Post News Media ព័ត៌មានជាតិ Update៖ បើកបរ...

Update៖ បើកបរមិនប្រកាន់ស្តាំ ម៉ូតូ២គ្រឿង ព្រលះគ្នាពេញទំហឹង របួសធ្ងន់ស្រាល ០៤នាក់

ចែកចាយបន្ត

ប៉ៃលិន: ភ្នាក់ងារ Post News ប្រចាំខេត្តប៉ៃលិន បានរាយការណ៍ថា នៅវេលាម៉ោង ១១ និង៤០ នាទីថ្ងៃទី២៥ ខែមីនា ឆ្នាំ២០១៧ មានករណីគ្រោះថ្នាក់ចរាចរណ៍ រវាងម៉ូតូ និងម៉ូតូ លើផ្លូវក្រួសក្រហម ឆ្ពោះទៅរមណីយដ្ឋាន ទឹកធ្លាក់អូរតាវ៉ៅ ស្ថិតនៅចំណុចភូមិកូនខ្លុង សង្កាត់អូតាវ៉ៅ ក្រុងប៉ៃលិន ខេត្តប៉ៃលិន បណ្តាលឱ្យយុវសិស្ស ០៣នាក់ និងបុរសចំណាស់ម្នាក់ រងរបួសធ្ងន់ស្រាល។

បើតាមសមត្ថកិច្ចនគរបាលចរាចរផ្លូវគោក នៃស្នងការដ្ឋាននគរបាលខេត្តប៉ៃលិន បានឱ្យដឹងថា ជនរងគ្រោះក្នុងហេតុការណ៍គ្រោះថ្នាក់ចរាចរណ៍នេះ ទី១ ឈ្មោះ ឡត សៀងហៃ ភេទប្រុស អាយុ១៥ មុខរបរ ជាសិស្ស បើកបរម៉ូតូម៉ាក Wave រស់នៅភូមិទួលខ្ពស់ ឃុំស្ទឹងត្រង់ ស្រុកសាលាក្រៅ ខេត្តប៉ៃលិន បានរងរបួសធ្ងន់ ទី២ ឈ្មោះ ចក់ កក្ដដា ភេទ ប្រុស អាយុ ១៤ ឆ្នាំ មុខរបរជាសិស្ស រស់នៅភូមិថ្នល់កែង ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ជាអ្នករួមដំណើរ បានរងរបួសធ្ងន់ ទី៣ ឈ្មោះ សុខ រតន: ភេទប្រុស អាយុ ១៤ ឆ្នាំ មុខរបរជាសិស្ស រស់នៅភូមិថ្នល់កែង ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ជាអ្នករួមដំណើរ បានរងរបួសស្រាល និងទី៤ ឈ្មោះ ហង់ កើយ អាយុ៥៦ ឆ្នាំ មុខរបរជាកសិករ បើកបរម៉ូតូម៉ាក Honda Dream រស់នៅភូមិកូនខ្លុង សង្កាត់អូតាវ៉ៅ ក្រុងប៉ៃលិន ខេត្តប៉ៃលិន បានរងរបួសធ្ងន់។

សមត្ថកិច្ចបានបន្តថា គ្រោះថ្នាក់ចរាចរណ៍នេះ កើតឡើងបណ្តាលមកពីកត្តាមនុស្សបើកបរមិនប្រកាន់ស្តាំ និងបើកបរក្នុងល្បឿនលឿន ដោយមិនមានការប្រុងប្រយ័ត្ន។ ក្រោយពេលកើតហេតុ សមត្ថកិច្ច បានដឹកជនរងគ្រោះ មកព្យាបាលនៅមន្ទីរពេទ្យបង្អែកខេត្ត និងដឹកយកម៉ូតូទាំង២គ្រឿង មករក្សារទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តប៉ៃលិន ដើម្បីរង់ចាំភាគីទាំងពីរ ចូលខ្លួនមកដោះស្រាយគ្នាទៅតាមផ្លូវច្បាប់៕

ចែកចាយបន្ត