Post News Media ព័ត៌មានជាតិ ម៉ូតូ២គ្រឿងប្...

ម៉ូតូ២គ្រឿងប្រលះគ្នាពេញទំហឹង ម្នាក់ស្លាប់នៅនឹងកន្លែងនិងម្នាក់ទៀតរបួសធ្ងន់

ចែកចាយបន្ត

ភ្នំពេញ: បុរស២នាក់ ជិះម៉ូតូ២គ្រឿងបុកគ្នាក្នុងទិសដៅបញ្ច្រាស់ គ្នាបណ្ដាលឲ្យបុរសម្នាក់ស្លាប់ភ្លាមៗនៅនិងកន្លែង និងបុរសម្នាក់ទៀតរងរបួសធ្ងន់។ ហេតុការណ៍គ្រោះថ្នាក់ចរាចរណ៍ខាងលើបានកើតឡើងកាលពីវេលាម៉ោង៩និង២០នាទីយប់ ថ្ងៃទី២៨ ខែមីនា ឆ្នាំ២០១៧ តាមបណ្ដោយផ្លូវបេតុង មុខវត្តសំបួរមាស ទៅផ្លូវទួលពង្រ ចំងាយប្រហែល២គីឡូម៉ែត្រ ដែលស្ថិតក្នុងភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ ។

សពជនរងគ្រោះមានឈ្មោះ លី យ៉ាងអ៊ីវ ភេទប្រុស អាយុ៣០ឆ្នាំ មុខរបរជាអ្នទិញឬលក់អេតចាយ មានស្រុកកំណើតនៅស្រុកពាមជរ ខេត្តព្រៃវែង។ចំណែកជនរងគ្រោះរបួសធ្ងន់មិនបានស្គាល់អត្តសញ្ញាណនោះទេ។

យោងតាមប្រភពព័ត៌មានពីប្រជាពលរដ្ឋដែលជាកម្មករសំណង់ស្នាក់នៅក្បែរកន្លែងកើតហេតុបានឲ្យដឹងថា មុនពេលកើតហេតុ ពួកគាត់បានលឺសម្លេងប្រាវលឺលាន់ជាខ្លាំង បន្ទាប់មកពួកគាត់ក៏បាននាំគ្នាចេញមកក្រៅមើល ក៏បានឃើញបុរសម្នាក់បោកក្បាលនិងថ្នល់ស្លាប់ភ្លាមៗនៅនិងកន្លែង ហើយមានម្នាក់ទៀតបានដេកដួលលើថ្នល់រងរបួសធ្ងន់។

ក្រោយមកប្រជាពលរដ្ឋដែលនៅកន្លែងកើតហេតុ បានទំនាក់ទំនងទៅរថយន្តសង្គ្រោះបន្ទាន់មកដឹកយកជនរងគ្រោះដែលរបួសធ្ងន់ជួយសង្គ្រោះភ្លាមៗ និងបានទំនាក់ទំនងទៅសមត្ថកិច្ចមូលដ្ឋានខណ្ឌដង្កោឲ្យចុះមកពិនិត្យដល់កន្លែងកើតហេតុ។

តាមប្រភពដដែលបានបន្តទៀតថា នៅក្នុងហេតុការណ៍គ្រោះថ្នាក់ចរាចរណ៍ខាងលើ គឺមានម៉ូតូចំនួន២គ្រឿងដេកដួលនៅនិងកន្លែងកើតហេតុ ដោយ១គ្រឿងម៉ាកស្មាក់រេវ៉ូ ពណ៌ខ្មៅ ពាក់ស្លាកលេខភ្នំពេញ 1AC-2630 និង១គ្រឿងទៀតម៉ាកហង់ដាឌ្រីម ស៊េរី២០០៧ ពណ៌ខ្មៅ ពាក់ស្លាកលេខ កណ្ដាល 1 I -0004 ហើយមិនដឹងដែរថា១គ្រឿងណាមកពីទិសខាងណាទេ និងជិះដោយម្នាក់ណាដែលស្លាប់ម្នាក់ណាដែលរងរបួសធ្ងន់នោះទេ ពីព្រោះនៅតាមបណ្ដោយផ្លូវបេតុងកើតហេតុ មានភាពងងឹតសូន្យឈឹងមើលអីមិនឃើញនោះទេ ហើយសូម្បីតែសមត្ថកិច្ចមូលដ្ឋានដែលចុះដល់កន្លែងកើតហេតុ ក៏មិនហ៊ានសន្ដិដ្ឋានថា ខាងណាខុស ខាងណាត្រូវនោះដែរ គឺមានត្រឹមតែធ្វើការវាស់វែងម៉ូតូទាំង២គ្រឿងឲ្យបានត្រឹមត្រូវ យកទៅរក្សាទុកនៅអធិការដ្ឋាននគរបាលខណ្ឌដង្កោ និងរងចាំសាកសួរជនរងគ្រោះដែលរបួសធ្ងន់រកខុសត្រូវតែប៉ុណ្ណោះ ដើម្បីដោះស្រាយតាមក្រោយ ។

ក្រោយពេលកើតហេតុ សមត្ថកិច្ចមូលដ្ឋានបានប្រគល់សពជនរងគ្រោះឲ្យទៅរថយន្តដឹកសព យកទៅដម្កល់នៅវត្តទឹកថ្លា ខណ្ឌសែនសុខ រងចាំសាច់ញាត្តិមកទទួលយកទៅស្រុកកំណើតធ្វើបុណ្យតាមប្រពៃណី៕

ចែកចាយបន្ត