Post News Media ព័ត៌មានសិល្បៈ និងកម្សាន្ត មុន និងក្រោយច...

មុន និងក្រោយចូលសាន់ដេ ជ័យ សុវ៉ាត ខុសគ្នាដល់ម្លឹង

ចែកចាយបន្ត

ការបង្ហាញខ្លួនរបស់តារាចម្រៀងសាន់ដេ លោកជ័យ សុវ៉ាត ក្នុងកម្មវិធីសប្បុរសធម៌កាលពីថ្ងៃទី១៣ មករា នៅសាកលវិទ្យាល័យភូមិន្ទភ្នំពេញ បានបង្ហាញយ៉ាងច្បាស់ថា តារាចម្រៀងរូបនេះ មានភាពខុសគ្នាចំពោះការគាំទ្រ បើធៀបនឹងពេលដែលលោកនៅជ្រកក្នុងផលិតកម្មចាស់ និងក្នុងពេលដែលត្រូវបានគាំទ្រជាបេក្ខភាពមួយ រូបក្នុងកម្មវិធី«ផ្កាយរះក្នុងសួន»។ គ្រាន់តែប្រកាសថា លោកជាតារាចម្រៀងសាន់ដេ ហើយចេញច្រៀងបទចម្រៀង២បទ ដែលជាបទបើកឆាកនៅផលិតកម្មសាន់ដេ អ្នកគាំទ្រកុះករសស្រាក់សស្រាំមកគាំទ្រ។

ផ្អែកតាមឱកាសបង្ហាញខ្លួនរបស់លោក ជ័យ សុវ៉ាត លើឆាកតន្ត្រីក្រោយចូលសាន់ដេ គឺខុសប្លែកគ្នាដាច់ឆ្ងាយតែម្ដង ដោយសារតែក្នុងពេលនេះ គឺលោកមិនទាន់ត្រូវបានផលិតកម្មផ្ដល់ឱកាសឲ្យចេញច្រៀងលើឆាកតន្ត្រីធំៗបានច្រើននៅឡើយផង ប៉ុន្តែអ្នកគាំទ្ររបស់លោក នៅពេលលោកឡើងឆាក គឺច្រើនគគ្រឹកគគ្រេងទៅហើយ។ ការបង្ហាញខ្លួនក្នុងកម្មវិធីរបស់គ្រួសារតារាកម្ពុជា ក្នុងបរិវេណសាកលវិទ្យាល័យភូមិន្ទភ្នំពេញ គឺជាភស្ដុតាងស្រាប់ ដោយគ្រាន់តែលោកបង្ហាញខ្លួនមិនទាន់ឡើងឆាកផង គឺមានអ្នកស្ទុះអោបរឹត និងយកកាដូឲ្យប្រជ្រៀតគ្នាទៅហើយ។ ងាកទៅមើលសំឡេងហ៊ោរបស់អ្នកគាំទ្រវិញ លោក ជ័យ សុវ៉ាត ត្រូវគេឃើញអ្នកទស្សនាការច្រៀងរបស់លោក ស្រែកចង់ដាច់ក្រឡើតដោយម្នាក់ៗ គ្រាន់តែឮលោកប្រកាសថា «សូមរីករាយជាមួយបទថ្មី ក្រោមចំណងជើងថា ស្រឡាញ់អូនមែន មិនមែនលំៗ» ហ៊ោផង ទះដៃផង ធ្វើឲ្យគេកត់សម្គាល់ឃើញពីសន្ទុះគាំទ្រ ចំពោះលោកខុសគ្នាដាច់ឆ្ងាយ កាលពីមុន បើទោះជាក្នុងពេលនោះលោកត្រូវគេគាំទ្រខ្លាំង ក្នុងនាមជាតារាចម្រៀងចម្រៀងផ្កាយរះក្នុងសួន និងជាកូនកំព្រាឪពុកម្ដាយ ដែលមានសំណាងម្នាក់។

ក្នុងចំណោមតារាល្បីៗ ដែលបានបង្ហាញខ្លួនក្នុងព្រឹត្តិការណ៍នោះ គេនៅតែមើលឃើញថាលោក ជ័យ សុវ៉ាត ក្រសោបបានប្រជាប្រិយជាងគេ។ ជាក់ស្ដែងនៅពេលវេលា ដែលលោកឡើងច្រៀងលើឆាករបស់សាកលវិទ្យាល័យភូមិន្ទភ្នំពេញ ក្នុងវេលាម៉ោងជិត១រសៀល ដែលជាម៉ោងពេលត្រូវសម្រាកបាយថ្ងៃត្រង់ទៅហើយ ក៏នៅតែមានអ្នកទស្សនាកកកុញមុខឆាក ដោយគ្រាន់តែឃើញទិដ្ឋភាពដែលលោកឡើងឆាក ក៏រំភើបជំនួសផងដែរ។ លោកជ័យ សុវ៉ាត ទើបតែមាន២បទនៅក្នុងផលិតកម្មសាន់ដេប៉ុណ្ណោះ ប៉ុន្តែលោកចាប់ផ្ដើមមានហ្វេនច្រើន រួចទៅហើយក្នុងដៃ។

លោកត្រូវគេទស្សន៍ទាយថានឹងមានទីផ្សារស្ទុះខ្លាំង ក្នុងឆ្នាំ២០១៨នេះ ដោយផ្អែកតាមការបង្ហាញខ្លួន របស់លោកក្នុងកម្មវិធីសប្បុរសធម៌ កាលពីថ្ងៃទី១៣ មករា នៅភូមិន្ទភ្នំពេញក្រោមការរៀបចំតន្ត្រីដោយ «គ្រួសារតារាកម្ពុជា» គឺសន្ទុះរបស់លោកមិនធម្មតា។ ក្រៅពីជាអ្នកចម្រៀង លោកក៏ជាអ្នកនិពន្ធបទចម្រៀងផ្ទាល់ខ្លួនផងដែរ ដោយបទ «ស្រឡាញ់អូនមែនទែន មិនមែនលំៗ» គឺលោកប្រកាសថា ជាស្នាដៃរបស់លោកដោយផ្ទាល់ នៅក្នុងផលិតកម្មសាន់ដេ។

អ៊ីចឹងហើយទើបលោកពិតមានកម្រិតឈានឡើងដោយមិនពិបាកនៅក្នុងផលិតកម្មសាន់ ដោយសារតែលោកមិនរង់ចាំ តែច្រៀងក្រោមការរៀបចំរបស់ផលិតកម្ម ហើយមានលទ្ធផលនិពន្ធ និងធ្វើបទខ្លួនឯង។ លោកជ័យ សុវ៉ាត និយាយថាក្រោយចុះកុងត្រា៧ឆ្នាំ ជាមួយសាន់ដេ លោកមានបទចម្រៀង១០បទហើយ ដោយខាងផលិតកម្មនឹងបញ្ចេញបទញាក់ ក្នុងពេលឆាប់ៗនោះផង បន្ទាប់ពី«ក្រចេះស្នេហ៍ខ្ញុំ» និងបទ «ស្រឡាញ់អូនមែនទែន មិនមែនលំៗ»។ ទើបតែចេញក្ដៅៗ ហើយទទួលបានការចាប់អារម្មណ៍៕

ចែកចាយបន្ត