Post News Media ព័ត៌មានសិល្បៈ និងកម្សាន្ត សុះ ម៉ាច ស្នើ...

សុះ ម៉ាច ស្នើប្រធានថ្មី កុំប្រើស្លាកសមាគមន៍ក្នុងរឿងនយោបាយ

ចែកចាយបន្ត

នៅព្រឹកថ្ងៃទី៧ ខែកក្កដានេះ សមាគមន៍សិល្បករខ្មែរនឹងធ្វើការបោះឆ្នោតជ្រើសរើសប្រធានថ្មីក្នុងអាណត្តិទី៥របស់ខ្លួន ដោយមិនមានវត្តមានលោក សុះ ម៉ាច ដែលជាប្រធានចាស់ធ្វើជាបេក្ខភាពឲ្យគេបោះឆ្នោតនោះទេ។ លោកបានប្រកាសថាលក្ខន្តិក:របស់សមាគមន៍គឺមិនដឹកនាំតារាក្នុងកិច្ចការនយោបាយនោះទេ ទើបលោកទទូចឲ្យប្រធានថ្មីដែលមិនទាន់ដឹងថាអ្នកណានឹងជាប់ឆ្នោតនៅឡើយ ត្រូវតែគោរពនូវលក្ខណ្ឌនោះ។

លោក សុះ ម៉ាច និយាយថា អ្វីដែលលោកចង់ឃើញ គឺតារាសិល្ប:ចេះរួបរួមគ្នា និងចង់ឃើញសមាគមន៍សិល្បករខ្មែរក្រោយពីអស់ពីលោកទៅ គឺមានការរីកចំរើន ហើយទទួលបានការកោតសរសើរពីសំណាក់មហាជន។ លោកថាអ្នកណាជាប់ឆ្នោតសម្រាប់អាណត្តិទី៥ មិនសំខាន់នោះទេ ប៉ុន្តែអ្វីដែលលោកចង់បានគឺប្រធានថ្មីនោះមិនប្រើស្លាកសមាគមន៍ដើម្បីផលប្រយោជន៍បក្ស ហើយធ្វើឲ្យតម្លៃរបស់តារាសិល្ប:កររងការរិះគន់។ លោកថាលក្ខន្តិក:របស់សមាគមន៍គឺតម្រូវឲ្យប្រធាន និងសមាជិកអព្យាក្រឹតនិងមិនមានការប្រកាន់បក្សពួក តែសម្រាប់រឿងបុគ្គលដែលស្រឡាញ់បក្សណាមិនមែនជារឿងមិនបាននោះទេ សំខាន់កុំឲ្យតែយកឈ្មោះសមាគមន៍ទៅប្រើប្រឡូកប្រឡាក់។ លោកថាការបោះឆ្នោតព្រឹកថ្ងៃទី៧ ខែកក្កដា នឹងបញ្ចប់អាណត្តិរបស់លោក ដោយការបោះឆ្នោតនឹងត្រូវធ្វើឡើងក្រោមវត្តមានថ្នាក់ដឹកនាំរបស់ក្រសួងព័ត៌មាននិងក្រសួងវិចិត្រសិល្ប: ហើយធ្វើនៅភោជនីយដ្ឋានស្ទឹងមាស នៅផ្លូវជាតិ៦អាព្រែកលាភ។ សម្រាប់សមាសភាពអ្នកចូលរួមឈរឈ្មោះធ្វើជាប្រធានលោកថាទើបតែបានដឹងសមាសភាព២រូបប៉ុណ្ណោះ គឺអ្នកនាង ចន ច័ន្ទលក្ខិណា និងលោក កុយ ស៊ីឌឿន ប្រធានក្លិបសិល្ប:ឌីភី ដែលជាអនុប្រធានក្នុងអាណត្តិមុន៕