ភ្នំពេញៈ នារីបម្រើខារ៉ាអូខេម្នាក់ រងរបួសដាច់ស្លឹកត្រចៀកម្ខាង ខណៈដែលទាស់សំដី ជាមួយអ្នកធ្វើការជាមួយគ្នា បានផ្ទុះហិង្សាមួយប្រាវបង្កការភ្ញាក់ផ្អើលដល់ភ្ញៀវដែលកំពុងតែផឹកស៊ី។

ហេតុការណ៍នេះ បានកើតឡើងកាលពីវេលាម៉ោង២ រំលងអាធ្រាត ឈានចូលថ្ងៃទី២៣ ខែកុម្ភៈ ឆ្នាំ២០១៧ ស្ថិតនៅក្នុងហាងខារ៉ាអូខេ មួយកន្លែង ដែលមានយីហោ ភេសជ្ជៈ តន្ត្រីKTV តាមបណ្តោយផ្លូវវេងស្រេង ភូមិជ្រៃកោង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

សមត្ថកិច្ចបានឲ្យដឹងថា ជនរងគ្រោះដែលរងរបួសដាច់ស្លឹកត្រចៀកមានឈ្មោះ ម៉ុន ចាន់ឌឿន ភេទស្រី អាយុ៣០ឆ្នាំ មុខរបរអ្នកចម្រៀង ស្នាក់នៅផ្ទះជួលភូមិជ្រៃកោង សង្កាត់ចោមចៅ ខណ្ឌពោធិ៍សែនជ័យ។ ចំណែកភាគីម្ខាងទៀតឈ្មោះ ស្រី ពេជ្រ អាយុប្រហែល២៩ឆ្នាំ ស្នាក់នៅបន្ទប់ជួល ភូមិចោមចៅ សង្កាត់ចោមចៅ ខណ្ឌពោធិ៍សែនជ័យ។

តាមសាក្សីនៅកន្លែងកើតហេតុបានឲ្យដឹងថា នៅមុនពេលកើតហេតុ ភាគីទាំងសងខាង បាននិយាយឌឺដងគ្នា រឿងធ្វើការរាល់ថ្ងៃ រហូតឈានទៅដល់ប្រើហិង្សាដាក់គ្នាទៅវិញទៅមក ធ្វើឲ្យភាគីម្ខាងរងរបួសផ្នែកត្រចៀកម្ខាងបង្កការភ្ញាក់ផ្អើលដល់ភ្ញៀវដែលកំពុងអង្គុយផឹកស៊ីនាំគ្នាចោមរោមមើល និងបុគ្គលិកនាំគ្នាជួយចាប់បំបែក។

ក្រោយពេលកើតហេតុសមត្ថកិច្ចមូលដ្ឋាន បានចុះទៅដល់ចំណុចកើតហេតុនិងបានឃាត់ភាគីម្ខាង មកសួរនាំនៅប៉ុស្តិ៍ចោមចៅ ចំណែកភាគីម្ខាងទៀតត្រូវគេបញ្ជូនទៅសង្គ្រោះបន្ទាន់នៅមន្ទីរពេទ្យ៕

https://youtu.be/NeGN9RPXcbY