Post News Media ព័ត៌មានសិល្បៈ និងកម្សាន្ត ចូលខែថ្មីភ្លែ...

ចូលខែថ្មីភ្លែត តារាចម្រៀងអេនណា ហោះចេញទៅអូស្រ្តាលី

ចែកចាយបន្ត

នៅថ្ងៃទី៦ ខែធ្នូ ក្នុង២០១៧នេះ អតីតតារាចម្រៀងកញ្ញា អេនណា ដែលត្រូវគេស្គាល់ថាជាអតីតសមាជិកលេចធ្លោរបស់ក្រុម Girl Band ក្រោមការបង្កើតរបស់លោកគួច ខេវិន នឹងហោះចេញទៅកាន់ប្រទេសអូស្រ្តាលីហើយ ដើម្បីទៅសម្ដែងជាលើកទី៣នៅក្នុងប្រទេសនេះ។ នេះជាផ្លែផ្កាមួយដែលនាងសម្រេចបាន បន្ទាប់ពីមានសភាពស្ងប់ស្ងាត់ក្នុងពិភពចម្រៀង និងខកខាតបានចេញបទថ្មីជាយូរមកហើយ ចាប់តាំងពីផលិតកម្ម M បិទទ្វារ។
តារាចម្រៀងរូបស្រស់ កញ្ញា អេនណា និយាយថាការសម្ដែងជាលើកទី៣នៅក្នុងប្រទេសអូស្រ្តាលីរបស់នាងលើកនេះ គឺមានរយ:ពេល២ខែ ដោយនាងបានទាំងចាត់ទុកថាការសម្ដែងដែលត្រូវបានស្នើឡើងនេះ គឺបរិយាកាសដ៏ល្អ ដោយសារតែត្រូវចំឱកាសបុណ្យ Christmas និងបុណ្យឆ្លងឆ្នាំសកលជាដើម ដែលបងប្អូនខ្មែរភាគច្រើនចូលចិត្តដើរលេងនោះផង។

នាងត្រូវបានធានាចេញឲ្យទៅច្រៀង ដោយប្រធានសមាគមន៍ខ្មែរធំមួយនៅក្នុងប្រទេសអូស្រ្តាលី ដោយតាមគម្រោងនាងក៏នឹងមានផែនការទទួលការច្រៀងរាំនៅតាមបណ្ដាប្រទេសផ្សេងទៀតក្រោយបញ្ចប់ការសម្ដែងក្រៅប្រទេសលើកនេះផងដែរ។ នាងថានាងចេញទៅច្រៀងលើកនេះ គឺច្រៀងបទប្រភេទរាំវង់រាំក្បាច់ និងបទពីដើមៗឲ្យបងប្អូនខ្មែរសប្បាយ ហើយដោយសារតែនាងធ្លាប់បានចេញទៅ២លើកមកហើយ ទើបនាងយល់ថាសន្ទុះគាំទ្រនឹងមិនខុសពីលើកមុននោះទេ បើទោះជានៅក្នុងស្រុកនាងមិនសូវមានបទថ្មីវាយលុកទីផ្សារ ព្រោះតែនាងក៏មមាញឹកខ្លាំង ហើយមិនទាន់គិតគូរពីរឿងផលិតបទចម្រៀងដើម្បីឲ្យមានបទថ្មី។ នាងថាការងារផ្ទាល់ខ្លួនស្ទើរតែមិនអាចឲ្យនាងទទួលការងារច្រៀងរាំនៅលើឆាកតន្ត្រី និងចេញក្រៅប្រទេសបាន ប៉ុន្តែបណ្ដាលមកពីនាងនៅតែចង់បន្តសកម្មភាពច្រៀងរាំឲ្យបងប្អូនខ្មែរបានសប្បាយ ទើបនាងសម្រេចចិត្តទទួលយកការងារចាកចេញទៅអូស្រ្តាលី។ ម្យ៉ាងមកពីនាងក៏ចង់លំហែកាយ ក្នុងឱកាសឆ្លងឆ្នាំ២០១៨នេះផង ទើបនាងសុខចិត្តបោះបង់ការងារផ្ទាល់ខ្លួន ទៅច្រៀងរាំនៅអូស្រ្តាលី។

អេនណា បានអះអាងថា សម្រាប់រឿងស្នេហា គឺមិនអត់នោះទេ បុរសក្រៅស្រុកចែចង់លែបខាយ ជាពិសេសគឺបុរសអូស្រ្តាលីតែម្ដង ដោយសារតែនាងបានចេញទៅកាន់ទីនោះចំនួន២ដងរួចហើយ ហើយការចេញទៅមួយលើកៗក៏មានរយ:ពេលច្រើនសប្ដាហ៍។ ប៉ុន្តែនាងថាមិនទាន់ចង់គិតទេ ក្នុងពេលដែលនាងមិនទាន់យល់ថាខ្លួនឯងរឹងមាំ និងចាស់ចិត្តចាស់គំនិតនៅឡើយ។ នាងថា ស្នេហាគឺនាងមិនអាចប្រកាសថាមិនយកនោះទេ ក្នុងពេលដែលនាងក៏យល់ថាខ្លួនឯងក៏ដល់វ័យត្រូវពិចារណាផងដែរ ប៉ុន្តែមុននឹងនាងទទួលយកក៏ត្រូវតែច្បាស់លាស់ ហើយរងចាំឲ្យនាងរឹងមាំជាងនេះបន្តិចផងដែរ។

នាងនិយាយថា«ដូចខ្ញុំប្រាប់អីចឹងមុននឹងខ្ញុំសម្រេចចិត្តជ្រើសរើសបុរសណាម្នាក់ទាល់តែខ្ញុំស្វែងយល់ពីបុរសនោះច្បាស់លាស់សិនគឺមិនហ៊ានសម្រេចចិត្តភ្លាមៗទេ។ ម្យ៉ាងក្នុងដំណាក់កាលនេះខ្ញុំចង់ផ្ដោតលើអាជីពសិល្ប:ច្រើនជាងគិតពីរឿងស្នេហា»។ អេនណា បញ្ជាក់ថា ចំពោះរឿងដៃគូជីវិតនាងមិនប្រកាន់ថា ទាល់តែជាបុរសនៅក្នុងឬក្រៅស្រុកទេសំខាន់ឲ្យតែនាងស្រលាញ់ពេញចិត្តនិងគិតថាជាបុរសល្អអាចផ្ដល់សុភមង្គលឲ្យនាងបាន។ នាងបន្តថាអ្វីដែលនាងសង្ឃឹមខ្លាំងនៅក្នុងពេលនេះ គឺទៅច្រៀងរាំនៅក្នុងប្រទេសអូស្រ្តាលី ហើយមានបងប្អូនកុះករទិញសំបុត្រចូលទស្សនា ដើម្បីឲ្យនាងកាន់តែមានកម្លាំងចិត្តក្រោយពីសម្ងំហ្វឹកហាត់បទចម្រៀងជំនាន់ដើមរហូតស្ទាត់ជាច្រើនរយបទ។ នាងនឹងចាកចេញទៅវេលានៅម៉ោង៦ល្ងាច ថ្ងៃទី៦ ធ្នូ ២០១៧ នេះហើយ ដោយគម្រោងនឹងមានការសម្ដែងច្រើនលើកក្នុងមួយរដ្ឋ៕

ចែកចាយបន្ត