Post News Media ព័ត៌មានសិល្បៈ និងកម្សាន្ត អស់ពីម៉ាដូណា!...

អស់ពីម៉ាដូណា! ដល់វគ្គ ម៉ៅ ហាជី ត្រូវគេមើលងាយ ម្ដង

ចែកចាយបន្ត

នេះមិនមែនជាការសម្ដែងដូចគ្នានឹងវីដេអូជម្លោះរបស់លោក ម៉ាដូណា ដែលរងការរិះគន់ពេញផ្ទៃប្រទេសបើទោះជាមានការបកស្រាយថាជាវីដេអូសម្ដែងនោះទេ តែជាការពិតដោយសារតែអ្នកលេងហ្វេសប៊ុកម្នាក់បានប្រើឈ្មោះគណនីរបស់ខ្លួនថាអាចារ្យធំ ហើយបានតិះដៀលលោកម៉ៅ ហាជី មែនទែន ដោយបានប្រើពាក្យថាអាប្រឡងធ្លាក់(Cambodian Idol) និងថា «អាជីអាមន៍គោ»ជាដើម រហូតធ្វើឲ្យតារាចម្រៀងដែលទើបបញ្ចប់ជម្លោះជាមួយហង្សមាសរូបនេះក្ដៅស្លឹកត្រចៀក។

នេះជាការប្រមាថមួយថ្មីពីសំណាក់អ្នកគាំទ្រ មកលើតារាសិល្ប: ខណ:ដែលមួយរយ:នេះ តារាសិល្ប:មានរឿងអត់ឈប់ ដោយសូម្បីតែអ្នកគ្មានរឿងឲ្យមហាជនជេរ ក៏ទៅផលិតវីដេអូយល់ច្រឡំធ្វើឲ្យគេជេរឡើងចាស់ដៃ ដែលហាក់ដូចធ្វើឲ្យតម្លៃអ្នកសិល្ប:សម្បូររឿងឲ្យមហាជនមាក់ងាយផ្ទួនៗ។
យ៉ាងណាមិញគេមិនដឹងថារឿងហេតុកើតឡើងពីបញ្ហាអ្វីឲ្យច្បាស់នៅឡើយទេ ដោយគ្រាន់តែអ្នកលេងហ្វេសប៊ុកម្នាក់នោះបានអះអាងថាខ្លួនគឺជាអាចារ្យធំ ដែលធ្លាប់មានជម្លោះជាមួយជីដេវីត លើកមុនពិតប្រាកដ ហើយបានចូលមកឆ្លងឆ្លើយជាមួយលោកម៉ៅ ហាជី ដោយពាក្យសម្ដីមាក់ងាយខាងលើ។

តារាចម្រៀងលោកម៉ៅ ហាជី មិនបានបង្ហោះពីការមាក់ងាយតបតចំពោះមើលងាយលោកនោះទេ ដោយគ្រាន់តែលោកប្រតិកម្មថានោះជាគណនីក្លែងក្លាយរបស់លោកអាចារ្យធំ ដែលមានបំណងមើលងាយលោក និងធ្វើឲ្យលោកអត់ទ្រាំមិនបាននឹងពាក្យសម្ដីមើលងាយមិនចង់បាន។ លោកអះអាងថាមិនប្រកាន់ចំពោះសម្ដីមិនល្អនោះទេ តែលោកបានស្នើឲ្យមានការប្រុងប្រយ័ត្នចំពោះគណនីក្លែងក្លាយនៅលើហ្វេសប៊ុក ជាពិសេសអ្នកដែលតែងតែយកឈ្មោះតារាល្បីៗ ហើយឆាតមកឈ្លោះ ឬមានគំនិតបោកប្រាស់ណាមួយ។

លោកសរសេរថាហេតុអ្វីដែលសរសេរតិះដៀលលោកទំនេរខ្លាំងម្ល៉េះ ក្នុងពេលដែលលោកមិនជឿថាអ្នកប្រើគណនីឈ្មោះអាចារ្យធំនោះ មិនមែនជាលោកអាចារ្យធំនោះទេ បើទោះជាអ្នកមាក់ងាយលោកនោះនិយាយថាគឺជាខ្លួន។ យ៉ាងណាមិញ មានការអះអាងថានោះមិនមែនជាគណនីពិតរបស់លោកអាចារ្យធំនោះទេ ដោយសារតែគណនីរបស់លោកពិតគឺមានទម្រង់ខុសពីនេះ។ អ៉ីចឹងហើយទើបការតិះដៀលចំពោះលោកម៉ៅ ហាជី ត្រូវគេចាត់ទុកថាគ្រាន់តែជាជម្លោះរវាងលោក និងអ្នកគាំទ្រ មិនមែនជាតារានឹងតារាដូចមុនទៀត៕