Post News Media ព័ត៌មានជាតិ សំណុំរឿងហិង្ស...

សំណុំរឿងហិង្សាមានស្ថានទម្ងន់ទោស មន្ត្រីអ្នកប្រព្រឹត្តគេចខ្លួន មកវន្ត័កអ្នកមិនដឹងខ្លួន ត្រូវបានតុលាការហៅសាកសួរ

ចែកចាយបន្ត

កណ្ដាល: មន្ត្រីនគរបាលស្រុកស្អាងចំនួន៤រូបថ្នាក់អធិការ អធិការរងនិង នាយផ្នែកបានចូលទៅបំភ្លឺចំពោះមុខលោកចៅក្រមស៊ើបសួរពាក់ពន្ធ័សំណុំរឿងហិង្សាមានស្ថានទម្ងន់ បណ្តាលឲ្យមនុស្សស្លាប់ម្នាក់ និងម្នាក់ទៀតរងរបួស កាលពីថ្ងៃទី២២ ខែតុលា ឆ្នាំ២០១៦ នៅចំណុចមុខវត្តធនមុន ភូមិស្វាយតានី ឃុំព្រែកគយ ស្រុកស្អាង ខណ:អ្នកដែលប្រព្រឹត្តនាំគ្នាគេចខ្លួនបាត់ តែមកវន្ត័កអ្នកមិនដឹងខ្លួន។

តាមប្រភពព័ត៌មានពីមន្ត្រីនគរបាលខេត្តកណ្ដាលបានឲ្យដឹងថា មន្ត្រីនគរបាលស្រុកស្អាង៤រូបចូលមកបំភ្លឺចំពោះមុខលោកចៅក្រមនៅថ្ងៃទី២៦-២៧ ខែមេសា ឆ្នាំ២០១៧ មានលោកវរសេនីយ៍ឯក សេង សុជាតិ អធិការ លោក លន ចន្ថា អធិការរងទទួលបន្ទុកនគរបាលយុត្តិធម៍ លោក នៅ ប៊ុណ្ណា នាយផ្នែកព្រហ្មទណ្ឌ និងមន្ត្រីព្រហ្មទណ្ឌមួយរូបទៀត។

ពាក់ពន្ធ័រឿងរ៉ាវនេះដែរភ្នាក់ងារPost News ព្យាយាមទំនាក់ទំនងទៅលោក សូ សារិន ប្រធានលេខាធិការដ្ឋាន និងជាអ្នកនាំពាក្យសាលាដំបូងខេត្តកណ្តាល តាមប្រព័ន្ធTelegram ដែរតែលោកមិនឃើញឆ្លើយតបសោះ(Post News នឹងរង់ចាំការបំភ្លឺ) ។

បើតាមលោក សម្ញំ ឬទ្ធីវាសនា ព្រះរាជអាជ្ញាររង និងជាអ្នកនាំពាក្យរបស់ស្ថាបន័អយ្យការសាលាដំបូងខេត្តកណ្តាលបានប្រាប់ Post News តាមប្រព័ន្ធWhatapp ថា សំណុំរឿងនេះខ្ញុំបានបញ្ជូនទៅចៅក្រមស៊ើបសួរយូរហើយ។

សូមបញ្ជាក់ថា កាលពីខែមីនាឆ្នាំ២០១៧ នគរបាលស្រុកស្អាង ៣នាក់ ម្នាក់ជាអធិការរង និង២នាក់ ជានាយ នាយរងផ្នែកត្រូវបាន ដកតួនាទី និងត្រូវបណ្ដេញចេញ ពីក្របខ័ណ្ឌនគរបាលជាតិ ។

ការបណ្ដេញចេញនេះ គឺត្រូវបានគេដឹងថា បន្ទាប់ពីនគរបាលទាំង៣នាក់បាន ប្រព្រឹត្តខុស នាំគ្នាវាយ សួរចម្លើយ ទៅលើ បុរសម្នាក់បណ្ដាលឲ្យស្លាប់ និងម្នាក់ទៀត រងរបួសធ្ងន់ ហើយរត់គេចខ្លួនមិនទទួលខុសត្រូវ ចំពោះមុខច្បាប់ និងមិនចូលបំរើការងារច្រើនខែ។ សេចក្តីប្រកាស របស់ក្រសួងមហាផ្ទៃ ចុះហត្ថលេខាដោយ ឧបនាយយករដ្ដមន្ត្រី ស ខេង បានចេញប្រកាសបណ្ដេញចេញឲ្យផុតពីក្របខ័ណនគរបាលជាតិ និងត្រូវបានអនុវត្តវិន័យមន្ត្រីនគរបាលស្រុកស្អាង ដោយរូបភាពដកហូតឋានន្តរសក្ដិនិងបណ្ដេញចេញឲ្យផុតពីក្របខ័ណនគរបាលជាតិ។ ទី១លោកវរ:សេនីយ៍ទោ ភក្ដី វិទូ អត្តលេខ៥៤៤៤៣ អធិការរងស្រុកស្អាងទទួលបន្ទុកផែនអន្តោប្រវេសន៍ ទី២ ឆៃ ស៊ីណា អត្តលេខ៥៥៣៣០ នាយរងផ្នែកអន្តោប្រវេស និងទី៣ លោកអនុសេនីយ៍ទោ ឃាង សុងថេង អត្តលេខ៥៨២៨២ ។

