Post News Media ព័ត៌មានជាតិ រឹងដឹកសំរាមទៅ...

រឹងដឹកសំរាមទៅដាក់កន្លែងហាមឃាត់ ត្រូវកម្លាំងសណ្តាប់ធ្នាប់ចាប់ឃាត់

ចែកចាយបន្ត

ភ្នំពេញ: រថយន្តកញ្ចាស់១គ្រឿងនិងម៉ូតូកង់បី១គ្រឿងទៀតដឹកយកសំរាមទៅចាក់ចោលយ៉ាងអណាធិបតេយ្យ នៅតាមដងផ្លូវសាធារណ: ក្បែរស្លាកហាមចាក់សំរាម របស់សាលារាជធានីភ្នំពេញតែម្ដង ត្រូវបានភ្នាក់ងារក្រុមហ៊ុនស៊ិនទ្រី ប្រចាំសង្កាត់ចោមចៅ សហការជាមួយកម្លាំងសណ្ដាប់ធ្នាប់ខណ្ឌពោធិ៍សែនជ័យឃាត់យកមកសាកសួរ។

ហេតុការណ៍នេះបានកើតឡើងកាលពីវេលាម៉ោង៨ និង១៥នាទី ព្រឹកថ្ងៃទី២២ ខែមីនា ឆ្នាំ២០១៧ នៅចំណុចមុខបុរីសែនមនោរម្យ តាមផ្លូវជាតិលេខ៤ ភូមិអង្គកែវ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

កម្លាំងសណ្ដាប់ធ្នាប់ខណ្ឌពោធិ៍សែនជ័យបានឲ្យដឹងថា រថយន្តដឹកសំរាម១គ្រឿងនោះ ពណ៌ស ពាក់ស្លាកលេខ ភ្នំពេញ 2F-9357 បើកបរដោយបុរសម្នាក់ និយាយខ្មែរមិនច្បាស់ឈ្មោះ ជា សុខ អាយុជាង៥០ឆ្នាំ ដែលរថយន្តខាងលើនោះ ដឹកសំរាមសុទ្ធ តែកម្ទេចកម្ទីរឈើ ប៉ុន្តែមិនដឹងថាដឹកចេញពីទីតាំងកែច្នៃឈើ ណាមួយនោះឡើយ។

នៅមុនពេលកើតហេតុ រថយន្តនោះបានដឹកសំរាមខាងលើ ទៅចាក់ចោលនៅត្រង់ ចំណុចហាមឃាត់នោះ ដែលមានស្លាក«ហាមចាក់សម្រាម» របស់សាលារាជធានីភ្នំពេញ ដាក់នៅទីនោះ ដោយឃើញនៅតែផ្គើនបែបនេះ កម្លាំងភ្នាក់ងារក្រុមហ៊ុនស៊ិនទ្រីចោមចៅ ចុះទៅឃាត់ស្រាប់តែអ្នកបើករថយន្តនោះ បញ្ចេញចរិតក្រអឺតក្រទមយ៉ាងខ្លាំងដាក់កម្លាំង ហើយក៏ត្រូវបានកម្លាំងនាំយករថយន្ត ទៅកាន់សាលាខណ្ឌពោធិ៍សែនជ័យតែម្ដង ដោយឡែកម៉ូតូរម៉កកង់បី១គ្រឿង ពាក់ស្លាកលេខ ភ្នំពេញ 2B-8603 ហើយមិនត្រូវបានស្គាល់ឈ្មោះម្ចាស់នោះឡើយ។

ប្រភពដដែលបានបន្តថា ដោយបានដឹកសំរាមចម្រុះមិនមែនកម្ទេចឈើនោះក៏ត្រូវបាននាំទៅរក្សាទុក នៅសាលាខណ្ឌជាមួយគ្នានោះដែរ។ ហើយកន្លងមករថយន្តកញ្ចាស់១គ្រឿងខាងលើនោះ តែងតែបានដឹកយកសំរាមទៅចាក់ចោលនៅចំណុចខាងលើនោះជាបន្តបន្ទាប់មកហើយ ប៉ុន្តែភ្នាក់ងារខាងលើមិនដែលទាន់សោះ ហើយក្រោយចោលសំរាមរួច បានបើកគេចបាត់រាល់លើក។ អ្វីដែលជាការមិនអាចអត់ឱនឲ្យបាន នោះគឺពួកគេបានផ្គើនទៅនឹងបម្រាមនិងស្លាកហាមចាក់សំរាមរបស់សាលារាជធានីភ្នំពេញតែម្ដង៕

ចែកចាយបន្ត