Post News Media ព័ត៌មានជាតិ គ្រឿងញៀនទៀតហើ...

គ្រឿងញៀនទៀតហើយ! ឃាត់ខ្លួនជនសង្ស័យ២នាក់ ដកហូតថ្នាំញៀន៤១កញ្ចប់

ចែកចាយបន្ត

កណ្តាល: ជនសង្ស័យចំនួន២នាក់ ត្រូវបានកម្លាំងសមត្ថកិច្ចធ្វើការចាប់ខ្លួន ពាក់ពន្ធ័នឹងករណីជួញដូរគ្រឿងញៀនខុសច្បាប់ ដកហូតបានថ្នាំញៀន៤១កញ្ចប់។

ការចាប់ខ្លួននេះបានធ្វើឡើងកាលពីវេលាម៉ោង ១១ ថ្ងៃទី២៧ ខែមីនា ឆ្នាំ២០១៧ ស្ថិតនៅចំណុច ភូមិចុងព្រែក ឃុំព្រែកស្ដី ស្រុកកោះធំ ខេត្តកណ្ដាល។

ជនសង្ស័យទាំង ២នាក់ ទី១-ឈ្មោះ ស៊្រិន រីម ភេទប្រុស អាយុ២៩ឆ្នាំ ស្នាក់នៅភូមិចុងព្រែក ឃុំព្រែកស្ដី ស្រុកកោះធំ ខេត្តកណ្ដាល មុខរបរលក់ថ្នាំញៀន និងទី២ឈ្មោះ ផុន យ៉ា ភេទប្រុស អាយុ ២៣ឆ្នាំ ទីលំនៅភូមិវត្តត្រាច ឃុំអង្គរទ្រេត ស្រុកស្វាយអន្ទរ ខេត្តព្រៃវែង មុខរបរ លក់ថ្នាំញៀន។

ក្នុងនោះសមត្ថកិច្ចដកហូតបាន ក្រាមពណ៌សថ្លាសង្ស័យសារធាតុញៀន ម៉ាទឹកកកIce ចំនួន ៤១ កញ្ចប់តូច,ទូរសព្ទចល័តចំនួន២ គ្រឿង ,សម្ភារ:កែច្នៃ សម្រាប់វេចខ្ចប់ និងប្រើប្រាស់គ្រឿងញៀនមួយចំនួន ,ប្រាក់រៀលចំនួន ៩៤,០០០រៀល។

មុននឹងឈានដល់ការចាប់ខ្លួនបានជនសង្ស័យខាងលើ ដែលជាមុខសញ្ញាដែលទើបដោះលែងចេញពីពន្ធនាគារដូចគ្នា តែបទល្មើសខុសគ្នា កាលពីថ្ងៃទី ១៩ ខែធ្នូ ឆ្នាំ ២០១៦ បន្ទាប់ពីឈ្មោះ ស៊្រិន រីម ត្រូវបានតុលាការដោះលែងចេញពីពន្ធនាគារ ដែលជាប់ពីបទ រក្សាទុកដោយខុសច្បាប់នូវសារធាតុញៀន ក៏ត្រឡប់មករស់នៅផ្ទះជាមួយម្ដាយវិញ ។ លុះនៅថ្ងៃទី ២៧ ខែមីនា ឆ្នាំ២០១៧ សមត្ថកិច្ចនគរបាលស្រុកកោះធំ បានទទួលព័ត៌មានពីមហាជនល្អថា ឈ្មោះ ស៊្រិន រីម កំពុងបន្ត សកម្មភាពលក់ និងចែកចាយគ្រឿងញៀនយ៉ាងសកម្មនៅចំណុច ភូមិចុងព្រែក ឃុំព្រែកស្ដី ស្រុកកោះធំ ខេត្តកណ្ដាល ។ ក្រោយពីទទួលបានព័ត៌មានភ្លាមសមត្ថកិច្ចជំនាញ បានសហការជាមួយកម្លាំងនគរបាលប៉ុស្ដិ៍ព្រែកស្ដី ចុះស្រាវជ្រាវរហូតដល់ចំណុចកើតហេតុខាងលើ ក៏បានជួបមុខសញ្ញាសង្ស័យ២នាក់ ឈ្មោះ ស៊្រិន រីម ភេទប្រុស អាយុ ២៩ឆ្នាំ និងឈ្មោះ ផុន យ៉ា ភេទប្រុស អាយុ ២៣ឆ្នាំ និងដកហូតបានថ្នាំញៀនចំនួន ៤១កញ្ចប់តូច ជាមួយសម្ភារ:កែច្នៃសម្រាប់វេចខ្ចប់ និងប្រើប្រាស់គ្រឿងញៀនមួយចំនួន ដែលរកឃើញមាននៅក្នុងផ្ទះ ស៊្រិន រីម ។

ជនសង្ស័យទាំង២នាក់ រួមទាំងវត្ថុតាងថ្នាំញៀន ដូចបានចាប់យកខាងលើ ត្រូវបានបញ្ជូនមកកាន់អធិការដ្ឋាននគរបាលស្រុកកោះធំ ដើម្បីធ្វើការសាកសួរ និងចាត់ការបន្តតាមនីតិវិធី ។

នៅចំពោះមុខសមត្ថកិច្ច ជនសង្ស័យ ស៊្រិន រីម និង ផុន យ៉ា បានសារភាពថា ថ្នាំញៀនចំនួន ៤១កញ្ចប់តូច ខាងលើនេះគឺពិតជារបស់ពួកខ្លួនបានទិញយកមកទុកលក់ និងចែកចាយបន្តប្រាកដមែន ហើយបច្ចុប្បន្នជនសង្ស័យខាងលើ ត្រូវបានសមត្ថកិច្ចកសាងសំណុំរឿងបញ្ជូនខ្លួនទៅកាន់តុលាការចាត់ការតាមផ្លូវច្បាប់៕