ភ្នំពេញៈ បណ្ដារាជធានី-ខេត្តមួយចំនួនក្នុងប្រទេសកម្ពុជា និងតំបន់ឥណ្ឌូចិន នឹងទទួលរងឥទ្ធិពលពីព្យុះទី២៥ ឈ្មោះ TOKAGE ដែលកើតឡើងនៅភាគអាគ្នេយ៍ នៃប្រទេសហ្វីលីពីន។ នេះបើតាមសេចក្ដីជូនដំណឹងរបស់ក្រសួងធនធានទឹក និងឧតុនិយម ចេញផ្សាយនៅរសៀលថ្ងៃទី២៣ ខែវិច្ឆិកា ឆ្នាំ២០១៦។

ក្រសួងធនធានទឹក ឲ្យដឹងថា ព្យុះទី២៥ ឈ្មោះថា TOKAGE នឹងធ្វើដំណើរចូលមកសមុទ្រចិនខាងត្បូង រួចបន្តដំណើរទៅដល់តំបន់ឆ្នេរប្រទេសវៀតណាម ភាគអាគ្នេយ៍ នាអំឡុងថ្ងៃទី២៩-៣០ ខែវិច្ឆិកា ឆ្នាំ២០១៦។ លើសពីនេះ បណ្ដារាជធានីខេត្តមួយចំនួន រួមមាន រាជធានីភ្នំពេញ ខេត្តកំពង់ឆ្នាំង កណ្ដាល កំពង់ស្ពឺ តាកែវ ស្វាយរៀង ព្រៃវែង កំពង់ចាម ត្បូងឃ្មុំ និងបណ្ដាខេត្តនៅតាមតំបន់មាត់សមុទ្រ នៃប្រទេសកម្ពុជា អាចនឹងមានភ្លៀងធ្លាក់រាយប៉ាយ ចាប់ពីថ្ងៃទី២៩ ខែវិច្ឆិកា ដល់ថ្ងៃទី១ ខែធ្នូ ឆ្នាំ២០១៦។

ក្រសួងធនធានទឹក ក៏ឲ្យដឹងដែរថា បន្ទាប់ពីព្យុះទី២៥ អស់ឥទ្ធិពលទៅ ជ្រលងសម្ពាធខ្ពស់ លាយឡំជាមួយជំនោរពីទិសខាងជើង នឹងចាប់ផ្ដើមបង្កើនឥទ្ធិពលមកលើព្រះរាជាណាចក្រកម្ពុជា ដែលនេះជាពេលចាប់ផ្ដើមនូវរដូវរំហើយផងដែរ៕