Post News Media ព័ត៌មានជាតិ លទ្ធផលដេញវាយគ...

លទ្ធផលដេញវាយគ្នាតាមដងផ្លូវយ៉ាងអាណាធិបតេយ្យ ចុងក្រោយស្លាប់នារីក្នុងថ្លុកឈាម និងបុរសម្នាក់ទៀតរបួសធ្ងន់!

ចែកចាយបន្ត

ភ្នំពេញ: ក្មេងស្ទាវមួយក្រុមបានជិះម៉ូតូដេញវាយ យុវជនប្រុសស្រី២នាក់ នៅតាមផ្លូវបណ្ដាលឲ្យស្រីស្លាប់ ប្រុសរបួសធ្ងន់ ហើយក្រុមជនសង្ស័យបានជិះម៉ូតូគេចខ្លួនបាត់ស្រមោលអស់។

ហេតុការណ៍នេះបានកើតឡើងកាលពីវេលាម៉ោង២និង២០នាទីយប់ រំលងអាធ្រាត្រឈានចូលថ្ងៃទី២៧ ខែមេសា ឆ្នាំ២០១៧ នៅតាមបណ្ដាយផ្លូវសហព័ន្ធរុស្ស៊ី សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។

សមត្ថកិច្ចបានឲ្យដឹងថា នារីដែលស្លាប់មានឈ្មោះ ជា ស្រីនិច អាយុ២១ឆ្នាំ មុខរបរជាកម្មកររោងចក្រ ស្នាក់នៅភូមិទឹកថ្លា សង្កាត់ក្រាំងពង្រ ខណ្ឌដង្កោ មានស្រុកកំណើតក្នុងខេត្តព្រៃវែង ។ ចំណែកយុវជនដែលរងរបួសធ្ងន់នៅមិនស្គាល់អត្តសញ្ញាណនោះទេ ភ្លាមៗត្រូវបានរថយន្តសាមុយដឹកយកទៅសង្គ្រោះនៅមន្ទីពេទ្យឯកជន។

ប្រភពព័ត៌មានពីកន្លែងកើតហេតុបានឲ្យដឹងថា យុវជនប្រុសស្រីរងគ្រោះ២នាក់ខាងលើ បានជិះម៉ូតូម៉ាកឡែត ពណ៌ស ពាក់ស្លាកលេខ ភ្នំពេញ1FE-7479 បានឌុបគ្នាមកពីដើរលេងបំណងទៅផ្ទះវិញ ដោយធ្វើដំណើរតាមបណ្ដោយផ្លូវសហព័ន្ធរុស្ស៊ី ក្នុងទិសដៅពីកើតទៅលិច ដោយមិនដឹងមានទំនាស់អ្វីជាមួយក្រុមក្មេងស្ទាវទាំងនោះទេ បានជាក្រុមមានក្មេងស្ទាវមួយក្រុមជិះម៉ូតូដេញវាយ ធ្វើឲ្យជនរងគ្រោះភ័យស្លន់ស្លោជិះលឿន ជ្រុលចង្កូតទៅបុករបាំងថ្មចែកទ្រូងផ្លូវ បណ្ដាលឲ្យនារីរងគ្រោះបោកក្បាលនិងបង្គោលភ្លើងស្លាប់។ ចំណែកយុវជនម្នាក់ទៀតបានរងរបួសធ្ងន់ ត្រូវបានរថយន្តសាមុយដឹកយកទៅសង្គ្រោះនៅមន្ទីពេទ្យឯកជនតែម្ដង។

ក្រោយពេលកើតហេតុសមត្ថកិច្ចមូលដ្ឋានបានចុះមកដល់និងបានទំនាក់ទំនងទៅសាច់ញាតិជនរងគ្រោះឲ្យមកកន្លែងកើតហេតុនិងចាត់ចែងឲ្យដឹកសពយកទៅស្រុកកំណើតធ្វើបុណ្យតាមប្រពៃណី។ ដោយឡែកម៉ូតូរងគ្រោះត្រូវបានសមត្ថកិច្ចចរាចរណ៍នៅអធិការដ្ឋាននគរបាលខណ្ឌពោធិ៍សែនជ័យចុះមកធ្វើការវាស់វែងយកទៅរក្សាទុក រង់ចាំសាច់ញាតិយកឯកសារមកទទួលយកទៅវិញ៕