Post News Media ព័ត៌មានជាតិ ជនសង្ស័យម្នាក...

ជនសង្ស័យម្នាក់ក្នុងចំណោមបក្ខពួក២នាក់ ត្រូវកម្លាំងកងរាជអាវុហត្ថខណ្ឌឫស្សីកែវឃាត់ខ្លួន

ចែកចាយបន្ត

ភ្នំពេញ: ជនសង្ស័យម្នាក់ក្នុងចំណោមបក្ខពួក២នាក់ ត្រូវបានកម្លាំងកងរាជអាវុហត្ថខណ្ឌឫស្សីកែវ ធ្វើការឃាត់ខ្លួន ក្រោយពីពួកគេធ្វើសកម្មភាពឆក់កាបូបពីនារីម្នាក់មិនបានសម្រេច ។

ហេតុការនេះកើតឡើងកាលពីវេលាម៉ោង ១២និង៣០នាទីថ្ងៃត្រង់ ថ្ងៃទី២១ ខែមីនា ឆ្នាំ២០១៧ នៅតាមបណ្តោយផ្លូវលេខ ២៧៣ កែងនឹងផ្លូវ បុប្ផារាជធានី ស្ថិតក្នុងភូមិទួលគោក សង្កាត់ទួលសង្កែ១ ខណ្ឌឫស្សីកែវ ។

ភ្នាក់ងារ Post News បានឲ្យដឹងថា ជនសង្ស័យទី១ដែលបានឃាត់ខ្លួននោះមានឈ្មោះ សុខ ដារ៉ា ភេទប្រុស អាយុ៣៤ឆ្នាំ មុខរបរមិនពិតប្រាកដ ស្នាក់នៅម្តុំផ្សារទួលគោក សង្កាត់បឹងកក់២ ខណ្ឌទួលគោក (ត្រូវបានឃាត់ខ្លួន) និងជនសង្ស័យទី២មានឈ្មោះ ក្ដី ភេទប្រុស អាយុ២៥ឆ្នាំ មុខរបរ និងទីលំនៅមិនពិតប្រាកដ (បានរត់គេចខ្លួន) ។ ចំណែកឯស្ត្រីរងគ្រោះមិនត្រូវបានស្គាល់អត្តសញ្ញាណនោះឡើយ ។

ប្រភពដដែលបានបន្តថា យោងតាមមន្ត្រីកងរាជអាវុហត្ថបានប្រាប់ភ្នាក់ងារ Post News ឲ្យដឹងថា នៅមុនពេលកើតហេតុ ស្ត្រីម្នាក់បានជិះម៉ូតូ មួយគ្រឿង ម៉ាក ធូដេ ពណ៌ក្រហម គ្មានស្លាកលេខ បានធ្វើដំណើរតាមបណ្តោយផ្លូវលេខ ២៧៣ កែងនឹងផ្លូវ បុប្ផារាជធានី ខណ:ពេលកំពុងធ្វើដំណើរ ស្រាប់តែមានជនសង្ស័យចំនួន ២នាក់ជិះម៉ូតូ មួយគ្រឿង ម៉ាក ស៉ីរុស ពណ៌សលាយខ្មៅ គ្មានស្លាកលេខ មកពីក្រោយ ហើយក៏ធ្វើសកម្មភាពឆក់កាបូប តែពេលនោះ ត្រូវបានជនរងគ្រោះទាញយកកាបូបមកវិញ ទើបបណ្តាលឲ្យជនសង្ស័យទាំង ២នាក់នោះដួលម៉ូតូ ។ ភ្លាមៗនោះ ក៏បានជួបជាមួយនឹងកម្លាំងកងរាជអាវុធហត្ថខណ្ឌឫស្សីកែវ ដែលកំពុងធ្វើការជិះល្បាតក្នុងមូលដ្ឋាន ក៏បានអន្តរាគមន៍ឃាត់ខ្លួនបានជនសង្ស័យម្នាក់ រឺឯជនសង្ស័យម្នាក់ទៀតបានរត់គេចខ្លួនបាត់ ដោយបន្សល់ទុកតែម៉ូតូមួយគ្រឿងនៅទីនោះ ហើយក្នុងពេលឃាត់ខ្លួននោះ ក៏ត្រូវបានបងប្អូនប្រជាពលរដ្ឋនៅទីនោះ នាំគ្នាវាយមួយដៃមួយជើង បណ្តាលឲ្យរងរបួសស្រាល ។

ក្រោយពីកើតហេតុ កម្លាំងកងរាជអាវុហត្ថខណ្ឌឫស្សីកែវ បានធ្វើការនាំខ្លួនជនសង្ស័យខាងលើ រួមនឹងម៉ូតូទៅកាន់ទីបញ្ជាការខណ្ឌ ដើម្បីធ្វើការសាកសួរ និងកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ចាត់ការបន្តតាមផ្លូវច្បាប់ ៕

ចែកចាយបន្ត