Post News Media ព័ត៌មានជាតិ ស្រាយបំភ្លឺពី...

ស្រាយបំភ្លឺពីករណី អាងខ្នងផ្កាយ៣ ក្នុងជម្លោះជាង១០ឆ្នាំ

ចែកចាយបន្ត

ភ្នំពេញ: នៅរសៀលថ្ងៃទី២១ ខែមីនា ឆ្នាំ២០១៧ កូនប្រុសលោក ស៊ូយ ទ្រី និង លោកស្រី ទៀង ឡុងហៀង បានមកធ្វើការបកស្រាយបំភ្លឺ ពីករណីជម្លោះជាង១០ឆ្នាំរ៉ាំរ៉ៃ! អាងខ្នងផ្កាយ៣ ព្រួតវាយម្តាយគេបែកក្បាលទាំងព្រឹកហើយ នៅមកព្រួតវាយកូនគេទៀត ដែលអង្គភាពសារព័ត៌មានបានធ្វើការផ្សព្វផ្សាយថា ឪពុកម្តាយគាត់ជាជនបង្ក និងបងថ្លៃដែលបានបើករថយន្តហាយឡែនឌ័រ ពណ៌ស្ករ ស្លាកលេខ ភ្នំពេញ 2K-9841 មិនបានពាក់ព័ន្ធក្នុងរឿងហេតុខាងលើនោះទេ។

តាមការធ្វើបទសម្ភាសន៍បាន កូនលោក ស៊ូយ ទ្រី និង លោកស្រី ទៀង ឡុងហៀង បានប្រាប់Post News ថា គាត់មានការប្រតិកម្មចំពោះចំណងជើងដែលចុះផ្សាយថា ( ជម្លោះជាង១០ឆ្នាំរ៉ាំរ៉ៃ! អាងខ្នងផ្កាយ៣ ព្រួតវាយម្តាយគេបែកក្បាលទាំងព្រឹកហើយ នៅមកព្រួតវាយកូនគេទៀត ) ដោយភាគីក្រុមគ្រួសារលោក សៅ ស្រេម និង ប្រពន្ធលោកស្រី អ៊ឹង គឹមស៊ុនណារី បានចោទប្រកាន់និងរករឿងមិនចេះមិនហើយតាំងពីមករួមរស់នៅក្នុងដីឡូតិ៍រួម ទោះជាកន្លងមក មានលោក ប៉ាង លីដា អភិបាលរងនៃគណ:អភិបាលខណ្ឌទួលគោក បានចុះមកធ្វើការដោះស្រាយជាច្រើនលើករហូតដល់ខាងគាត់ជាកូនប្រុសលោក ស៊ូយ ទ្រី និង លោកស្រី ទៀង ទទួលបានឯកសារ ស.ជ.ណ បន្ថែមទៀត។

គាត់បានរៀបរាប់ម្តងទៀតថា នៅព្រឹកថ្ងៃទី២០ ខែមីនា ឆ្នាំ២០១៧ ម្តាយឪពុកគាត់បានចុះពីខាងលើផ្ទះជាន់ទី១ ដែលមានលេខ៣០៣E1 ផ្លូវម៉ៅសេងទុង សង្កាត់ផ្សារដើមគរ ខណ្ឌទួលគោក រាជធានីភ្នំពេញ ហើយបានទៅសួរនាំអ្នកលក់ស្វាយ នៅខាងមុខផ្ទះ ខណ:នោះស្រាប់តែលោកស្រី អ៊ឹង គឹមស៊ុនណារី ភេទស្រី អាយុ៥៦ឆ្នាំ បានដើរមកបុកលោកស្រី ទៀង ឡុងហៀង ភេទស្រី អាយុ៧២ឆ្នាំ ហើយលោក ស៊ូយ ទ្រី ភេទប្រុស អាយុ៧៥ឆ្នាំ ដែលជាប្តីបានសួរលោកស្រី អ៊ឹង គឹមស៊ុនណារី ថាហេតុអ្វីបានជាដើរបុកគេអញ្ចឹង? ស្រាប់តែលោកស្រី អ៊ឹង គឹមស៊ុនណារី មិនបានឆ្លើយតបឬសុំទោសទេ គឺគាត់ថែមទាំងសារភាពនិងជេរបញ្ចោរលោក ស៊ូយទ្រី និង លោកស្រី ទៀង ឡុងហៀង ដោយពាក្យមិនល្អនិងការប្រមាថទៀត ។

