Post News Media ព័ត៌មានសិល្បៈ និងកម្សាន្ត តារាល្បីៗបង្ហ...

តារាល្បីៗបង្ហាញខ្លួន ក្នុងទិវារប្រយុទ្ធប្រឆាំងគ្រឿងញៀនថ្នាក់ជាតិ

ចែកចាយបន្ត

កាលពីព្រឹកថ្ងៃទី២៦ ខែមិថុនា ឆ្នាំ២០១៧ នៅបរិវេណកោះពេជ្រ មានការប្រារព្ធទិវារប្រយុទ្ធប្រឆាំងគ្រឿងញៀនថ្នាក់ជាតិ ដោយមានវត្តមានមន្ត្រីជាន់ខ្ពស់ និងមហាជនយ៉ាងច្រើនពាន់នាក់ចូលរួម។ នៅក្នុងពិធីនោះ ក៏មានវត្តមានតារាល្បីៗប្រមាណជាង៣០រូប ដែលដឹកនាំដោយគ្រួសារតារាកម្ពុជាចូលរួមផងដែរ។

លោកជួង ជី ហៅ នាយកុយ បានអះអាងថា វត្តមានតារានៅក្នុងព្រឹត្តិការណ៍នេះ នឹងបង្ហាញកាន់តែច្បាស់ថាតារាសិល្ប:ក៏មានឆន្ទ:ចូលរួមក្នុងការលុបបំបាត់គ្រឿងញៀនផងដែរ ដោយមិនមែនគ្រាន់តែបង្ហាញសារជាសាធារណ:នៅលើកញ្ចក់ទូរទស្សន៍តែប៉ុណ្ណោះទេ។ លោកថាតារាដែលបានចូលរួមនៅក្នុងថ្ងៃនោះ គឺមានបំណងតែមួយគត់ គឺសូមឲ្យរួមចំណែកបំបាត់គ្រឿងញៀនឲ្យអស់ពីប្រទេសកម្ពុជា។

អ្នកនាង ខាត់ សុឃីម និយាយថា ក្នុងនាមជាគ្រួសារតារាកម្ពុជា នឹងចូលរួមគ្រប់សកម្មភាពដែលមានតម្លៃសង្គម ជាពិសេសចំពោះសកម្មភាពណា ដែលអាចពញ្ញាក់អារម្មណ៍មហាជន ឲ្យជៀសឆ្ងាយពីគ្រឿងញៀនដូចក្នុងថ្ងៃនេះ។

អ្នកនាង ព្រំ រដ្ឋា បានអះអាងថា ការចូលរួមក្នុងសកម្មភាពសង្គម ថ្វីដ្បិតតែមិនបានប្រាក់កម្រៃ និងខាតបង់ពេលវេលា ប៉ុន្តែអ្នកនាងយល់ថាក្នុងនាមជាតារាសិល្ប:ត្រូវតែមានការលះបង់ដើម្បីជាគំរូដល់សង្គម។

មិនខុសគ្នាដែរ កញ្ញា ផន ស្រីខួច តារាចម្រៀងហង្សមាស បានអះអាងថា មានតែចូលរួមក្នុងការពញ្ញាក់អារម្មណ៍ប៉ុណ្ណោះ ទើបអាចឲ្យបញ្ហាគ្រឿងញៀននិងត្រូវបានយុវវ័យគិតថាជាសត្រូវ ហើយមិនយកខ្លួនបៀត។ កញ្ញាក៏ស្នើសុំឲ្យមន្ត្រីអាជ្ញាធរ ជួយទប់ស្កាត់លើករណីនេះឲ្យអស់ទាំងស្រុងពីសង្គមកម្ពុជាផងដែរ។

សូមបញ្ជាក់ថាតារាល្បីៗរបស់គ្រួសារតារាកម្ពុជា ដែលបានបង្ហាញវត្តមានចូលរួមនាព្រឹកនោះរួមមាន លោកនាយកុយ អ្នកនាងស៊ុន ណារីម៉ូនីកា អ្នកនាងខាត់ សុឃីម អ្នកនាងម៉ៅ ស៊ីណាត អ្នកនាងស្វែង សុជាតា អ្នកនាងប៉េងប៉ោង កញ្ញាផន ស្រីខួច អ្នកនាង ព្រំ រដ្ឋា អ្នកនាង ចាន់ ផល្លារ នាយក្រិន អ្នកនាងប្រិមប្រិយ លោកម៉េង ប៊ុនលី កញ្ញា មាស សម្ផស្ស លោកខេន វណ្ណាថាត់ លោក សុខ រ៉ាស៊ី អ្នកនាង មាស សុវណ្ណរតនា កញ្ញាលីឌីណា លោកឈួន ពន្លឺ អ្នកនាងឈឹម ស្រីអូន កញ្ញាយីវ ម៉ូលីកា លោកម៉ែន អម្រុងរ័ត្ន លោកយន វុទ្ធី កញ្ញាអូនពេជ្រ និងតារាល្បីឈ្មោះជាច្រើនរូបទៀត៕