Post News Media ព័ត៌មានជាតិ ដៃរហ័សខាងឆក់!...

ដៃរហ័សខាងឆក់! ឆក់ខ្សែកគេបានសម្រេចគេចមិនផុតខ្នោះទាំង២នាក់

ចែកចាយបន្ត

ភ្នំពេញ: ជនសង្ស័យចំនួន២នាក់ ត្រូវប្រជាពលរដ្ឋស្វាគមន៍ម្នាក់មួយដៃ មួយជើងក្រោយពីធ្វើសកម្មភាពឆក់ខ្សែកពីនារីម្នាក់បានសម្រេចហើយព្យាយាមរត់គេចខ្លួន ។

ហេតុការណ៍នេះបានកើតឡើងកាលពីវេលាម៉ោង ៦និង៣០នាទីល្ងាច ថ្ងៃទី៣១ ខែមីនា ឆ្នាំ២០១៧ ស្ថិតនៅខាងមុខសាលាអន្តរជាតិ អន្តរទ្វីបអាមេរិកកាំង ផ្លូវលេខ៥២៨ ក្នុងសង្កាត់បឹងកក់១ ខណ្ឌទួលគោក រាជធានីភ្នំពេញ។

ជនសង្ស័យដែលឃាត់ខ្លួនបានខាងលើនេះ ទី១មានឈ្មោះ សួន រ៉ាស៊ី ភេទប្រុស អាយុ២៧ឆ្នាំ មុខរបរជាងដែក ស្នាក់នៅសង្កាត់បឹងទំពុន ខណ្ឌមានជ័យ រាជធានីភ្នំពេញ និងអ្នកធ្វើសកម្មភាពឆក់ខ្សែកម្នាក់ទៀតមានឈ្មោះ ហាំ ចាន់រតនា ភេទប្រុស អាយុ៣០ឆ្នាំ មុខរបរជាងដែក ស្នាក់នៅភូមិទួលគោក សង្កាត់ទួលសង្កែ ខណ្ឌឫស្សីកែវ។ ក្នុងនោះដែរសមត្ថកិច្ចដកហូតបានម៉ូតូស្មាស់វី ពណ៌ក្រហម ស្លាកលេខ ភ្នំពេញ 1BI-5004 ចំនួន១គ្រឿងដែលជនសង្ស័យជិះធ្វើសកម្មភាព ។

ដោយឡែកនារីរងគ្រោះមានឈ្មោះ ព្រាប ឈុំដាវសុគន្ធ ភេទស្រី អាយុ១៩ឆ្នាំ មុខរបរជានិស្សិតពេទ្យឆ្នាំទី១ នៃសាកលវិទ្យាល័យភូមិន្ទភ្នំពេញ ស្នាក់នៅភូមិសាមគ្គី សង្កាត់ឫស្សីកែវ ខណ្ឌឫស្សីកែវ ។

តាមសម្តីនារីរងគ្រោះ បានរៀបរាប់ឲ្យដឹងថា មុនពេលកើតហេតុ នាងបានធ្វើដំណើរពីផ្ទះ ទៅរៀននៅសាកលវិទ្យាល័យភូមិន្ទភ្នំពេញ ដោយជិះម៉ូតូមួយគ្រឿងម៉ាកស្កុបពីមីនី ពណ៌ខៀវ ពាក់ស្លាកលេខ ភ្នំពេញ 1CE-3874 លុះបានមកដល់ចំណុចកើតហេតុ ស្រាប់តែត្រូវជនសង្ស័យចំនួន២នាក់ ជិះម៉ូតូស្មាស់វី ពណ៌ក្រហម ស្លាកលេខ ភ្នំពេញ 1BI-5004 ស្របទិសគ្នាពីជើងទៅត្បូងតាមផ្លូវ៥២៨បានធ្វើសកម្មភាពឆក់ខ្សែកផ្លាកទីមានបណ្តោង បានសម្រេចហើយបត់ម៉ូតូត្រឡប់ក្រោយដើម្បីជិះគេចខ្លួន រហូតដល់ចំណុចផ្លូវបី ស្ថាប័ននៅក្នុងសង្កាត់ទួលសង្កែ ខណ្ឌឫស្សីកែវ ត្រូវបានប្រជាពលរដ្ឋនិងសមត្ថកិច្ចប្រចាំគោលដៅ ចាប់ឃាត់ខ្លួនបានតែម្តង ។

ប្រភពបានបន្តទៀតថា ពេលជនសង្ស័យជិះត្រឡប់ក្រោយ នារីរងគ្រោះខំជិះម៉ូតូតាមពីក្រោយនិងស្រែកឲ្យប្រជាពលរដ្ឋជួយចាប់ថា ចោរឆក់ខ្សែកៗ រហូតដល់ឆ្លងផ្លូវ២៧៣ ចូលទៅទឹកដីខណ្ឌឫស្សីកែវ ទើបត្រូវឃាត់ខ្លួនបានទាំងខ្សែកផ្លាកទីនវិញតែបាត់បណ្តោង ។

បច្ចុប្បន្នជនសង្ស័យទាំង២នាក់ត្រូវបានកម្លាំងនគរបាលឃុំខ្លួនបណ្តោះអាសន្ននៅអធិការដ្ឋាននរគបាលខណ្ឌទួលគោក ដើម្បីកសាងសំណុំរឿងចាត់ការតាមនីតិវិធីច្បាប់៕

ចែកចាយបន្ត