ភ្នំពេញៈ ស្រ្តីម្នាក់ ទើបសម្រាលកូនបានរយៈពេល៨ខែប៉ុណ្ណោះ បានដួលបោកក្បាលនៅក្នុងបន្ទប់ទឹក បណ្ដាលឲ្យសន្លប់ស្ដូកស្ដឹង ប៉ុន្តែប្ដីមិនបានដឹកទៅកាន់មន្ទីរពេទ្យ ដើម្បីសង្គ្រោះបន្ទាន់ឡើយ បែរជាកោសខ្យល់ឲ្យប្រពន្ធទៅវិញ លុះព្រឹកឡើងនៅតែមិនដឹងខ្លួនទៀត ទើបប្ដីសម្រេចចិត្តដឹកទៅកាន់គ្លីនិកឯកជនមួយ។
បន្ទាប់ពីដឹកទៅដល់ ខាងគ្លីនិកមិនហ៊ានទទួលព្យាបាលឡើយ ព្រោះស្ថានភាពធ្ងន់ធ្ងរពេក ទើបប្ដីបានដឹកតាមម៉ូតូរ៉ឺម៉កកង់បីទៅកាន់មណ្ឌលសុខភាពពោធិ៍ចិនតុង ដើម្បីសង្គ្រោះបន្ត ក្រោយពេលទៅដល់ ក្រុមគ្រូពេទ្យបានពិនិត្យមើលឃើញថា ស្រ្តីនោះបានស្លាប់បាត់ទៅហើយ គឺស្លាប់មុនពេលដឹកទៅដល់ទីនោះម្ល៉េះ។
ហេតុការណ៍នេះ បានបង្កឲ្យមានការភ្ញាក់ផ្អើល កាលពីវេលាម៉ោង១០ព្រឹកថ្ងៃទី៦ ខែមករា ឆ្នាំ២០១៧ នៅក្នុងមណ្ឌលសុខភាពពោធិ៍ចិនតុង ស្ថិតនៅក្នុងភូមិតាងួន សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។
ស្រ្តីដែលស្លាប់នោះឈ្មោះ ខេន ស្រីខួច អាយុ២៧ឆ្នាំ មុខរបរនៅផ្ទះ មានស្រុកកំណើតនៅក្នុងភូមិប្រាសាទ ឃុំភ្នំសន្ទុក ស្រុកសន្ទុក ខេត្តកំពង់ធំ។ ចំណែកប្តីមានឈ្មោះ អឿន អាយុ៣៨ឆ្នាំ មុខរបររត់ម៉ូតូឌុប មានស្រុកកំណើតនៅក្នុងភូមិកំពង់ក្តី ឃុំខ្ពង់រាប កោះសូទិន កំពង់ចាម អ្នកទាំងពីរនាក់នោះ មានកូន៣នាក់ សព្វថ្ងៃស្នាក់នៅផ្ទះជួលក្នុងភូមិចោមចៅ សង្កាត់ចោមចៅ ខណ្ឌពោធិ៍សែនជ័យ។
ក្រោយពេលកើតហេតុកម្លាំងនគរបាលមូលដ្ឋានបានចុះទៅធ្វើកោសល្យវិច័យ រួចបានប្រគល់សពជូនក្រុមគ្រួសារធ្វើបុណ្យតាមប្រពៃណី៕
