Post News Media ព័ត៌មានជាតិ តុលាការខេត្តប...

តុលាការខេត្តបន្ទាយមានជ័យ សម្រេចឃុំខ្លួន ក្រឡាបញ្ជីរបស់ខ្លួនឈ្មោះ ហង្ស សាមឿន

ចែកចាយបន្ត

ភ្នំពេញ: ភ្នាក់ងារPost Newsបានឲ្យដឹងថា ក្រោយពីអង្គភាពប្រឆាំងអំពើពុករលួយឃាត់ខ្លួនកាលពីថ្ងៃទី២៦ ខែមីនា ឆ្នាំ២០១៧ កន្លងទៅនោះ លោក ហង្ស សាមឿន ក្រឡាបញ្ជីសាលាដំបូងខេត្តបន្ទាយមានជ័យត្រូវបាន តុលាការដែលខ្លួនធ្វើការងារនោះសម្រេចឃុំខ្លួនហើយ ។

យោងតាមការបញ្ជាក់របស់លោក មាស ច័ន្ទពិសិដ្ឋ ព្រះរាជអាជ្ញាខេត្តបន្ទាយមានជ័យបានឲ្យដឹងថា កាលពីរសៀលថ្ងៃទី២៨ ខែមីនា ឆ្នាំ២០១៧ ម្សិលមិញលោក ញឹម ពិសាល ចៅក្រមស៊ើបសួរសាលាដំបូងខេត្តបន្ទាយមានជ័យបានសម្រេចឃុំខ្លួនលើឈ្មោះ ហង្ស សាមឿន ជាបណ្ដោះអាសន្ននៅពន្ធនាគារ ។

លោក មាស ច័ន្ទពិសិដ្ឋ បានបញ្ជាក់ថា លោក សេង គីមឡាក់ ជាតំណាងអយ្យការបានសម្រេចចោទប្រកាន់ឈ្មោះ ហង្ស សាមឿន ពីបទ វីតិក្រម យោងតាមមាត្រា ៥៩២ និងមាត្រា ៥៩៣ នៃក្រមព្រហ្មទណ្ឌ និង មាត្រា ៣២ នៃច្បាប់ស្តីប្រឆាំងអំពើពុករលួយ ។

បើយោងតាម សេចក្តីជូនដំណឹងរបស់ អង្គភាពប្រឆាំងអំពើពុករលួយ បានបញ្ជាក់នថា លោក ហង្ស សាមឿន បានយកអំណាចមុខងារ ភារកិច្ចរបស់ខ្លួនដែលច្បាប់ប្រគល់ឲ្យធ្វើការ គាបសង្កត់ ទារប្រាក់ ពីជនរងគ្រោះ ដោយគ្មានការខ្លាចញញើតអ្វីទាំងអស់ ។ នៅពេលជនរងគ្រោះដែលមានសាលក្រមស្ថាពរហើយ ហើយត្រូវមកសុំលិខិតបញ្ជាក់សាលក្រមស្ថាពរ និងរូបមន្តអនុវត្ត ក្នុងនាមជាក្រឡាបញ្ជីកាន់សំណុំរឿង ហង្ស សាមឿន ធ្វើទុក្ខបុកម្នេញ អូសពេលវេលាឲ្យរង់ចាំនេះ រង់ចាំនោះ និងទារប្រាក់ជាថ្នូរ ទើបបំពេញភារកិច្ចរបស់ខ្លួន ។ គ្រាន់តែថ្លៃចុះផ្សាយព័ត៌មានកាសែត ហង្ស សាមឿន ទារមួយទំព័រ៧០ដុល្លារអាមេរិក សរុបប៉ុន្មានទំព័រត្រូវផ្តល់ឲ្យ១០០០ដុល្លារអាមេរិក ។ បំណងរបស់ ហង្ស សាមឿន ក៏តម្រូវឲ្យអ្នករងគ្រោះបង់ប្រាក់ ឲ្យខ្លួនដល់ ៤ម៉ឺនដុល្លារអាមេរិក ឬ ២ម៉ឺនដុល្លារអាមេរិក បូក និងកាត់ដីមួយដុំក៏បាន ឬទាមទាររថយន្តម៉ាស្តារមួយគ្រឿងក៏បាន ៕

ចែកចាយបន្ត