ភ្នំពេញៈ ស្ថិតនៅអំទ្បុងពេលយុវ័យ គឺជាវ័យមួយដែលចង់ដឹង និងចង់ស្គាល់ នូវអ្វីដែលថ្មីៗ ជាលក្ខណបែបសប្បាយៗ ជាមួយក្រុមគ្រួសារ មិត្តភ័ក្ត ឬតែឯង។ តើយុវវ័យនៅពេលទំនេរពីការរៀនសូត្រ ចូលចិត្តធ្វើអ្វីខ្លះ?
យុវជន ហ៊ីង សេរី និស្សិតនៅសាកលវិទ្យាល័យភូមិន្ទនីតិសាស្ត្រ និង វិទ្យាសាស្ត្រសេដ្ឋកិច្ច បានបញ្ចេញយោបល់ថា ” ខ្ញុំគិតថា ក្រៅពីការក្រេបយក ចំណេះវិជ្ជាពីសាលានោះ ពេលទំនេរ យុវវ័យដូចជារូបខ្ញុំនេះ ក៏ត្រូវការស្វែង យល់បន្ថែម អំពីមជ្ឈដ្ឋានសង្គមជុំវិញខ្លួនផងដែរ ដូចជាការទៅមើលកុន ឬទៅច្រៀងខារ៉ាអូខេជាមួយមិត្តភ័ក្ដជាដើម ដែលវាមិនត្រឹមតែជាជ្រុងមួយ នៃការកម្សាន្ត ឬការសម្រាកលំហែកាយ ដើម្បីជួយបំបាត់ភាពស្មុគស្មាញ អំទ្បុងពេលរៀនប៉ុណ្ណោះទេ ប៉ុន្តែថែមទាំងជួយបង្កើនទំនាក់ទំនងមិត្តភាព និងការយល់ដឹងពីសង្គមរស់នៅបានកាន់តែច្រើន”។
យុវជនរូបនេះ បានលើកទ្បើងទៀតថា “សម្លៀកបំពាក់ទាន់សម័យ និងការប្រើប្រាស់សម្ភារទំនើបៗ គឺជាអ្វីដែលរូបខ្ញុំចូលចិត្តបំផុត ដោយសារបច្ចុប្បន្ន យុវវ័យពេញនិយម និងត្រូវការវាជាចាំបាច់។ ប៉ុន្តែមិនមានន័យថា ខ្ញុំជាមនុស្សភ្លើតភ្លើនតាមសង្គមនោះទេ គ្រាន់តែមិនចង់ឲ្យគេគិតថា ខ្លួនឯងនឹងចាស់កំរឹល ម៉្យាងវិញទៀត ខ្ញុំយល់ថា ការរស់នៅក្នុងសង្គមមួយទៅបាន ទាល់តែយើងចេះសម្របសម្រួល តាមលក្ខខណ្ឌផងដែរ”។
សម្រាប់ការចូលចិត្តរបស់មនុស្សស្រីវិញ កញ្ញា ម៉ី ស្រីសំបូរ និស្សិតផ្នែក ឱសថសាស្ត្រ នៅសកលវិទ្យាល័យវិទ្យាសាស្ត្រសុខាភិបាល បានបញ្ចេញយល់ថា ”អ្វីដែលខ្ញុំចូលចិត្តធ្វើ បន្ទាប់ពីទំនេរពីការសិក្សា ជាពិសេសនៅថ្ងៃចុងសប្តាហ៍ គឺការតុបតែងខ្លួន និងស្លៀកពាក់ឲ្យស្រស់ស្អាត ដើម្បីចេញទៅញុាំអី និងការដើរផ្សារទិញអីវ៉ាន់ជាមួយមិតភ័ក្ត ហើយពេលខ្លះ ខ្ញុំចូលចិត្តស្ដាប់តន្ត្រី និងជជែកលេងជាមួយបងប្អូន ដើម្បីកាត់បន្ថែមអារម្មណ៍តានតឹង និងបង្កើនភាពស្និតស្នាលជាមួយពួកគេ។
យុវតីរូបនេះ បានបញ្ជាក់ឲ្យដឹងបន្ថែមទៀតថា បច្ចុប្បន្ន ដោយសារការជៈឥទ្ធិពល ពីវប្បធម៌បរទេស បានហូរចូលក្នុងប្រទេសយើងផងនោះ ធ្វើឲ្យយុវវ័យ ជាពិសេសនារីៗ មិនថាតែរូបនាង និងគេទេ គឺចូលចិត្តស្ទាយសម្លៀកបំពាក់បែបកាលីបៗ និងទាន់សម័យ ហើយពេលខ្លះអាចនឹងស៊ិចស៊ីទៀតផង ដែលមើលទៅហាក់ដូចជាឆ្ងាយពីប្រពៃណីខ្លួនក៏ពិតមែន ប៉ុន្តែមិនមែនន័យថា នាងចោលការស្លៀកពាក់បុរាណនោះទេ គឺខ្ញុំស្លៀកវាទៅ តាមរដូវការនានា ដូចជា បុណ្យទាន ភ្ជំបិណ្ឌ និងចូលឆ្នាំប្រពៃណីជាតិជាដើម។
ទាំងនេះសបញ្ជាក់ឲ្យឃើញថា បើទោះបីយុវវ័យនាពេលបច្ចប្បន្ន មានការពេញនិយម និងចូលចិត្តជាខ្លាំង ក្នុងការដើរកម្សាន្ត ស្លៀកពាក់ ទាន់សម័យ ការតុបតែងខ្លួន និងការប្រើប្រាស់សម្ភារទំនើបៗ ក៏ពិតមែន ប៉ុន្តែពួកគេមិនដែរភ្លេចខ្លួន ឬបោះបង់ការសិក្សានោះទេ។ លើសពីនេះទៅទៀត ពួកគេថែមទាំងមានគោលជំហរថែរក្សាវប្បធម៌ និងប្រពៃណីជាតិផងដែរ៕