ក្រោយមក ក៏មានរឿងមួយផ្សេងទៀត ដោយកូនប្រុសរបស់លោក សៅ ស្រេម និង លោកស្រី អ៊ឹង គឹមស៊ុនណារី ដែលមានឈ្មោះ សៅ ចាន់តារា ភេទប្រុស អាយុ២៧ឆ្នាំ ដែលបានចោទប្រកាន់ថាមានក្រុមក្មួយចាប់វាយគ្រាន់តែតាមមើលរថយន្តនោះ គឺមិនដូច្នេះទេ ការពិតទៅលោក សៅ ចាន់តារា ជាអ្នកបង្ក និង តែងតែស្រែកឡូឡាស្រែកថា ជនល្មើសៗ តាំងពីនៅកន្លែងមន្ទីរសម្រាកព្យាបាលឯកទេសឆ្អឹងរបស់លោក ម៉ក់ សុវណ្ណ មានអាស្រ័យដ្ឋាននៅខាងក្រោយមន្ទីរពេទ្យរបេង ស្ថិតនៅខណ្ឌចំការមន ហើយពេលត្រឡប់មកផ្ទះលេខ២៤៥ ជិតស្តុបផ្សារដើមគរ ផ្លូវម៉ៅសេងទុង សង្កាត់ផ្សារដើមគ ខណ្ឌទួលគោក រាជធានីភ្នំពេញ ស្រាប់តែលោក សៅ ចាន់តារា បានជិះម៉ូតូមកកាក់ពីខាងមុខរថយន្តហាយឡែនឌ័រ ពណ៌ស្ករ ស្លាកលេខ ភ្នំពេញ 2K-9841 ដែលបងថ្លៃគាត់ជូនទៅមន្ទីរពេទ្យដើម្បីពិនិត្យនិងព្យាបាលម្តាយ ដែលត្រូវលោក សៅ ស្រេម ច្រានគាត់ឲ្យដួលផ្ទប់ទៅនឹងដីឡើងប៉ោងសរសៃចង្កេះ ឬត្រគៀក ដែលត្រូវសម្រាកព្យាបាលរយ:ពេល៣ខែ ទៅ៦ខែ ហើយលោក សៅ ចាន់តារា បានចោទប្រកាន់ថារថយន្តបានបុកគាត់ទៀត ដើម្បីបង្កការភ្ញាក់ផ្អើលដល់សមត្ថកិច្ច និងប្រជាពលរដ្ឋចោមរោមមើល ហើយលោក សៅ ស្រេម និងលោក សៅ ចាន់តារា ក៏ស្រែកឆោឡោថាជនល្មើស ម៉េចនគរបាលមិនឃាត់ខ្លួនយកទៅដាក់គុក ។

