Post News Media ព័ត៌មានសិល្បៈ និងកម្សាន្ត កុំជោរ! សុគន្...

កុំជោរ! សុគន្ធ និសា មិនឲ្យទាំងសម្ភាសន៍ បិទទាំងការថតរូប

ចែកចាយបន្ត

ក្នុងចំណោមអ្នកសារព័ត៌មានទាំងអស់ដែលបានចូលច្រាងសុំថតពិធីមង្គលការរបស់តារាចម្រៀងអ្នកនាង សុគន្ធ និសា គឺមានតែស្ថាប័នអនឡាញធំមួយតែប៉ុណ្ណោះដែលបានចូលផ្ដិតទិដ្ឋភាពក្នុងពេលទទួលភ្ញៀវ។ យ៉ាងណាមិញ អ្នកនាង និងស្វាមី បានបដិសេធមិនផ្ដល់សម្ភាសន៍ណាមួយនោះទេ ដែលនេះគឺជាអាពាហ៍ពិពាហ៍ទី២របស់តារាសិល្ប: ដែលបានបិទអ្នកសារព័ត៌មានមិនឲ្យថត និងសម្ភាសន៍ បន្ទាប់ពីតារាសម្ដែងអ្នកនាង ឌុច សុភា ដែលក្នុងពេលនេះគឺបានបាក់បែកស្នេហ៍ទៅហើយ។

មានការភ្ញាក់ផ្អើលមិនតិចនេះ ដែលក្នុងពិធីមង្គលការរបស់អ្នកនាង សុគន្ធ និសា ត្រូវបានហាមប្រាមមិនឲ្យអ្នកសារព័ត៌មានថតយករូបភាពតាំងពីក្នុងពេលសូត្រមន្តពេលល្ងាច ដោយអ្នកថតរូបត្រូវគេឃើញមានការឃាឃាំងមិនឲ្យមានការផ្ដិតរូបនោះទេ ខណ:ដែលរូបភាពពីពិធីមង្គលការរបស់អ្នកនាងភាគច្រើន គឺជារូបភាពដែលភ្ញៀវថតបង្ហោះលើហ្វេសប៊ុក និងត្រូវបានប្រមាញ់ដោយអ្នកកាសែតយ៉ាងលំបាកប៉ុណ្ណោះ ទើបមានរូបភាពមួយចំនួនពីមង្គលការ។

ម្នាក់ៗមានការស្រឡាំងកាំងយ៉ាងខ្លាំង ដែលតារាចម្រៀងរូបនេះ បានចាត់មនុស្សម្នាច្រូងច្រាងពេញពិធីទុកគ្រាន់ហាមឃាត់អ្នកកាសែត ជាពិសេសចាប់តាំងពីពិធីសំពះចងដៃ កាត់សក់ និងពិធីទទួលភ្ញៀវពេលល្ងាចគឺបិទអ្នកកាសែតយ៉ាងដាច់ណាត់ប៉ុណ្ណោះ។

មានតែអ្នកសារព័ត៌មានម្នាក់មកពីខាងវេបសាយអនឡាញធំមួយប៉ុណ្ណោះ ដែលត្រូវបានអនុញ្ញាតឲ្យចូលផ្ដិតរូបកាលពីពេលល្ងាចនៅក្នុងសណ្ឋាគារសូហ្វីតែលភ្នំពេញ ដោយសារតែមានផលិតករល្បីឈ្មោះម្នាក់ដែលស្និទ្ធជាមួយនឹងសុគន្ធ និសា ជួយសុំអ្នកនាង ដើម្បីឲ្យចូលថត។ យ៉ាងណាមិញ អ្នកនាង និងស្វាមី បានបដិសេធទាំំងស្រុង សម្រាប់ការសុំសម្ភាសន៍ ដោយអ្នកនាងបានប្រាប់អ្នកសារព័ត៌មានដែលសុំច្រូងច្រាងនៅមាត់ច្រកទទួលភ្ញៀវ និងអ្នកកាសែតម្នាក់ដែលមានសំណាងបានចូលទៅខាងក្នុង ថាមិនត្រូវការសម្ភាសន៍ណាមួយនោះទេ។ សកម្មភាពរបស់អ្នកនាង និងស្វាមី បានធ្វើឲ្យអ្នកសារព័ត៌មានខកចិត្តគ្រប់គ្នា ខណ:ដែលអ្នកកាសែតដែលបានចូលថតព្រោះតែមានអន្តរាគមពីផលិតករជាអ្នកជំនិតនោះ ក៏បានត្រឹមតែថតរូបនានានៅក្នុងពិធី តែទិន្នន័យណាមួយចេញពីមាត់របស់នាងគឺនាងមិនធ្វើការសម្ភាសន៍។

សុគន្ធ និសា បានត្រឹមតែបង្ហាញទឹកចិត្តរំភើបនៅពេលឲ្យឡើងថ្លែងអំណរគុណភ្ញៀវ ប៉ុន្តែនាងមិនបានបញ្ជាក់ដោយផ្ទាល់មាត់សម្រាប់ការសុំសម្ភាសន៍ទាល់តែសោះ ទើបធ្វើឲ្យមង្គលការរបស់នាងត្រូវគេប៉ាន់ស្មានថាទំនងជាមានអាថ៌កំបាំង ទើបនាងបដិសេធមិនឲ្យសម្ភាសន៍ខ្លាចក្រែងមានការបែកធ្លាយដំណឹងណាមួយដែលនាងមិនចង់និយាយ ឬអាចបណ្ដាលមកពីនាងមិនចង់ឲ្យមានព័ត៌មានពីមង្គលការរបស់ខ្លួនទូលំទូលាយ។

ម្នាក់ៗបានត្រឹមតែសន្និដ្ឋានថា នាងប្រហែលជាបារម្ភពីការធ្លាក់កូដបើពិធីមង្គលការមានការចែកចាយគគ្រឹកគគ្រេង តែក៏អ្នកសន្និដ្ឋានក្រុមដដែលនោះ ក៏បានលើកឡើងថាទង្វើរបស់នាងដែលបានប្រកាសឡើងក្នុងថ្ងៃមង្គលការ គឺជាកត្តាដែលរុញឲ្យនាងបាត់បង់ការគាំទ្រច្រើនជាងដំណឹងរៀបការបែកធ្លាយដោយចំហរនោះទៅទៀត ជាពិសេសក្នុងពេលដែលការទម្លាយថានាងបិទបាំងមិនឲ្យសម្ភាសន៍ពីមង្គលការ គឺជាដំណឹងអវិជ្ជមានដែលគ្រាន់តែអ្នកបានឮ ក៏សម្ដែងការហួសចិត្តគ្រប់គ្នា។

មកទល់ម៉ោងនេះ មានការរិះគន់យ៉ាងខ្លាំង បន្ទាប់ពីមានការនិយាយតគ្នាពីការបិទបាំងព័ត៌មានរបស់នាងក្នុងថ្ងៃរៀបការ ជាពិសេសនៅពេលព័ត៌មានរបស់ស្វាមីនាងតើជាកំលោះ ឬពោះម៉ាយក៏មិនទាន់មានការបញ្ជាក់។ នាងបានត្រឹមតែប្រាប់អ្នករាប់អានថាស្វាមីរបស់នាង គឺលោក ចៅ សម្បត្តិ គ្រាន់តែជាបុគ្គលិកបម្រើការនៅក្នុងក្រុមហ៊ុនធានារ៉ាប់រង Manulife ប៉ុណ្ណោះ គឺមិនមានភាគហ៊ុននៅក្នុងក្រុមហ៊ុននោះទេ៕

ចែកចាយបន្ត