Post News Media ព័ត៌មានសិល្បៈ និងកម្សាន្ត ដួង វិរ:សិទ្ធ...

ដួង វិរ:សិទ្ធ កាន់ពាន I Am A Singer ទាំងទឹកភ្នែក

ចែកចាយបន្ត

ភ្នំពេញ: បញ្ចប់ការប្រលងកម្មវិធី I Am A Singer រដូវកាលទី១ កាលពីយប់ថ្ងៃទី១៦ តុលា តារាចម្រៀងអាជីពលោកដួង វិរ:សិទ្ធ បានក្លាយជាម្ចាស់ពានគួរឲ្យភ្ញាក់ផ្អើល។ យ៉ាងណាក៏ដោយ គេឃើញតារារូបនេះ បង្ហូរទឹកភ្នែកយ៉ាងចម្លែក ដោយសារតែលោករំភើបខ្លាំងពេក។

ការប្រកួតដែលមានតារាចម្រៀងអាជីពល្បីឈ្មោះច្រើនរូបចូលប្រកួតមួយនេះ បើទោះជាដើមកម្មវិធី និងពាក់កណ្ដាលកម្មវិធីហាក់មិនសូវទទួលបានការគាំទ្រខ្លាំងក្លាដូចកម្មវិធីប្រលងចម្រៀងលំដាប់ថ្នាក់អន្តរជាតិ២ទៀតរបស់ហង្សមាស តែសម្រាប់ការប្រកួតវគ្គបញ្ចប់កាលពីយប់់ថ្ងៃទី១៦ តុលា គឺមានអ្នកទស្សនាតាមដានខ្លាំង។

ព្រឹត្តិការណ៍នេះត្រូវគេឃើញមានអ្នកទស្សនាយ៉ាងណែនស្ទីឌីយោរហូតដល់ម៉ោង១២កន្លះអាធ្រាត្រ ក្នុងពេលប្រគល់ពាន។ តារាចម្រៀងដែលបានចូលប្រកួត នៅវគ្គចុងក្រោយនោះរួមមាន កញ្ញាសួស វិហ្សា លោកដួង វិរ:សិទ្ធ កញ្ញាវី ឌីណែត លោកនៅ ស៊ីនឿន កញ្ញាផន ស្រីខួច លោកយក់ ដួងតារា កញ្ញា ឈិត សុវណ្ណបញ្ញា ដោយតារាទាំង៧ត្រូវបានកំណត់ឲ្យច្រៀងបទនិពន្ធផ្ទាល់ដោយអង្គសម្ដេចឪ និងវគ្គទី២តម្រូវឲ្យបកស្រាយបទជាដៃគូ ជាមួយម្ចាស់បទដើម។ នៅក្នុងពិធីនេះ លោកដួង វិរ:សិទ្ធ ដែលមានលេខសម្គាល់លេខ២ ជាអ្នកទទួលបានសំឡេងច្រើនជាងគេ ហើយបានក្លាយជាម្ចាស់ពានរដូវកាលទី១។

លោកត្រូវគេឃើញអរផង ហូរទឹកភ្នែកផង ដោយសារតែទប់អារម្មណ៍ក្ដុកក្ដួល និងរំភើបមិនបាន។ យ៉ាងណាមិញ មិនមានការបង្ហាញពីតួលេខអ្នកផ្ញើសារឲ្យលោកបានឈ្នះជាម្ចាស់ពាននោះទេ បើទោះជាលោកមានទឹកដមសំឡេង និងបច្ចេកទេសច្រៀង សមជាបេក្ខភាពកាន់ពាន ក្នុងចំណោមតារាល្បីៗ។

លោកដួង វិរ:សិទ្ធ ទទួលបានពានជើងឯក អមដោយទឹកប្រាក់១០០លានរៀល ដោយមិនរាប់បញ្ចូលទឹកប្រាក់ឧបត្ថម្ភរបស់ក្រុមហ៊ុន និងប័ណ្ណសម្រាប់ទិញរថយន្តដែលមានទឹកប្រាក់៣០០ និង៥ពាន់ដុល្លារ នៅឡើយ។ លោកត្រូវបានគេរំពឹងថានឹងក្លាយជាតារាដែលទទួលបានការចាប់អារម្មណ៍ បន្ទាប់ពីភាពល្បីល្បាញរបស់លោកនាពេលកន្លងមក មិនទាន់លោតខ្លាំង៕

photo_2016-10-16_07-18-49

photo_2016-10-16_07-19-06

photo_2016-10-16_07-19-13

photo_2016-10-16_07-19-27

photo_2016-10-16_07-19-31

photo_2016-10-16_07-19-55

photo_2016-10-16_07-19-49