Post News Media ព័ត៌មានជាតិ យុវតីម្នាក់ ដ...

យុវតីម្នាក់ ដេកផ្កាប់មុខស្លាប់ សង្ស័យករណីឃាតកម្ម

ចែកចាយបន្ត

ភ្នំពេញ: យុវតីម្នាក់ ស្លាប់ដោយមានក្រម៉ាចងរឹតខ្ទប់មាត់នឹងច្រមុះ សង្ស័យជាអំពើឃាតកម្ម បង្កការភ្ញាក់ផ្អើល ។

ហេតុការណ៍នេះបានកើតឡើងកាលពីវេលាម៉ោង៦និង២០នាទី យប់ថ្ងៃទី២៥ ខែមេសា ឆ្នាំ២០១៧ នៅចំណុចរោងស្នាក់នៅ ផ្លូវទន្លេសាប ក្រុមទី៦ ភូមិដើមគ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។

សមត្ថកិច្ចបានឲ្យដឹងថា ជនរងគ្រោះមានឈ្មោះ ម៉ាន ស្រីមុំ ភេទស្រី អាយុ១៦ឆ្នាំ មុខរបរសិស្ស ស្នាក់នៅបណ្តោះអាសន្នក្នុងរោងស្នាក់នៅ (ក្រោលគោ) ផ្លូវទន្លេសាប ក្រុមទី៦ ភូមិដើមគ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។

សម្ភារ:បាត់បង់មាន ទូរសព្ទIPhone 5​ ១គ្រឿង និងកងដៃប្លាទីន មួយចំនួន។

ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ នៅវេលាម៉ោង៧យប់ ថ្ងៃខែឆ្នាំដដែល ឈ្មោះទូ ល័សម៉ាន ត្រូវជាឪពុក និងម្តាយឈ្មោះ មីត បានចេញទៅលក់សាច់គោ ដោយឲ្យជនរងគ្រោះនៅចាំរោងសម្រាក​ក្នុងក្រោល ទម្លាក់សត្វគោតែម្នាក់ឯង ដោយជនរងគ្រោះជាប់រវល់រៀនសូត្រផង លុះដល់ម៉ោង១២ ថ្ងៃត្រង់ ឪពុកជនរងគ្រោះបានហៅទូរសព្ទមកប្រាប់ថា ចាំយកលុយចំនួន១៩០០,០០០រៀល ឲ្យឈ្មោះ យឿន ថ្លៃគោ រួចក៏បិទទូរសព្ទវិញ។ រហូតដល់ម៉ោងដល់ម៉ោង៥ល្ងាច ម្តាយជនរងគ្រោះបានហៅទូរសព្ទមកជនរងគ្រោះជាច្រើនលើក តែមិនចូល ហើយដោយមានការសង្ស័យ ម្តាយជនរងគ្រោះក៏បានបបួលប្តីត្រឡប់មករោងសម្រាកវិញ លុះមកដល់រោងសម្រាក ឃើញក្នុងរោងសម្រាកងងឹតមិនបើកភ្លើង ក៏មានការសង្ស័យ ឪពុកជនរងគ្រោះបានឡើងទៅលើរោងសម្រាក ក៏ឃើញជនរងគ្រោះដេកផ្កាប់មុខនឹងពូក ក្នុងសម្លៀកបំពាក់ធម្មតា ឃើញបែបនេះឪពុកជនរងគ្រោះក៏បានផ្ងារជនរងគ្រោះហើយស្រាយក្រម៉ារុំមាត់ចេញ ក៏មានឈាមហូរចេញពីមាត់ និងមានស្នាមរយះលើផ្ទៃមុខ ប៉ន្តែជនរងគ្រោះបានស្លាប់បាត់ទៅហើយ។

ក្រោយពីកើតហេតុ សមត្ថកិច្ចបានចុះទៅដល់កន្លែងកើតហេតុ ធ្វើការពិនិត្យ និងក្រុមគ្រូពេទ្យបច្ចេកទេស កោសល្យវិច័យរាជធានីភ្នំពេញ បានឲ្យដឹងថា ករណីនេះជាឃាតកម្ម (ក្រម៉ាចងរឹតខ្ទប់មាត់ និងច្រមុះ) មានស្នាមជាំថ្ងាស់លើចិញ្ចើមឆ្វេង,បបូរមាត់លើក្រោមកន្តួលក្រហម បណ្តាលឲ្យស្លាប់ដោយថប់ដង្ហើមប្រាកដមែន។

បច្ចុប្បន្ន​ សមត្ថកិច្ចកំពុងធ្វើការស្រាវជ្រាវរកជនល្មើសមកផ្តន្ទាទោស។ ចំណែកសាកសព ត្រូវបានសមត្ថកិច្ចប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