Post News Media ព័ត៌មានសិល្បៈ និងកម្សាន្ត រិះគន់ពេញបន្ទ...

រិះគន់ពេញបន្ទុក ជុំវិញមហោស្រពភាពយន្តខ្មែរ ដាក់ស្នាដៃបរទេសឲ្យប្រកួតប្រជែង

ចែកចាយបន្ត

កាលពីថ្ងៃទី៦ ខែធ្នូ មានពិធីបើកសម្ពោធព្រឹត្តិការណ៍មហោស្រពភាពយន្តយ៉ាងអធឹមអធ័ម នៅសាលមហោស្រពចតុមុខ ដោយមានផលិតករ និងតារាសម្ដែងល្បីៗជាច្រើនរូបចូលរួម។ អ្វីដែលគេបានឮការរិះគន់នៅក្នុងពិធីមមួយនេះ គឺការអនុញ្ញាតឲ្យភាពយន្តរបស់ផលិតករបរទេសចូលរួមប្រកួតប្រជែងជាមួយភាពយន្តជាស្នាដៃរបស់ផលិតករក្នុងស្រុក ដែលក្រុមផលិតករ និងតួសម្ដែងខ្មែរមួយចំនួនយល់ថាជាលក្ខណ្ឌមិនសាកសម។

នៅក្នុងព្រឹត្តិការណ៍ប្រឡងប្រជែងភាពយន្តខ្មែរដែលមានលក្ខណ:ជាការប្រកួតប្រជែងថ្នាក់ជាតិលើកទី៥ បន្ទាប់ពីខកខានអស់២ឆ្នាំនេះគេឃើញមានភាពយន្តចំនួន១៤ត្រូវបានគណកម្មការប្រឡងប្រជែងរបស់នាយកដ្ឋានភាពយន្តសម្រេចជ្រើសរើសឲ្យធ្វើការប្រកួតប្រជែង ដោយក្នុងចំណោមភាពយន្តទាំង១៤នោះ គឺមាន៣រឿងត្រូវបានគេស្គាល់ថាជាស្នាដៃរបស់បរទេសសុទ្ធសាធ ដោយគ្រាន់ជ្រើសរើសតារាខ្មែរឲ្យសម្ដែង ក្នុងនោះមានភាពយន្តរឿង«Jailbreak ការពារឧក្រិដ្ឋជន» រឿង«មុនពេលដួលរលំ» និងរឿង«តម្លៃស្នេហ៍»គឺរឿងក្រោមការផលិតរបស់ផលិតករបរទេស ដែលត្រូវបានផលិតករ និងតារាសម្ដែងខ្មែរបង្ហាញការខកចិត្ត ដោយសារតែរឿងទាំង៣ត្រូវបានគេអនុញ្ញាតឲ្យចូលរួមប្រកួតយ៉ាងស្មើភាពនៅក្នុងព្រឹត្តិការណ៍នេះ។

ភាពយន្តទាំង៣ក៏ត្រូវគេឃើញបានបន្តជាប់ជម្រើស៨រឿងក្នុងវគ្គពាក់កណ្ដាលផ្ដាច់ព្រ័ត្រដែលមានឱកាសក្លាយជាភាពយន្តកាន់ពានប្រចាំឆ្នាំផងដែរ ទើបធ្វើឲ្យកាន់តែមានការរិះគន់ដោយសារតែមហោស្រពភាពយន្តខ្មែរ ដែលក្នុងទិសដៅគឺលើកកម្ពស់ស្នាដៃក្នុងស្រុក និងលើកទឹកចិត្តផលិតករក្នុងស្រុក តែបែរជាឲ្យស្នាដៃរបស់បរទេសចូលរួមប្រកួតប្រជែង ដែលធ្វើឲ្យគេមើលឃើញភ្លាមៗថាស្នាដៃរបស់ផលិតករបរទេស នឹងមានឱកាសច្រើនជាងក្នុងការដណ្ដើមពានពីក្នុងព្រឹត្តិការណ៍ដែលរៀបចំដោយក្រសួងវប្បធម៌ និងវិចិត្រសិល្ប:លើកនេះ។

ម្នាក់ៗមានការរិះគន់ នឹងថាបើឲ្យភាពយន្តដែលសម្ដែងដោយតារាខ្មែរសុទ្ធតែអាចធ្វើការប្រកួតប្រជែងនៅក្នុងព្រឹត្តិការណ៍នេះបាន គឺគួរតែឲ្យភាពយន្តរឿង«មុនដំបូងគេសម្លាប់ឪពុកខ្ញុំ»ដែលផលិតដោយអ្នកស្រីអែនជេលីណាជូលី មុននេះ ក្លាយជាភាពយន្តកាន់ពានទើបសម ដោយសារតែនោះជាភាពយន្តខ្មែរដំបូងដែលមានលក្ខណ:អន្តរជាតិ ហើយជាភាពយន្តដែលល្បី និងលេចធ្លោប្រចាំឆ្នាំ២០១៧នេះ។

