Post News Media ព័ត៌មានសិល្បៈ និងកម្សាន្ត សពតារាសម្ដែង ...

សពតារាសម្ដែង ពីនពីន សម្រេចបូជាយ៉ាងតក់ក្រហល់

ចែកចាយបន្ត

នៅវេលាម៉ោង១ រសៀល ថ្ងៃទី៣០ ខែមិថុនា សពតារាសម្ដែង ពីនពីន ដែលត្រូវរថយន្ដដឹកសាំងបុកស្លាប់ នឹងត្រូវបូជាហើយ នៅវត្តតាំងកសាងខាងត្បូង ម្ដុំពោធិ៍ចិនតុង។ អ្វីដែលគេកត់សម្គាល់ គឺបុណ្យសពរបស់នាង មិនសូវមានតារាសិល្ប:ចូលរួម និង ត្រូវគេឃើញធ្វើបុណ្យក្នុងភាពស្ងប់ស្ងាត់ ដែលហាក់ដូចជាសពរបស់នារីធម្មតា មិនមែនជាតារាសិល្ប:ដូច្នោះដែរ។ការកំណត់បូជា យ៉ាងលឿននេះត្រូវបានក្រុមគ្រួសារបញ្ជាក់ហេតុផល២ ខណ:ដែលហេតុផលសំខាន់មួយ គឺគ្រួសារមិនមានលទ្ធភាពតម្កល់ធ្វើបុណ្យ ឲ្យបានយូរថ្ងៃតែម្ដង។

តំណាងគ្រួសារសព បានអះអាងថា ការបូជាសពរបស់កញ្ញា ពីនពីន នឹងបូជានៅវេលាម៉ោង១រសៀលនេះ ដោយសារតែលោកអាចារ្យ បានជ្រើសវេលាចំម៉ោងពេលនោះ និងទី២ ដោយសារសពរបស់នាងមានសភាពហើមខ្លាំង មិនអាចតម្កល់ទុកធ្វើបុណ្យបានយូរថ្ងៃជាងនេះ។ បើទោះជាលើហ្វេសប៊ុក មានការបង្ហោះរំលែកទុក្ខដល់នាង ពីសំណាក់តារា និងអ្នកលេងហ្វេសប៊ុក ជាច្រើនក៍ដោយ តែប្រភពពីវត្តតាំងកសាងខាងត្បូង ដែលជាកន្លែងតម្កល់ និងបូជាសពរបស់នាង គឺមិនឃើញមានវត្តមានតារាបង្ហាញខ្លួននោះទេ។ ពិធីបុណ្យរបស់នាង មានតែសាច់ញាតិ និង អ្នកជិតខាងនាងមកចូលរួមប៉ុណ្ណោះ មកទល់នឹងវិនាទី ដែលសពរបស់នាងត្រូវដល់ម៉ោងបូជាទៅហើយ៕