មិនតែប៉ុណ្ណោះ ថ្ងៃទី២១ ខែមីនា ឆ្នាំ២០១៧នេះ គាត់ជាកូនប្រុសលោក ស៊ូយទ្រី និងលោកស្រី ទៀង ឡុងហៀង ចង់ផ្តល់យុត្តិធម៌ជូនបងថ្លៃ ដែលមិនបានចូលរួមត្រូវបានអ្នកធ្វើការងារ ក៏ដូចជាអ្នកបានស្គាល់មានការយល់ច្រឡំ និងទាមទារយុត្តិធម៌ជូនឪពុកម្តាយចាស់ៗ ដែលរស់នៅក្នុងដីឡូតិ៍រួម ហើយអ្នកមករស់នៅក្រោយ មិនយល់ពាក្យថារួម ថែមទាំងបង្ករឿងហេតុមិនចេះចប់មិនចេះហើយថែមទាំងទាមទារចង់ចាប់ក្រុមគ្រួសារគាត់ដាក់គុកទៀត។ អ្វីដែលសំខាន់នេះទំនាស់រវាងគ្រួសារគាត់ រួមនឹងភាគីដែលអះអាងថាជាជនរងគ្រោះនោះ គឺកើតឡើងយូរណាស់មកហើយ ដោយសារតែរឿង យល់ពាក្យថាដីឡូតិ៍រួម ហើយទំនាស់នេះកើតឡើងជាច្រើនលើកមកហើយ ប៉ុន្តែមិនដែលមានរឿងប្រទូស្តសារាយ រហូតមានអ្នករបួសអញ្ចឹងនោះទេ ទើបតែលើកនេះតែប៉ុណ្ណោះ។ ម្យ៉ាងបញ្ហាទំនាស់នេះ ខាងអាជ្ញាធរមានសមត្ថកិច្ចក៏ដោះស្រាយមិនចេញ រហូតសំណុំរឿងនេះ ឡើងដល់តុលាការក៏នៅតែដោះស្រាយមិនចេញដដែល។ ដោយឡែកចំណែកពាក្យថា គាត់អាងខ្នងផ្កាយ៣ ដែលភាគីខាងលោកស្រីអ៊ឹង គឹមស៊ុនណារី ចោទនោះ គឺមិនពិតនោះទេ ដោយសារតែភាគីខាងនោះ ឃើញគាត់ផឹកស៊ីជាមួយអ្នកមានមុខ មានមាត់ក្នុងសង្គម ក៏លើកឡើងបែបនេះដោយខ្លួនឯង។

ចំណែករឿងភាគីជនរងគ្រោះដែលចោទថា គាត់បានចាក់ដីបិទផ្លូវចូលឡានផ្ទះរបស់ភាគីម្ខាងទៀតនោះ គឺមិនដែលដែលគេលើកឡើងនោះទេ ដោយហេតុថាជាដីរួម ម្យ៉ាងខ្លាចខែវស្សាមានទឹកជន់លិចដល់គីឡូទឹករបស់គាត់ និងថែរក្សាសុវត្ថិភាពកន្លែងដើរជូនឪពុកម្តាយគាត់ដែលចាស់ៗផងនោះ ទើបគាត់ចាក់ថ្ម ដើម្បីភាពងាយស្រួលតែប៉ុណ្ណោះ។ ចំណែកមូលហេតុ ដែលលោកស្រី អ៊ឹង គឹមស៊ុនណារី បែកក្បាលនោះ គឺមិនមែនជាចេតនា វាយឲ្យបែកក្បាលនោះទេ គឺកើតឡើងពេលភាគីទាំងសងខាងរុញច្រានគ្នាទៅវិញទៅមក ទើបថង់ដែលម្តាយគាត់កាន់ជាប់នឹងដៃនោះ គ្រវៀសត្រូវដោយអចេតនា ទើបមានរបួសបែបនេះ។

តើប្រិយមិត្ត អ្នកអាន យល់យ៉ាងណា ចំពោះបញ្ហាទំនាស់រ៉ាំរ៉ៃនេះ? ដែលយើងបានផ្សព្វផ្សាយមានចំណងជើងថា ( ជម្លោះជាង១០ឆ្នាំរ៉ាំរ៉ៃ! អាងខ្នងផ្កាយ៣ ព្រួតវាយម្តាយគេបែកក្បាលទាំងព្រឹកហើយ នៅមកព្រួតវាយកូនគេទៀត ) តែឥឡូវខាងលោក ស៊ូយទ្រី និងលោកស្រី ទៀង ឡុងហៀង មានវីដេអូពីសកម្មភាព និងវីដេអូកាមេរ៉ាសុវត្ថិភាពជាភស្តុតាង ព្រមទាំងនិងបង្ហាញឯកសារ ស.ជ.ណ បន្ថែមទៀតនៅពេល នេះ។

ជាចុងក្រោយកូនប្រុស លោក ស៊ូយទ្រី និងលោកស្រី ទៀង ឡុងហៀង បានដាក់ពាក្យប្តឹងនៅប៉ុស្តិ៍នគរបាលសង្កាត់ផ្សារដើមគរ នៅថ្ងៃទី២១ ខែមីនា ឆ្នាំ២០១៧នេះផងដែរដើម្បីដោះស្រាយតាមនីតិវិធីផ្លូវច្បាប់៕

ចែកចាយបន្ត