Post News Media ព័ត៌មានជាតិ បានឃើញក្មេងម្...

បានឃើញក្មេងម្នាក់នេះទេ? ដើរលេងអត់នៅផ្ទះ ខឹងម្ដាយវាយរត់ចេញពីផ្ទះបាត់!

ចែកចាយបន្ត

ភ្នំពេញ: ស្ត្រីម្នាក់បានកាន់រូបថតកូនស្រីមួយសន្លឹក ធ្វើដំណើរទៅកាន់ប៉ុស្ដិ៍ចោមចៅ ដើម្បីដាក់ពាក្យបណ្ដឹង កាលពីវេលាម៉ោង១រសៀល ថ្ងៃទី២៤ ខែមីនា ឆ្នាំ២០១៧ សុំឲ្យនគរបាលជួយអន្តរាគមន៏ ស្វែងរកកូនស្រីគាត់ដែលបានលួចរត់ចេញពីផ្ទះបាត់រយ:ពេល១យប់និង១ថ្ងៃ ហើយមិនដឹងទៅណា ព្រោះតែខឹងគាត់វាយប្រដៅបន្តិចបន្តួចសោះ។

ស្ត្រីរូបនេះមានឈ្មោះ សូយ នឿន អាយុ៣៦ឆ្នាំ មុខរបរកម្មការិនីរោងចក្រ ស្នាក់នៅភូមិជម្ពូវ័ន្ត សង្កាត់ចោមចៅ ខណ្ឌពោធិ៍សែនជ័យ មានស្រុកកំណើតភូមិទំពាំងស្រែ ឃុំមេសាង ស្រុកមេសាង ខេត្តព្រៃវែង។ ចំណែកកូនស្រីដែលបាត់ទៅនោះមានឈ្មោះ ផាន ធារី អាយុ១៤ឆ្នាំ ជាសិស្សថ្នាក់ទី៥ សាលាបឋមសិក្សាជម្ពូវ័ន ស្នាក់នៅជាមួយគាត់នៅភូមិកើតហេតុខាងលើ។

ស្ត្រីជាម្ដាយបាននិយាយថា កូនគាត់បានដើរលេងសេពគប់មិត្តភក្ដិមិនល្អ ចំណែកគាត់បានខំប្រឹងធ្វើការរកប្រាក់ដើម្បីចិញ្ចឹមនាងនិងក្មួយម្នាក់ទៀត ហើយដោយសារខ្លាចកូនដើរផ្លូវខុស មានបញ្ហាដល់ខ្លួននិងខូចកិត្តិយសគ្រួសារ ក៏បានស្ដីប្រដៅនិងណែនាំឈប់ឲ្យដើរលេងឥតប្រយោជន៏តទៅទៀត។ ប៉ុន្តែនាងមិនត្រឹមតែមិនព្រមស្ដាប់តាមនោះទេ ព្រមទាំងតមាត់ទៀតធ្វើឲ្យគាត់ខឹង ក៏បានទាញខ្សែភ្លើងវាយ២ទៅ៣ខ្សែភ្លើងតែម្ដង។

បន្ទាប់មកកូនស្រីគាត់បានលួចរត់ចេញពីផ្ទះបាត់ មិនដឹងថាទៅទីណាឡើយ ចំណែកគាត់ជាម្ដាយបានខលរកប៉ុន្តែខលចូលមិនលើកទៀត ទើបធ្វើឲ្យគាត់មានការព្រួយបារម្ភយ៉ាងខ្លាំង ក៏បានកាន់រូបថតកូនមួយសន្លឹក ធ្វើដំណើរទៅកាន់ប៉ុស្ដិ៍នគរបាលចោមចៅ ដើម្បីឲ្យនគរបាលជួយស្វែងរកកូនស្រីរបស់គាត់ដែលបាត់ផង៕

ចែកចាយបន្ត