Post News Media ព័ត៌មានជាតិ ឃាត់ខ្លួនជនសង...

ឃាត់ខ្លួនជនសង្ស័យម្នាក់ ក្រោយធ្វើសកម្មភាពលួចយកម៉ូតូមិត្តខ្លួនឯងទៅបញ្ចាំ

ចែកចាយបន្ត

កណ្តាល: ភ្នាក់ងារPost News បានរាយការណ៍មកថា មានករណី ជនសង្ស័យម្នាក់ ត្រូវបានសមត្ថកិច្ចឃាត់ខ្លួន ក្រោយធ្វើសកម្មភាពលួចម៉ូតូបានសម្រេច។
ការចាប់ឃាត់ខ្លួននេះបានធ្វើឡើងកាលពីវេលាម៉ោង១២យប់ ថ្ងៃទី២៥ ខែមេសា ឆ្នាំ២០១៧ នៅចំណុច ភូមិព្រែកខ្សេវ ឃុំរកាខ្ពស់ ស្រុកស្អាង ខេត្តកណ្តាល។

សមត្ថកិច្ចបានឲ្យដឹងថា ជនរងគ្រោះមានឈ្មោះ សន ចាន់ថា ភេទប្រុស អាយុ២៨ឆ្នាំ មុខរបរកសិករ មានទីលំនៅភូមិព្រែកខ្សេវ ឃុំរកាខ្ពស់ស្រុក ស្អាង ខេត្តកណ្តាល ។ ចំណែកជនសង្ស័យឈ្មោះ អុល កៀន ភេទប្រុសអាយុ២៦ឆ្នាំ មុខរបរមិនពិតប្រាកដ ទីលំនៅភូមិព្រែកខ្សេវ ឃុំរកាខ្ពស់ ស្រុកស្អាង ខេត្ត កណ្តាល។

ប្រភពដដែលបន្តថា មុនពេលកើតហេតុ ជនសង្ស័យបានផឹកស្រាជាមួយមិត្តភក្តិ៥នាក់ ចាប់ពីម៉ោង៥ល្ងាច រហូតដល់ម៉ោងប្រហែល១២យប់ ទើបឈប់ហើយបានដើរទៅយកម៉ូតូរបស់ជនរងគ្រោះ ដែលបានទុកនៅក្រោមផ្ទះ រួចជិះចេញមកដល់ក្លោងទ្វារមុខសាលារៀនព្រែកខ្សេវ ទើបមានឈ្មោះផុន ថា ប្រទះឃើញជនសង្ស័យ បានជិះយ៉ាងលឿនទៅបាត់តែម្តង ។ ហើយម្ចាស់ម៉ូតូបានមកដាក់ពាក្យបណ្តឹងនៅប៉ុស្តិ៍ លុះព្រឹកឡើងម៉ោង១០ព្រឹកថ្ងៃទី២៦ ខែមេសា ឆ្នាំ២០១៧ ជនសង្ស័យខាងលើបានជិះម៉ូតូឌុបពីភ្នំពេញមកវិញ សមត្ថកិច្ចបានធ្វើការឃាត់សួរនាំ ក្រោយធ្វើការសាកសួរ ជនសង្ស័យបានសារភាព ខ្លួនពិតជាបានលួចយកម៉ូតូរបស់ជនរងគ្រោះ ពីក្រោមផ្ទះពិតមែនកាលពីវេលាម៉ោងប្រហែល១២យប់មែន ហើយបានជិះយកទៅបញ្ចាំនៅឃ្លាំងរំសេវវេលាម៉ោង១យប់ ក្នុងតម្លៃ៤០ដុល្លារ រួចហើយបានយកប្រាក់មកលេងល្បែងនៅហាងស្លាកយីហោឈ្មោះ ណែតរហូតទល់ភ្លឺ។

បច្ចុប្បន្ន ជនសង្ស័យ ត្រូវបានសមត្ថកិច្ចឃុំខ្លួនជាបណ្តោះអាសន្ន ដើម្បីសាកសួរ និងកសាងសំណុំរឿង ដើម្បីបន្តចាត់ការតាមនីតិវិធីច្បាប់៕

ចែកចាយបន្ត