Post News Media ព័ត៌មានជាតិ ខឹងប្រពន្ធពេក...

ខឹងប្រពន្ធពេក វាយបំផ្លាញទ្រព្យសម្បត្តិចាក់ប្រេងកាតបម្រុងដុតខ្លួនឯងត្រូវប្រពន្ធប្តឹងសមត្ថកិច្ច

ចែកចាយបន្ត

ភ្នំពេញ: ខឹងប្រពន្ធពេក ប្រើហិង្សាវាយបំផ្លាញសម្ភារ:ក្នុងផ្ទះ និងបានយកប្រេងកាតចាក់លើខ្លួនបម្រុងនឹងដុតខ្លួនឯង ត្រូវប្រពន្ធរត់មកប្តឹងសមត្ថកិច្ចមូលដ្ឋានជួយអន្តរាគមន៍ឃាត់ខ្លួនទាន់។

ហេតុការណ៍នេះ កើតឡើងកាលពីវេលាម៉ោង១១ និង៥នាទី ថ្ងៃទី២៨ ខែមីនា ឆ្នាំ ២០១៧ ស្ថិតភូមិត្រាំងបោក នៅបុរីសន្តិភាព សង្កាត់ពងទឹក ខណ្ឌដង្កោ រាជធានីភ្នំពេញ។

សមត្ថកិច្ចបានឲ្យដឹងថា បុរសដែលយកប្រេងកាតមកចាក់ស្រោចខ្លួនបម្រុងនឹងដុតខ្លួនឯងមានឈ្មោះ សាន្ត រត្ន័នា ភេទប្រុស អាយុ៣១ឆ្នាំ មានមុខរបរជាចុងភៅ ស្នាក់នៅកន្លែងកើតហេតុខាងលើ និងមានប្រពន្ធមានឈ្មោះ ម៉ម ស្រី អាយុ៣១ឆ្នាំ មុខរបរចុងភៅ ដូចគ្នាស្នាក់នៅជាមួយគ្នា។

តាមប្រភពព័ត៌មានពីនារីរងគ្រោះបានឲ្យដឹងថា កាលពីថ្ងៃម្សិលមិញដោយបុរសជាប្តីបានរករឿង នៅក្នុងផ្ទះបានយកខោអាវដុតម្តង ហើយក៏រូបនាងបានមកដាក់ពាក្យបណ្តឹងនៅប៉ុស្តិ៍ពងទឹក ដើម្បីយកទៅអប់រំ តែដោយសមត្ថកិច្ច។ ស្រាប់តែដល់ថ្ងៃកើតហេតុ បុរសនោះបានធ្វើសកម្មភាពវាយបំផ្លាញក្នុងផ្ទះទៀត វាយម៉ូតូហើយបានយកប្រេងកាតមកចាក់ស្រោចខ្លួន រួចរត់ចូលបន្ទប់បម្រុងនឹងដុតខ្លួនឯង តែក្រុមគ្រួសាររាយការណ៍ដល់សម្ថតកិច្ច ជួយអន្តរាគមន៍ទាន់ពេល ក៏យកមកប៉ុស្តិ៍តែម្តង។

នារីជាប្រពន្ធបានបន្តទៀតថា ប្តីរបស់គាត់កាលពីកន្លែងបុរីសន្តិភាព២ មិនទាន់កាត់ឲ្យដង្កោ គឺប្តីគាត់ធ្លាប់ខាងប៉ូលិសខណ្ឌពោធិ៍សែនជ័យយកទៅអប់រំជាច្រើនដងហើយឥឡូវមកខាងដង្កោវិញឲ្យប៉ូលិសដង្កោចាត់ការតាមច្បាប់ ព្រោះខ្លាចមានរឿងធំទៅថ្ងៃមុខទៀត។

ដោយឡែកបុរសជាប្តីបានប្រាប់ឲ្យដឹងវិញថា មូលហេតុដែលខ្លួនធ្វើបែបនេះដោយសារតែខឹងនឹងប្រពន្ធ ដោយចេះតែពីដើរលេង និយាយមិនស្តាប់ ទើបខ្លួនធ្វើបែបនេះតែម្តង។

បច្ចុប្បន្នបុរសដែលបំផ្លាញទ្រព្យសម្បត្តិក្នុងផ្ទះ និងប្រើហិង្សារក្នុងគ្រួសារ និងចាក់ប្រេងកាតបម្រុងដុតខ្លួនឯង ត្រូវបានសមត្ថកិច្ចខណ្ឌដង្កោ យកទៅសាកសួរនៅអធិកាដ្ឋានខណ្ឌដង្កោ និងកសាងសំណុំរឿងបញ្ជូនខ្លួនទៅកាន់តុលាការ ចាត់ការតាមផ្លូវច្បាប់៕