Post News Media ព័ត៌មានសិល្បៈ និងកម្សាន្ត ទោះបាត់មុខខ្ល...

ទោះបាត់មុខខ្លះ តែថ្ងៃខួបចុងបញ្ចប់ ម៉ាដូណា នៅតែកកកុញដោយតារា

ចែកចាយបន្ត

ដោយសារមានភ្លៀងរំខានមួយមេបានធ្វើឲ្យតារាល្បីៗមួយចំនួនដែលត្រូវបានអញ្ជើញ មិនមានវត្តមានក្នុងថ្ងៃខួបកំណើតរបស់លោកម៉ាដូណានោះទេ ប៉ុន្តែគេកត់សម្គាល់ថាពិធីខួបរបស់លោកនៅតែណែនតាន់តាប់ដោយវត្តមានសិល្បករចាស់ក្មេងច្រើននាក់ដដែល បើទោះមិនដល់ជាង៤០០តុតាមការរំពឹងទុក។ អ្វីដែលគេកត់សម្គាល់គឺតារាមួយចំនួនទោះជាត្រូវមមាញឹកក៏ឆ្លៀតមកចងដៃមួយភ្លែត មុនត្រឡប់ទៅវិញផងដែរ ទើបបណ្ដាលស្រីស្អាតម៉ាដូណាសប្បាយចិត្តរីកថ្លើម មិនភ័យរឿងខាតខួបកំណើតដែលខួបធំលើកចុងក្រោយរបស់ខ្លួននោះ។

ម៉ាដូណា និយាយថា ក្នុងចំណោមតារាសិល្ប: និងភ្ញៀវកិត្តិយសជាង៤០០នាក់មានអ្នកមិនមកតែចំនួនតិចនាក់ប៉ុណ្ណោះ ដោយសារតែគេជាប់ថតនៅខេត្ត ហើយមិនអាចឆ្លៀតបាន។ លោកថាសប្បាយចិត្តដែលខួបចុងបញ្ចប់សម្រាប់ជីវិតរបស់លោកនៅតែមានតារាមកចូលរួមកកកុញ ក្នុងពេលដែលពួកគេម្នាក់ៗសុទ្ធតែមមាញឹកដកខ្លួនមិនរួច។ អ៊ីចឹងហើយទើបលោកប្រកាសថាទោះជាមានកម្លាំងធ្វើជាថ្មី ឬចង់សប្បាយសម្រាប់ឱកាសខួបជាថ្មី ក៏ឈប់រៀបចំទៀតដែរ សម្រាប់ពិធីខួបកំណើតមួយ ដែលលោកប្រកាសថាឈប់មាន។ លោកថាសុខចិត្តមានពិធីផ្សេងក្រៅពីខួបកំណើត តែបើឲ្យធ្វើខួបម្ដងទៀត គឺឈប់ធ្វើហើយ។

នៅក្នុងពិធីខួបនាយប់នោះ គេឃើញវត្តមានសុទ្ធតែផលិតករ និងតារាសិល្ប:ល្បីឈ្មោះចូលរួម ដោយសូម្បីតារាជំនាន់មុខក៏មានវត្តមានខ្លះៗផងដែរ ដើម្បីអបអរវ័យ៣៦ឆ្នាំរបស់តារាសម្ដែង និងកំប្លែងម៉ាដូណា។ នៅក្នុងពិធីនោះ គឺមិនសូវឃើញម្ចាស់ខួបស្រវាស្រទិញរឿងកាត់នំដូចសព្វដងនោះទេ ដោយលោកច្រើនកាន់កែវជល់ជាមួយភ្លៀវ និងអង្គុយសើចលេងច្រើនជាង។ លោកថាកាត់នំគ្រាន់តែជាអត្តសញ្ញាណមួយប៉ុណ្ណោះ តែអ្វីដែលលោកចង់បានគឺការជួបជុំមិត្តភ័ក្ដ្រទៅវិញទេ ទើបក្នុងពិធីខួបរបស់លោកម៉ាដូណាមានសំឡេងសើចសប្បាយតាមតុជាជាងម្ចាស់ខួបសើចសប្បាយតែឯង។

ខាងក្រោមនេះជាទិដ្ឋភាពតារាៗដែលបានបង្ហាញខ្លួននៅក្នុងពិធីខួបរបស់លោកម៉ាដូណា៖