Post News Media ព័ត៌មានជាតិ Update៖ ឆេះផ្...

Update៖ ឆេះផ្ទះមួយខ្នងនៅខណ្ឌដង្កោ លេបត្របាក់ជីវិតកូនប្រុសស្រី២នាក់និងបុរសជាឪពុករបួសធ្ងន់

ចែកចាយបន្ត

ភ្នំពេញ: ពិតជាគួរឲ្យរន្ធត់ណាស់ បន្ទាប់ពីមានក្មេងប្រុសស្រី២នាក់ ត្រូវបានអគ្គិភ័យឆេះស្លាប់ ក្នុងអណ្តាតភ្លើង សល់តែគ្រោងឆ្អឹងគួរឲ្យសង្វែគ ចំណែកបុរសជាឪពុករងរបួសធ្ងន់ ខណ:ដែលរូបគាត់បានព្យាយាមចូលទៅជួយកូនទាំង២នាក់ ក្នុងហេតុការណ៍អគ្គិភ័យនោះ។

សោកនាដកម្មនេះបានកើតឡើងទាំងកណ្តាលអធា្រត្រ ឈានចូលថ្ងៃទី២៨ ខែមេសា ឆ្នាំ២០១៧ ស្ថិតនៅក្នុងភូមិជើងឯក សង្កាត់ជើងឯក ខណ្ឌដង្កោ រាជធានីភ្នំពេញ។

មន្ត្រីអាវុធហត្ថខណ្ឌដង្កោបានដែលចុះទៅដល់ទីតាំងឆេះខាងលើ បានប្រាប់Post Newsថា ម្ចាស់ផ្ទះកើតហេតុខាងលើនេះ មានឈ្មោះ ស្រិញ ស៊ន អាយុ៥១ឆ្នាំ ត្រូវជាឪពុក និងម្តាយឈ្មោះ យ៉ែម រ៉េត អាយុ៤២ឆ្នាំ ពុំមានរងរបួសនោះទេ។ ចំណែកកូនទាំង២នាក់ដែលស្លាប់ ទី១ ឈ្មោះ យ៉ែម រមណី ភេទស្រី អាយុ១៨ឆ្នាំ មុខរបរសិស្ស (ស្លាប់ក្នុងភ្នក់ភ្លើង) និងកូនប្រុសទី២ឈ្មោះ យ៉ែម វណ្ណ អាយុ១៧ឆ្នាំ មុខរបរ កម្មកររោងចក្រ (ស្លាប់ក្នុងភ្នក់ភ្លើង ដូចគ្នា) អ្នកទាំង៤នាក់ ស្នាក់នៅក្នុងភូមិឃុំកើតហេតុខាងលើ។

ក្នុងនោះដែរ អគ្គិភ័យបានបំផ្លាញផ្ទះដែលមានទំហំ ៤,៥០ ម៉ែត្រ គុណនឹង ៥,៥០ម៉ែត្រ សង់អំពីឈើលើថ្មក្រោម អស់ទាំងស្រុង និងម៉ូតូចំនួន១គ្រឿង កង់ចំនួន២គ្រឿង រួមនឹងទ្រព្យសម្បត្តិមួយចំនួនធំបន្ថែមទៀត។

តាមការឲ្យដឹងពីអ្នកមីងឈ្មោះ នៅ កុសល្យ អាយុ៥០ឆ្នាំ បានរៀបរាប់ឲ្យដឹងពីអគ្គិភ័យនេះថា គាត់ក្រោកមកបត់ជើង ពេលនោះគាត់ក៏ឃើញអណ្តាតភ្លើងឆេះក្នុងបន្ទប់ជាន់ខាងលើ។ ក្រោយមកទៀតម្ចាស់ផ្ទះទាំង២នាក់ប្តីប្រពន្ធខាងលើ ក៏រត់ចេញមកក្រៅ ស្រែកឲ្យអ្នកជិតខាងជួយ ទើបគាត់រត់ទៅយកទុយោទឹកមកបាញ់ពន្លត់ ពេលនោះភ្លើងឆេះកាន់តែខ្លាំងដោយពុំអាចជួយសង្រ្គោះបាន ទើបធ្វើឲ្យឆេះផ្ទះទាំងស្រុង និងបណ្តាលឲ្យស្លាប់កូនប្រុសស្រីទាំង២របស់គាត់ បែបនេះគួរឲ្យអាសូរណាស់។

ចំពោះមូលហេតុ ដែលផ្តើមឲ្យមានអគ្គិភ័យឆាបឆេះនេះ យើងនៅមិនទាន់ដឹងនៅឡើយនោះទេ ព្រោះរង់ចាំការស្រាវជ្រាវពីសំណាក់សមត្ថកិច្ចជំនាញជាមុនសិន។ ចំណែកសាកសពកូនប្រុសស្រីទាំង២នាក់ខាងលើ ត្រូវបានសមត្ថកិចច្ចប្រគល់ទៅឲ្យសាច់ញាតិ យកទៅធ្វើបុណ្យតាមប្រពៃណី៕