Post News Media ព័ត៌មានសិល្បៈ និងកម្សាន្ត ឆឹម សក្កដា ផ្...

ឆឹម សក្កដា ផ្ទុះការរិះគន់ស្ថាប័នពាក់ព័ន្ធ លើករណីតារាបរទេស!

ចែកចាយបន្ត

ក្នុងជំនួបដោយផ្ទាល់កាលពីនៅន័រតុន តារាសម្ដែងល្បីឈ្មោះលោក ឆឹម សក្កដា បានបង្ហាញប្រតិកម្មយ៉ាងខ្លាំងជាមួយនឹងវត្តមានតារាថៃ និងតារាបរទេសនៅលើកញ្ចក់ទូរទស្សន៍ជាពិសេសគឺក្នុងស្ពតពាណិជ្ជកម្ម ដោយលោកយល់ថានោះជាហេតុផលធ្វើឲ្យតារាខ្មែរបាត់បង់ឱកាសក្នុងស្ពតពាណិជ្ជកម្ម។ លោកក៏បានទទូចឲ្យក្រសួង និងស្ថាប័នពាក់ព័ន្ធធ្វើការត្រួតពិនិត្យលើករណីនេះ ដើម្បីបើកផ្លូវឲ្យតារានៅក្នុងខ្មែរមានទីផ្សារល្អឡើងវិញ។

លោកឆឹម សក្កដា និយាយថាលោកមានអារម្មណ៍សប្បាយចិត្តយ៉ាងខ្លាំងដែលខាងក្រសួងព័ត៌មាន និងក្រសួងវប្បធម៌ បានចេញវិធានការកំណត់ឲ្យបណ្ដាទូរទស្សន៍ដាក់បញ្ចាំងភាពយន្តភាគខ្មែរ ឬកម្មវិធីក្នុងស្រុកចាប់ពីម៉ោង៧រហូតដល់ម៉ោង៩យប់។ យ៉ាងណាមិញ លោកនៅតែអត់សប្បាយចិត្តដោយសារតែស្ទើរតែ៩០ភាគរយនៃបណ្ដាពាណិជ្ជកម្មដែលបានដាក់ផ្សាយនៅលើកញ្ចក់ទូរទស្សន៍ គឺសុទ្ធតែជាតារាបរទេស ដែលផ្ទុយពីមួយរយ:ពេលមុនដែលគឺមានបណ្ដាផលិតផលមួយចំនួនធំហ៊ានជួលតារាខ្មែរឲ្យថតស្ពត និងឲ្យទាំងធ្វើជាតំណាងផលិតផលផង។

លោកចាត់ទុកថាវត្តមានតារាបរទេសនៅក្នុងស្ពតផលិតផលដែលបានចរាចរនៅក្នុងប្រទេសកម្ពុជាជាការផ្កាប់ឆ្នាំងរបស់តារាខ្មែរ ខណ:ដែលតារាទាំងនោះក៏បានវាយលុកទីផ្សារធ្វើឲ្យមហាជនខ្មែរគាំទ្រកម្រិតច្រើន ដែលកាន់តែធ្វើឲ្យតម្លៃតារាខ្មែរលែងមានចំណាប់អារម្មណ៍ក្នុងការទទួលថតផ្សាយពាណិជ្ជកម្មផ្សេង។ លោកនិយាយថារវាងតារាបរទេស និងថៃខ្មែរថតស្ពត គឺតារាបរទេសពិតជាមានភាពទាក់ទាញជាងតារាខ្មែរថតស្ពតហើយ ដោយសារតែក្នុងពេលថតស្ពតគឺតារាបរទេសបរទេសរមែងត្រូវគេថតក្នុងកម្រិតស្ដង់ដាជាងពេលជួលតារាខ្មែរ ដែលសូម្បីតែតម្លៃ និងការរៀបចំក៏មានភាពឥតខ្ចោះ។ លោកនិយាយថា«តារាខ្មែរយើងមើលទៅដេកស្អាតអស់ហើយ បើគេឲ្យស្ពតពាណិជ្ជកម្មតូចធំដាក់តែតារាបរទេសអស់អ៉ីចឹង ហើយតារាខ្មែរថតស្ពតនៅប្រៀបតារាគេមិចបាន បើគេស៊ីថ្លៃក៏ខ្ពស់ ហើយស្ពតគេផលិតមួយៗក៏អស់ច្រើន មិនមែនដូចពេលគេផលិតនៅកម្ពុជាផងហ្នឹង!»។ លោកថាផលិតករបរទេស បើទោះជាជ្រើសតារាខ្មែរឲ្យចេញថតស្ពត ក៏មិនហ៊ានចំណាយនៅក្នុងស្ពតនោះស្មើនឹងជួលតារាបរទេសឲ្យថតនោះដែរ ទើបគុណភាពរបស់តារាខ្មែរ និងបរទេសក្នុងស្ពតរបស់ផលិតកម្មតែមួយគឺមើលទៅមិនដូចគ្នា។