យោងតាមការបញ្ជាក់ភាពយន្តរឿង«Jailbreak ការពារឧក្រិដ្ឋជន» និងរឿង«មុនពេលដួលរលំ»គឺសូម្បីតែអ្នកកាមេរ៉ា និងអ្នកបច្ចេកទេសក៏ជាជនបរទេសនោះដែរ ដោយមិនមែនគ្រាន់តែជាការបោះទុនដោយជនបរទេស និងផលិតករតែជាជនបរទេសតែប៉ុណ្ណោះទេ។ ក្នុងនោះសូម្បីតែដើមទុនក៏មានកម្រិតខុសគ្នាដាច់ឆ្ងាយនឹងភាពយន្តដែលផលិតក្នុងស្រុកដូចគ្នា។

ពាក់ព័ន្ធនឹងការរិះគន់ឡើងខ្ទរពេញពិធីបើកសម្ពោធមហោស្រពភាពយន្តនេះ លោកអ៉ិន សុភិន មិនហ៊ានធ្វើការអត្ថាធិប្បាយនោះទេ ដោយលោកគ្រាន់តែអះអាងថាបើព្រឹត្តិការណ៍នេះផ្ដល់ឱកាសឲ្យតែភាពយន្តដែលផលិតដោយផលិតករក្នុងស្រុក នោះគឺជារឿងប្រសើរបំផុតដើម្បីឲ្យផលិតករក្នុងស្រុកស្វែងយល់ពីស្នាដៃរបស់ខ្លួន និងកាន់តែមានកម្លាំងចិត្តដើម្បីផលិតភាពយន្តឲ្យកាន់តែមានគុណភាព។

លោកអះអាងថាស្នាដៃក្នុងស្រុកបើទោះជាមានគុណភាពកម្រិតណា ក៏មិនអាចប្រកួតប្រជែងជាមួយស្នាដៃរបស់បរទេសបានដែរ ដោយសារតែក្រុមហ៊ុនទាំងនោះមានដើមទុនផលិតធំ ហើយគេមានលទ្ធភាពជួលទាំងកាមេរ៉ាល្អ និងបច្ចេកទេសជំនាញ។
ជាក់ស្ដែងលោកបានលើកឧទាហរណ៍ថា គ្រាន់តែភាពយន្តរឿង«Jailbreak ការពារឧក្រិដ្ឋជន» គឺចំណាយអស់ដល់រាប់សែនដុល្លារ ដូច្នេះវាពិតជាមានប្រៀបខ្លាំងណាស់ជាមួយភាពយន្តផ្សេងទៀតរបស់ផលិតករក្នុងស្រុក។

លោកថាភាពយន្តរបស់មហាហង្សនៅក្នុងព្រឹត្តិការណ៍ប្រកួតប្រជែងនេះ មានចំនួន២ គឺរឿង«Super Mom» និងរឿង«អ្នកនាងម្ចាស់ឡឺកឺ» ដោយលោកប្រកាសថាបើការប្រកួតប្រជែងស្ថិតតែក្នុងរង្វង់ភាពយន្តរបស់ផលិករក្នុងស្រុកគឺមានសង្ឃឹមច្រើន តែបើមានស្នាដៃរបស់បរទេសចូលរួមបែបនេះ គឺលោកប្រាប់មិនសង្ឃឹមខ្ពស់នោះទេ។ យ៉ាងណាក៏ដោយ លោកបានបង្ហាញមោទនភាពដែលក្នុងចំណោមភាពយន្តចំនួន៨ ដែលគ្រាន់តែស្នាដៃបរទេសមានដល់ទៅ៣រឿងទៅហើយ តែបែរជាមានភាពយន្តរបស់ផលិតកម្មមហាហង្ស២រឿងបានជាប់នៅក្នុងចំណោមនោះ។ លោកថាក្នុងចំណោមភាពយន្តទាំងអស់ដែលបានជ្រើសរើស នឹងមានតែភាពយន្ត៣ប៉ុណ្ណោះ ឈានដល់វគ្គផ្ដាច់ព្រ័ត្រ ខណ:ដែលការប្រកាសថាភាពយន្តល្អផ្ដាច់គេប្រចាំព្រឹត្តិការណ៍ នឹងត្រូវធ្វើឡើងនៅថ្ងៃទី១០ ធ្នូខាងមុខ។

មិខខុសពីការលើកឡើងរបស់លោកអ៉ិន សុភិន ផលិតករដែលបានចូលរួមប្រកួតប្រជែងផ្សេងទៀតក៏មានការរិះគន់ជុំវិញ ការផ្ដល់ឱកាសឲ្យស្នាដៃរបស់ផលិតករបរទេសធ្វើការប្រកួតប្រជែងនៅក្នុងព្រឹត្តិការណ៍មហោស្រពភាពយន្តនេះដែរ តែឆ្លើយតបនឹងការលើកឡើងយ៉ាងផុសផុលនេះ មន្ត្រីជាអ្នករៀបចំបានអះអាងថាដើម្បីឲ្យមានការស្មើភាពរាល់ស្នាដៃដែលត្រូវបានកំណត់ថាជាភាពយន្តខ្មែរ ដោយមិនកំណត់ថាអ្នកផលិតជាជនបរទេស។ នេះជាលើកទី១ដែលព្រឹត្តិការណ៍នេះរងការរិះគន់ចាប់តាំងពីបានដំណើរការ ខណ:ដែលការប្រកាសលទ្ធផល នឹងក្លាយជាការតាមដានយ៉ាងពេញទំហឹងចំពោះអ្នករៀបចំជាក់ជាមិនខានឡើយ៕

ចែកចាយបន្ត