Post News Media ព័ត៌មានសិល្បៈ និងកម្សាន្ត ហង្ស អច្ឆរិយា...

ហង្ស អច្ឆរិយា កំណត់ជំហរថ្មី ក្រោយប្រឡាក់ឈ្មោះក្នុងរឿងអាស្រូវ

ចែកចាយបន្ត

ខុសពីអំឡុងពេលមុន ដែលឲ្យតែមានការងារសិល្ប:គឺ តារាសម្ដែង លោក ហង្ស អច្ឆរិយា ដែលជាប់ងារជាតារាស៊ិចស៊ីរហូតដល់ថ្នាក់លុបមិនបានទទួលធ្វើដៃពីរដៃបី តារារូបនេះបែរជាប្រកាសជំហរថ្មីលោកនឹងទទួលតែការងារមួយផ្នែកឲ្យសកម្មប៉ុណ្ណោះ ប៉ុន្តែសម្រាប់ការដើរម៉ូដ គឺមួយឆ្នាំកំណត់ទទួលតែក្នុងកម្រិតតិចតួចប៉ុណ្ណោះ ដោយសារតែមានហេតុផលរបស់ខ្លួន។ នេះជាចម្លើយមួយថ្មីផ្ទុយពីមុនទាំងស្រុង បើធៀបនឹងពេលដែលលោកត្រូវគេស្គាល់ថាជាតារាសំបូររូបភាពអាស្រូវ ជាពិសេសពាក់ព័ន្ធនឹងរូបស្រាតដែលមានការរិះគន់ និងជាតារាដែលជាប់ឈ្មោះមិនញញើតនឹងសម្ដែងស្រឡាញ់ភេទដូចគ្នាជាមួយបរទេស ដែលសូម្បីតែតារាជំនាន់ក្រោយខ្លះក៏ប្រកាសមិនដើរតាមគន្លងរបស់លោកនោះ។

លោក ហង្ស អច្ឆរិយា និយាយថា ដោយសារតែលោកធ្លាប់ថតភាពយន្តស្រឡាញ់ភេទដូចគ្នាជាមួយផលិតករបរទេស ហើយលោកក៏ធ្លាប់ថតស្រាតដាក់ផ្សាយនៅលើទស្សនាវដ្ដីបរទេសផង ទើបលោកនៅតែបានជាប់ឈ្មោះជាតារាស៊ិចស៊ី រហូតដល់មានអ្នកខ្លះរើសអើងថាលោកជាតារាដែលប្ដូររូបកាយដើម្បីល្បីឈ្មោះហើយមិនសូវមានភាពជិតស្និទ្ធ។ យ៉ាងណាមិញ លោកថាការងារសិល្ប:របស់ខ្លួនមានការរីកចំរើនជាងមុន ដោយទទួលបានការសម្ដែងក្នុងរឿងធំៗជាហូរហែរមិនដែលដាច់ បើទោះជាក្នុងពេលនេះលោកមិនទាន់មានឱកាសបានសម្ដែងតួឯកនៅឡើយ។ លោកអះអាងថាធៀបនឹងអំឡុងដើមឆ្នាំ លោកទទួលបានជោគជ័យក្នុងការងារដើដរម៉ូដ និងសម្ដែងរឿងស្ទើរតែរកពេលទំនេរអត់បាន ជាពិសេសសម្រាប់ការដើរម៉ូដជាទម្រង់ដោះអាវ និងបញ្ចេញសាច់ដែលតារាប្រុសៗមួយចំនួនមិនហ៊ានទទួល។ លោកថាការងារសិល្ប:ប្រភេទណាក៏លោកមិនខ្លាចក្នុងការទទួលនោះដែរ ប៉ុន្តែសម្រាប់ការដើរម៉ូដលោកថានឹងទទួលដោយមានកំណត់ដោយមិនចេះតែទទួលដូចមុននោះទេ ជាពិសេសសម្រាប់ការដើរម៉ូដដែលធ្វើឲ្យលោកមិនទទួលបានឱកាសលេចធ្លោ។