ប៉ុន្តែបើមហាជនខ្មែរមិនបានទស្សនាស្ពតដែលសម្ដែងដោយតារាបរទេស នោះលោកយល់ថាគឺទោះជាស្ពតរបស់តារាខ្មែរមានភាពខ្វះចន្លោះប៉ុណ្ណាក៏ពិតជាទទួលយកបាននោះដែរ។

លោកជារឿងអាម៉ាស់ណាស់ដែលស្ពតភាគច្រើននៅលើកញ្ចក់ទូរទស្សន៍របស់កម្ពុជាមានសុទ្ធតែតារាបរទេស ដែលមិនខុសពីធ្វើឲ្យតារាកម្ពុជាដេកផ្ទះ និងបាត់បង់ប្រាក់ចំណូល ដែលក្រៅពីតារាខ្មែរមិនមានឱកាសថតស្ពតបានច្រើនដើម្បីបានលុយទៅហើយ គឺក្រុមការងារផលិតស្ពតក្នុងស្រុកក៏ខ្សត់ការងារដូចគ្នា។

លោកថាតារាសព្វថ្ងៃមានក្រេឌីតត្រឹមតែបានថតរឿងដោយសារតែក្រសួងមានបម្រាមមិនឲ្យបញ្ចាំងរឿងបរទេសក្នុងម៉ោងមាសប៉ុណ្ណោះ ប៉ុន្តែបើគ្មានចំណាត់ការនោះទៀត គឺតារាខ្មែរមិនខុសពីផ្កាប់ឆ្នាំងបាយនោះទេ។ លោកថាក្រសួង និងស្ថាប័នពាក់ព័ន្ធគួរតែមានចំណាត់ការលើករណីនេះមួយទៀត ដើម្បីឲ្យតារាខ្មែរកាន់តែមានតម្លៃ និងមានប្រាក់ចំណូលល្អប្រសើរជៀសផុតពីការពេបជ្រាយផ្សេង។

ពាក់ព័ន្ធនឹងករណីនេះ លោកថៃ នរ:សត្យា រដ្ឋលេខាធិកាក្រសួងវប្បធម៌ និងវិចិត្រសិល្ប: បានអះអាងថាលោកធ្លាប់មានសំណើរលើករណីនេះហើយ ប៉ុន្តែមកពីគម្រោងមួយនោះមិនទាន់ទទួលបានការគាំទ្រពីភាគីពាក់ព័ន្ធច្រើនដូចករណីបិទរឿងបរទេសក្នុងម៉ោងមាស ទើបអ្វីៗនៅតែមិនបានដំណើរ។

យ៉ាងណាមិញ លោកថា ចំពោះក្ដីបារម្ភនោះ គឺក្រសួងត្រៀមគិតគូហើយ៕