Post News Media ព័ត៌មានជាតិ អ៊ំស្រីម្នាក់...

អ៊ំស្រីម្នាក់ដើរឆ្លងថ្នល់ ត្រូវរថយន្តបុកស្លាប់មួយរំពេច រួចរថយន្តដាក់មេប្រ៉ូចបាត់!

ចែកចាយបន្ត

ពោធិ៍សាត់: លោក យឹម ស៊ាងហៃ អធិការក្រុងពោធិ៍សាត់បានប្រាប់Post Newsថាមាន ហេតុការណ៍គ្រោះថ្នាក់ចរាចរណ៍ដ៏រន្ធត់មួយបានកើតឡើង បន្ទាប់ពីអ៊ំស្រីវ័យចំណាស់ម្នាក់ កំពុងដើរឆ្លងថ្នល់ ត្រូវបានរថយន្តមិនស្គាល់ម៉ាក បុកស្លាប់មួយរំពេចយ៉ាងអាណោចអាធ័ម ចំណែករថយន្តបង្ក បានបើកគេចខ្លួនបាត់ស្រមោល។ ហេតុការណ៍នេះបានកើតឡើងកាលពីវេលាម៉ោង ៥និង៣០នាទី ល្ងាចថ្ងៃទី២២ ខែមីនា ឆ្នាំ២០១៧ ស្ថិតនៅចំណុចមុខសាលាក្រុងពោធិ៍សាត់ ផ្លូវជាតិលេខ៥ ក្នុងភូមិទួលម្កាក់ សង្កាត់រលាប ក្រុងពោធិ៍សាត់។

សាកសពជនរងគ្រោះខាងលើនេះ មានឈ្មោះ ស្រូយ សុខផល អាយុ៦៨ឆ្នាំ ស្នាក់នៅភូមិសាលាគំរូ សង្កាត់ព្រៃញី ក្រុងពោធិ៍សាត់ ដើរឆ្លងថ្នល់ពីត្បូងទៅជើង ខណ:នោះស្រាប់តែមានរថយន្តមិនស្គាល់ម៉ាកមួយគ្រឿងបើកបរពីលិចទៅកើត បុកជនរងគ្រោះពេញទំហឹង បណ្តាលឲ្យបែកក្បាលស្លាប់ភ្លាមៗនៅនឹងកន្លែងកើតហេតុ។ ចំណែករថយន្តបង្ក បានបើកគេចខ្លួនបាត់ស្រមោល។

ក្រោយពីកើតហេតុសមត្ថកិច្ចបានចុះមកធ្វើការវាស់វែង ដោយបានប្រគល់សាកសពជនរងគ្រោះ ទៅឲ្យក្រុមគ្រួសារ ដឹកយកមកធ្វើបុណ្យតាមប្រពៃណី ចំណែករថយន្តបង្ក សមត្ថកិច្ចបាននិងកំពុងធ្វើការស្រាវជ្រាវ យកមកដោះស្រាយគ្នាតាមផ្លូវច្បាប់៕

ចែកចាយបន្ត