តារាសម្ដែងលោក ហង្ស អច្ឆរិយា និយាយដើរម៉ូដដ្បិតថាចំណាយពេលដើរនៅក្នុងកម្មវិធីតែកន្លះម៉ោង ឬមួយម៉ោង ប៉ុន្តែធាតុពិតការងារមួយនេះស្មុគស្មាញជាងការសម្ដែងឆ្ងាយណាស់ ដោយត្រូវបង្ហាញខ្លួនហាត់សម ត្រូវទៅវាស់សំលៀកបំពាក់ និងត្រូវចំណាយពេលជុំគ្នាដើម្បីស្វែងយល់ពីកម្មវិធីច្រើនទៀត ហើយអ្វីដែលសំខាន់ការដើរម៉ូដគឺមិនបានរក្សាទុកឲ្យលោកនូវឯកសារវីដេអូដូចគ្នានឹងការសម្ដែងរឿងនោះទេ ទើបលោកយល់ថាការដើរម៉ូដគឺលុះត្រាតែជាកម្មវិធីធំដុំ ឬសំខាន់ ទើបលោកទទួល។ ប៉ុន្តែសម្រាប់ការសម្ដែងគឺលោកពេញចិត្តទទួលដៃពីរដៃបីតែម្ដង បើទោះជាការសម្ដែងនោះតម្រូវឲ្យលោកសម្ដែងត្រឹមតែមួយប្លង់ ឬជាប្លង់មិនសមរម្យណាមួយ។ លោកនៅតែឲ្យតម្លៃលើការដើរម៉ូដ ប៉ុន្តែបើឲ្យទទួលគ្រប់កម្មវិធីដូចអំឡុងពេលចូលប្រឡូកសិល្ប:ដំបូងៗ គឺលោកមិនសូវនោះទេ ដើម្បីកុំឲ្យប៉ះពាល់ការងារសម្ដែងដែលបានទាក់ទងរួចរាល់។ លោកថាការសម្ដែងលោកមានទាំងទេពកោសល្យ ហើយមានទាំងគ្រឹះក្នុងការហាត់រៀន ដោយសារតែលោកធ្លាប់បានទទួលការបណ្ដុះបណ្ដាលលើការសម្ដែង ជាពិសេសគឺការលេងទឹកមុខ ជាមួយនឹងគ្រូបង្វឹកសម្ដែងជាជនជាតិបរទេស មុនពេលលោកទទួលសម្ដែងរឿង។

អ៊ីចឹងហើយទើបលោកកែប្រែជំហរទទួលសម្ដែងដោយគ្មានកំនត់ ប៉ុន្តែសម្រាប់ការដើរម៉ូដគឺអាចម៉ត់ចត់បន្តិចក្នុងការទទួលធ្វើ ដើម្បីកុំឲ្យនឿយហត់ខ្លាំងពេក ហើយប៉ះពាល់ដល់ការសម្ដែងរឿង។ លោកថាការសម្ដែងរឿងដ្បិតថាមិនស្រួល តែក៏ល្អជាងការដើរម៉ូដនោះដែរ ដ្បិតចំណាយពេលមួយថ្ងៃដូចគ្នា តែអាចសម្ដែងបានច្រើនប្លង់ បានស្គាល់រស់ជាតិច្រើន ប៉ុន្តែសម្រាប់ការដើរម៉ូដគឺប្រឹងមួយថ្ងៃ ឬច្រើនថ្ងៃលើសគ្នា ប៉ុន្តែចុងក្រោយគឺបានសម្ញ៉ែងរូបសម្រស់តែប៉ុន្មាននាទីលើឆាកប៉ុណ្ណោះ ខណ:ដែលការសម្ញ៉ែងនោះពេលខ្លះក៏មិនសូវមានអ្នកកត់សម្គាល់។ យ៉ាងណាមិញ លោកនៅតែស្រឡាញ់ពេញចិត្តការដើរម៉ូដ អ៊ីចឹងហើយទើបលោកទទួលដើរម៉ូដដល់ទៅ៣ថ្ងៃ ក្នុងកម្មវិធីតាំងពិព័រណ៌គ្រឿងចក្រធំមួយនៅកោះពេជ្រកាលចុងខែវិច្ឆិកា និងដើមខែធ្នូ៕

ចែកចាយបន្ត