គួររម្លឹកថា កាលពីថ្ងៃទី២២តុលាឆ្នាំ២០១៦ នៅផ្លូវចូលវត្តធនមន្ន ស្ថិតភូមិស្វាយតានី ឃុំព្រែកគយ ស្រុកស្អាង ខេត្តកណ្តាល។ លោក ឆៃ ស៊ីណា នាយរងផ្នែកអន្តោប្រវេសន៍ បានចោទប្រកាន់ ជនរងគ្រោះឈ្មោះ ចំរើន សីហា ភេទប្រុសអាយុ ជាង២០ ឆ្នាំ មុខរបរ ជាងសំណង់ និង ឈ្មោះទិត្យ លាភ ភេទប្រុសអាយុ ជាង២០ឆ្នាំ ដូចគ្នា មានទីលំនៅ ភូមិភូមិតានង់ ឃុំក្រាំងអំពិល ស្រុកសំរោងទង ខេត្តកំពង់ស្ពឺ ថា បានបើក មូតូ វ៉ា និងកៀរម៉ូតូ ខ្លួន ក្នុងបំណងរកប្លន់ខ្លួន។ ពេលនោះឈ្មោះឆៃ ស៊ីណា បានស្ទាក់ម៉ូតូជនរងគ្រោះទាំង២ឲ្យឈប់និងបានដកកាំភ្លើង ភ្ជង់ ឲ្យអ្នកទាំង២នៅឲ្យស្ងៀម ហើយឈ្មោះ ឆៃ ស៊ីណា បានហៅទូរសព្ទ ហៅឈ្មោះ ភក្តី វិទូ និងឈ្មោះ ឃាង សុងថេង ជានគរបាលស្រុកស្អាងដែរ ឲ្យមកជួយចាប់អ្នកទាំង២។ ពេលមកដល់ក៏មានប្រជាជន នៅទីនោះបាន វាយ លើជនរងគ្រោះខ្លះដែរ។

ពេលចាប់បញ្ជូនអ្នកទាំង២នាក់ មកដល់អធិការដ្ឋានស្រុក នគរបាលទាំង៣នាក់ខាងលើ បាននាំគ្នាវាយ សួរចម្លើយជនរងគ្រោះទាំង២នាក់ ដោយចោទប្រកាន់ថាជាចោរ តែជនរងគ្រោះមិនឆ្លើយសារភាពដូចការចោទប្រកាន់នគរបាលទាំង៣នាក់ខាងលើ បានវាយដំជនរងគ្រោះរហូតដល់របួសធ្ងន់ តែជនរងគ្រោះឈ្មោះចំរើន សីហាបាន រងរបួសធ្ងន់ជាង។ បន្ទាប់មក នគរបាលស្រុកស្អាងបានបញ្ជូនអ្នកទាំង២ទៅព្យាបាលនៅពេទ្យ បង្អែកស្រុកស្អាង ។ ដោយស្ថានភាពរបួសធ្ងន់ពេក ជនរងគ្រោះទាំង២នាក់ ត្រូវបានគេបញ្ជូនមកពេទ្យជ័យជំនះ ក្រុងតាខ្មៅ ពេលមកដល់ជនរងគ្រោះឈ្មោះចំរើន សីហា បានស្លាប់។ ចំណែក ឈ្មោះទិត្យ លាភ រងរបួសធ្ងន់តែព្យាបាលបានធូរស្រាល។ ក្រោយពីដឹងដំណឹងថា ជនរងគ្រោះឈ្មោះចំរើន សីហា បានស្លាប់ នគរបាលទាំង៣នាក់ខាងលើ បានគេចខ្លួនបាត់តែម្ដង។

បន្ទាប់មក សមត្ថកិច្ចនគរបាលខេត្តបានកសាងសំណុំរឿង បញ្ជូនទៅតុលាការ និងរាយការណ៍ តាមលំដាប់ថ្នាក់ ។ ចាប់តាំងពីកើតហេតុនោះមក នគរបាលទាំង៣នាក់ខាងលើ បានគេចខ្លួនមិនចូលមកបំរើការងារទេ ក្រោយមក ក៏ត្រូវបានក្រសួងមហាផ្ទៃ សម្រេចដកតួនាទីនិងបណ្ដេញចេញនគរបាលទាំង៣នាក់ខាងលើ ពីក្រមខ័ណ នគរបាលជាតិ។ ហើយសំណុំរឿងនេះ ក៏កំពុងស្ថិតនៅក្នុងចំណាត់ការរបស់តុលាការផងដែរ៕

ចែកចាយបន្ត