Post News Media ព័ត៌មានសិល្បៈ និងកម្សាន្ត សែម ធារិន្ទ អ...

សែម ធារិន្ទ អ្នកនាំតួសម្ដែងតាមផលិតកម្មសុខៗ បើកក្លឹបសិល្ប:

ចែកចាយបន្ត

កាលពីថ្ងៃទី១ តុលា តារាសម្ដែងលោក សែម ធារិន្ទ ដែលត្រូវអ្នកសិល្ប: និងផលិតករភាគច្រើនស្គាល់ថាជាអ្នកនាំតួតាមក្លឹបឲ្យសម្ដែងនៅតាមផលិតកម្មនានាផង បានបើកក្លឹបសិល្ប:មួយឈ្មោះថា«វិថីនៃស្ពានតារា»ដើម្បីបើកការបង្ហាត់បង្ហាញពីជំនាញសិល្ប:ដល់តារាជំនាន់ក្រោយ។

លោកហាក់មានក្ដីរំពឹងខ្ពស់ថាក្លឹបថ្មីដែលទើបបើកសម្ពោធទទួលបានជោគជ័យ ដោយអះអាងថាឈ្មោះ និងទម្រង់ក្នុងការបង្ហាត់បង្ហាញរបស់ក្លឹបនេះ គឺបន្តពីក្លឹបចាស់របស់អ្នកគ្រូលោកដែលមានកេរ្តិ៍ឈ្មោះជាយូរមកហើយ។

លោកសែម ធារិន្ទ បញ្ជាក់ថាក្លឹបសិល្ប:«វិថីនៃស្ពានតារា!» បានបើកដំណើរការដោយអ្នកគ្រូរបស់លោក ហង្ស តារា តាំងពីអំឡុងឆ្នាំ៩០ជាងម្ល៉េះ ដោយក្លឹបសិល្ប:មួយនេះបានបណ្ដុះបណ្ដាលអ្នកសិល្ប:ឲ្យក្លាយជាអ្នកជំនាញជាច្រើននៅក្នុងពិភពសិល្ប:នាពេលកន្លងមក។ យ៉ាងណាមិញ សកម្មភាពបង្ហាត់បង្ហាញរបស់ក្លឹបត្រូវបានស្ងប់ស្ងាត់ក្រោយពីអ្នកគ្រូរបស់លោកមានវ័យជរាហើយទទួលមរណភាពលែងមានសមត្ថភាពបន្តការងារបង្ហាត់បង្រៀន។ ជាមួយនឹងឱកាសចង់រក្សាកេរ្តិ៍ឈ្មោះរបស់ក្លឹបចាស់នេះ និងសម្អាងថាលោកក៏មានបទពិសោធន៍គ្រប់គ្រប់ក្នុងការបង្ហាត់បង្ហាញផ្នែកសម្ដែង និងចម្រៀង បន្តពីអ្នកគ្រូដើមផង ទើបលោកសម្រេចចិត្តចំណាយថវិកាផ្ទាល់ខ្លួនដំណើរការក្លិបនេះជាថ្មី ដើម្បីរំលឹកស្នាដៃរបស់អ្នកគ្រូខ្លួនផង។

លោកថាក្លឹបដែលសម្រេចចិត្តដំណើរការនេះស្ថិតនៅខាងជើងនៅជាប់ផ្សារចាក់អង្រែ ដោយក្រៅពីទទួលបង្ហាញជំនាញសិល្ប:ដល់សិស្សៗដោយតម្រូវឲ្យបង់លុយជាខែ ក៏ទទួលបង្រៀនដោយមិនយកលុយសម្រាប់អ្នកខ្សត់ និងទទួលដឹកនាំពួកគេឲ្យបានចូលថតនៅតាមផលិតកម្មនានាផងដែរ។

លោកថាហេតុផលធំបំផុតដែលជម្រុញឲ្យលោកសម្រេចចិត្តបើកក្លិបសិល្ប:មួយនេះ គឺដោយសារតែមួយរយ:ចុងក្រោយមានបណ្ដាផលិតកម្មកាន់តែច្រើនមានតម្រូវការឲ្យលោករៀបចំតួឲ្យគេ ហើយខ្វះតារាសិល្ប:ដែលមានសមត្ថភាពច្រើនឡើងដើម្បីបំពេញការងារថត និងសម្ដែង។

នៅក្នុងពិធីប្រកាសដំណើរការក្លឹបនោះគេឃើញមានវត្តមានតារាសិល្ប:ចាស់ថ្មីជាច្រើនដែលភាគច្រើនសុទ្ធតែជាតារាដែលលោកធ្លាប់ជម្រុយឲ្យបានថតនៅផលិតកម្មកន្លងមក។ ក្នុងនោះក៏សំណូមពរឲ្យបណ្ដាផលិតកម្ម ជួយលើកទឹកចិត្តតារាថ្មី ដែលជួយផ្ដល់តម្លៃថតឲ្យបានសមរម្យជាងមុន និងកុំទម្លាក់ពួកគេឲ្យសម្ដែងជាតួកំប៉ិកកំប៉ុកខ្លាំងពេក ដើម្បីឲ្យអ្នកមានសមត្ថភាពមានការចាប់អារម្មណ៍ចង់បន្តអាជីពសិល្ប:សម្ដែងពីតារារៀមច្បងច្រើនឡើង៕