរបស់តារាស្រីរូបនេះមានចំណាត់ការដោះស្រាយយឺតយ៉ាវ ក្នុងពេលដែលម្ចាស់បណ្ដឹងមានភស្ដុតាងគ្រប់គ្រាន់ទៅហើយថាជនដែលបង្ហោះរូបអាក្រាតរបស់នាង គំរាមកំហែងនាង និងប្រើអំពើហិង្សារលើនាងគឺជាអ្នកណា។

នៅថ្ងៃព្រហស្បតិ៍ទី២២ មិថុនា នេះ តារាចម្រៀងវ៉ានីឡា នឹងផ្ដល់បទសម្ភាសន៍ដោយផ្ទាល់ក្នុងកម្មវិធី«Komsan Talkshow»ដែលនឹងផ្សាយផ្ទាល់នៅវេលាម៉ោង៦កន្លះល្ងាច ដើម្បីបង្ហាញពីអារម្មណ៍ក្រោយរឿងអយុត្តិធម៌របស់នាងត្រូវអូសបន្លាយដល់១ឆ្នាំទៅហើយ តែមិនមានលទ្ធផល៕