Post News Media ព័ត៌មានជាតិ លួចគេគ្រាន់ គ...

លួចគេគ្រាន់ គេទាន់រយះក្បាល! ជនសង្ស័យ២នាក់លួចផ្លែចេកគេជិត៥០ស្និតចៃដន្យម្ចាស់គេទាន់

ចែកចាយបន្ត

កណ្តាល: ជនសង្ស័យម្នាក់ ក្នុងចំណោមបក្ខពួក២នាក់ ត្រូវបានប្រជាពលរដ្ឋទាញដំបងឈើវាយរយះក្បាលរបួសយ៉ាងធ្ងន់ធ្ងរ ក្រោយពីនាំគ្នាទៅលួចចេករបស់គេចំនួន៤៣ស្និតបានសម្រេច តែគេចមិនផុតត្រូវគេទាន់រួចចាប់ប្រគល់ឲ្យសមត្ថកិច្ចទាំងក្បាលនិងខ្លួនសុទ្ធតែឈាម។

ហេតុការណ៍នេះបានកើតឡើងកាលពីវេលាម៉ោង១០និង១៧នាទី យប់ថ្ងៃទី២៦ ខែមីនា ឆ្នាំ២០១៧ ស្ថិតនៅចំណុចដីចម្ការចេក ស្ថិតក្នុងភូមិឬស្សីជ្រោយ ឃុំស្វាយប្រទាលស្រុកស្អាង ខេត្តកណ្ដាល។

ជនសង្ស័យដែលពលរដ្ឋចាប់បាន រួចវាយនឹងដំបងឈើបែកក្បាលខាងលើនេះមានឈ្មោះ ទ្រី សុងហាក់ ភេទប្រុស អាយុ២៤ឆ្នាំ មិនពិតប្រាកដ របួសធ្ងន់ (មានស្នាមមុតក្បាលខាងក្រោយចំនួន១កន្លែង លើស្មាខាងស្តាំ១កន្លែង ចុងស្លាបក្រជៀវខាងឆ្វេង១កន្លែង) ស្នាក់នៅភូមិព្រែកតាជរ័ ឃុំស្វាយប្រទាល ស្រុកស្អាងខេត្ត កណ្តាល។ចំណែកបក្ខពួកម្នាក់ទៀតដែលរត់គេចខ្លួនមានឈ្មោះ វ៉ាន់ កុសល់ ភេទប្រុស អាយុ២៣ឆ្នាំ មុខរបរមិនពិតប្រាកដ ស្នាក់នៅភូមិព្រែកជរ័ ឃុំស្វាយប្រទាល ស្រុកស្អាង ។

ជនរងគ្រោះជាម្ចាស់ចម្ការចេកមានឈ្មោះ គួក គ្រុយ ហៅរស់ ភេទប្រុស អាយុ៤២ឆ្នាំ មុខរបរកសិករ ស្នាក់នៅក្នុងភូមិកើតហេតុខាងលើ។

ក្នុងនោះដែរ សមត្ថកិច្ចដកហូតបាន ម៉ូតូមួយគ្រឿងម៉ាកសង់ការ៉េ ពណ៌ក្រហម ពាក់ស្លាកលេខ កណ្ដាល 1P-1037 ចំនួន១គ្រឿង, ចេកខ្ចីចំនួន៤៣ស្និត, កណ្តៀវខ្វាង ចំនួន១,កាំបិតបុ័ង័តោចំនួន១,បង្គោលឈើចំនួនមួយប្រវែង ២,៣ម៉ែត្រ
, ស្បែកជើងផ្ទាត់ ពណ៌ខ្មៅ ចំនួន១គូ ,កាបូបស្ពាយចំនួន១ ពណ៌ក្រហមលាយខ្មៅ,បាវសចំនួន១ និងពិលចំនួន២។

មុនពេលកើតហេតុ មានឈ្មោះ វ៉ឹក យ៉ុត បានឃើញឈ្មោះ ទ្រី សុងហាក់ និងវ៉ាន់ កុសល ដែលជនសង្ស័យសង្ស័យកំពុងរៀបចេកដាក់ចូលក្នុងបាវ ពណ៌ស ឃើញដូចនោះ ឈ្មោះ វឹក យ៉ុត បានទូរសព្ទហៅជនរងគ្រោះ និងឈ្មោះ តួក តួ មកជួយចាប់ ភ្លាមនោះជនសង្ស័យក៏បើកម៉ូតូរត់គេចខ្លួន ពេលឈ្មោះ វឹក យ៉ុត បានទាញដំបងឈើវាយទៅលើជនសង្ស័យឈ្មោះ ទ្រី សុងហាក់ ចំនួន២ដំបង បណ្តាលឲ្យត្រូវរបួសធ្ងន់ ចំណែកបក្ខពួកម្នាក់ទៀតឈ្មោះ វ៉ាន់ កុសល បានគេចខ្លួនបាត់។

ក្រោយមកឈ្មោះជនរងគ្រោះរួមនឹងឈ្មោះវឹក យ៉ុត និង តួក តួ បានចាប់ជនសង្ស័យខាងលើ យកមកប្រគល់ឲ្យប៉ុស្តិ៍នគរបាលស្វាយប្រទាល។ ដោយឃើញជនសង្ស័យមានរបួស សមត្ថកិច្ចប៉ុស្តិ៍ស្វាយប្រទាល ក៏បញ្ជូនជនសង្ស័យទៅមន្ទីរពេទ្យបង្អែកស្រុកស្អាង ដោយមានសភាពធ្ងន់ធ្ងរពេក ក៏បញ្ជូនជនសង្ស័យទៅសង្គ្រោះនៅមន្ទីរពេទ្យក្នុងរាជធានីភ្នំពេញបន្តទៀតតែម្តង៕

ចែកចាយបន្ត