Post News Media ព័ត៌មានសិល្បៈ និងកម្សាន្ត មង្គលការ សុគន...

មង្គលការ សុគន្ធ និសា ត្រូវបានបញ្ជាក់កាលបរិច្ឆេទផ្លូវការ

ចែកចាយបន្ត

បើទោះជាខាងសមីខ្លួនប្រកាសមិនទាន់ប្រាប់ថ្ងៃមង្គលការឲ្យដឹងជាសាធារណ:នៅឡើយក្ដី ក៏ថ្ងៃមង្គលការរបស់តារាចម្រៀងល្បីឈ្មោះកញ្ញា សុគន្ធ និសា ត្រូវបានបញ្ជាក់ជាផ្លូវការហើយពីខាងសណ្ឋាគារលំដាប់ផ្កាយ៥ដែលនាងបានកក់ជួលសម្រាប់ធ្វើជាកន្លែងរៀបចំពិធី។ យ៉ាងណាមិញ មង្គលការរបស់នាងមិនទាន់ត្រូវបានគេបញ្ជាក់ឲ្យដឹងពីចំនួនតុដែលគ្រោងរៀបចំទទួលភ្ញៀវនោះទេ ដោយគ្រាន់តែដឹងថានឹងចំណាយដល់ខ្ទង់សែនដុល្លារ។

សុគន្ធ និសា បានទទួលស្គាល់នាងពិតជាគ្រោងរៀបការជាមួយបុរសអណិកជនអាមេរិកឈ្មោះ សំ បា ដែលលោកក៏ជាម្ចាស់ភាគហ៊ុនធំមួយរបស់ក្រុមហ៊ុន Manulife និងជាបុរសសម្បូរទ្រព្យផង។

នាងថាមង្គលការរបស់នាងពិតជាធ្វើនៅអំឡុងខែធ្នូ ចុងឆ្នាំ២០១៧នេះ តែនាងសុំមិនទាន់បញ្ជាក់លម្អិតថាធ្វើប៉ុន្មានតុ និងធ្វើនៅចំថ្ងៃណានោះទេ ដោយសារតែនាងមិនចង់ឲ្យមានការភ្ញាក់ផ្អើលកើតឡើង។ យ៉ាងណាមិញនាងបានប្រកាសថាមង្គលការរបស់នាងនឹងមិនមានការលាក់លៀមនោះទេ ថ្វីដ្បិតតែនាងមិនចង់មានឲ្យមានការរំខានចំពោះជីវិតឯកជន។ ការមិនទម្លាយកាលបរិច្ឆេទ និងព័ត៌មានលម្អិតពីមង្គលការនេះ បានធ្វើឲ្យម្នាក់ៗកាន់តែមានការចាប់អារម្មណ៍ ជាពិសេសនៅពេលមានការបញ្ជាក់ច្បាស់ថានាងបានជ្រើសយកសណ្ឋាគារសូហ្វីតែលភ្នំពេញ ធ្វើជាកន្លែងរៀបចំពិធី។

ប្រភពពីសណ្ឋាគារសូហ្វីតែលភ្នំពេញ បានអះអាងថា សុគន្ធ និសា បានកក់ថ្ងៃទី៣១ ខែធ្នូ ចុងឆ្នាំ ធ្វើជាថ្ងៃមង្គលការ តែគេមិនទាន់ដឹងថានាងគ្រោងរៀបចំប៉ុន្មានតុនោះទេ ដោយសារតែព័ត៌មាននោះគឺមានបុគ្គលទីផ្សារ និងអ្នកគ្រប់គ្រងតែម្ដងទើបអាចដឹងច្បាស់។

ម្នាក់ៗដឹងត្រឹមថាមង្គលការរបស់នាងនឹងធ្វើយ៉ាងកក្រើកនៅថ្ងៃដំណាច់ឆ្នាំចុងក្រោយ ហើយមានអ្នកមុខអ្នកការចូលរួមកុះករ ដោយសារតែអនាគតស្វាមីរបស់នាងគឺជាអ្នកជំនួញធំដុំ ហើយគ្រោងអញ្ជើញភ្ញៀវច្រើនដែលសុទ្ធតែសឹងតែជាអ្នកមុខមាត់នៅក្នុងសង្គមកម្ពុជា។

យ៉ាងណាក៏ដោយ ការទម្លាយឲ្យដឹងថាមង្គលការរបស់ សុគន្ធ និសា កំណត់ធ្វើឡើងនៅថ្ងៃទី៣១ ខែធ្នូ ធ្វើឲ្យមានការចាប់អារម្មណ៍យ៉ាងខ្លាំង ដោយម្នាក់ៗបញ្ជាក់ថានោះជាពេលវេលាឆ្លងឆ្នាំមួយដ៏ល្អ ប៉ុន្តែការជ្រើសរើសពិធីមង្គលនៅក្នុងសណ្ឋាគារលំដាប់ផ្ដាយ៥បែបនោះ ក៏មិនអាចផ្ដល់ឱកាសឲ្យអ្នកសារព័ត៌មាន និងមហាជនបានថតផ្សាយបន្តដោយស្រួល ដែលនឹងធ្វើឲ្យពិធីរបស់នាងមិនអាចសាយភាយបានទូលំទូលាយដូចមង្គលការរបស់តារាមួយចំនួនដែលជ្រើសកោះពេជ្រ ឬជ្រើសទីសាធារណ:ផ្សេងទៀតធ្វើជាកន្លែងរៀបចំនោះផងដែរ៕

ចែកចាយបន្ត