Post News Media ព័ត៌មានជាតិ អ្នករត់តាក់ស៊...

អ្នករត់តាក់ស៊ីម្នាក់ ត្រូវចោរភ្ជង់នឹងកាំភ្លើងប្លន់រថយន្តតាំងពីខណ្ឌដង្កោរួច រហូតដល់ខេត្តកណ្តាលទើបឃាត់រថយន្តបាន

ចែកចាយបន្ត

ភ្នំពេញ: ជនសង្ស័យ២នាក់ ធ្វើសកម្មភាពហៅអ្នករត់ឡានតាក់ស៊ីជិះ រួចឈ្លៀតឱកាស ធ្វើសកម្មភាពដកអាវុធមកភ្ជង់ រួចចាប់ចងស្លាប់សេក និងរុញជនរងគ្រោះជាម្ចាស់រថយន្តចេញពីក្នុងរថយន្ត ហើយព្យាយាមបើកគេចតាំងពីក្នុងភូមិសាស្ត្រ ខណ្ឌដង្កោ រហូតចូលដល់ក្នុងទឹកដីខេត្តកណ្តាល ដោយមានកម្លាំងការិយាល័យព្រហ្មទណ្ឌកម្រិតស្រាល សហការជាមួយនគរបាលខណ្ឌដង្កោ ដេញតាមពីក្រោយ ធ្វើឲ្យជនសង្ស័យភ័យក៏បើករថយន្តបុកដើមឈើ ទៅមុខលែងរួចតែម្តង។

ករណីប្លន់រថយន្តខាងលើនេះ បានកើតឡើងកាលពីវេលាម៉ោង ១០យប់ ថ្ងៃទី២៨ ខែមេសា ឆ្នាំ២០១៧ ស្ថិតនៅចំណុចខាងមុខវត្តប្រធាតុ ក្នុងភូមិកណ្តាល សង្កាត់រលួស ខណ្ឌដង្កោ រាជធានីភ្នំពេញ។

ប្រភពព័ត៌មានពីសមត្ថកិច្ចនៃការិយាល័យព្រហ្មទណ្ឌកម្រិតសា្រល បានឲ្យដឹងថា មុនពេលកើតហេតុ កាលពីវេលាម៉ោង៨យប់ ថ្ងៃកើតហេតុ ជនសង្ស័យមានគ្នា២នាក់ អាយុប្រហែល៣០ឆ្នាំ បានហៅរថយន្តតាក់ស៊ីម៉ាកហាយឡែនឌ័រ ពណ៌ស ស្លាកលេខ ភ្នំពេញ 2AM-0924 ជិះពីកោះពេជ្រមកក្រុមហ៊ុនផលិតស្រាបៀរកម្ពុជា ក្នុងខណ្ឌដង្កោ លុះបានមកដល់ចំណុចកើតហេតុ ខាងមុខក្រុមហ៊ុនស្រាបៀរកម្ពុជា ជនសង្ស័យម្នាក់ បានដកកាំភ្លើងខ្លី១ដើម មិនស្គាល់ម៉ាក ភ្ជង់និងវាយទៅលើជនរងគ្រោះ នឹងស្នាប់កាំភ្លើង ត្រូវចំថ្ងាសខាងឆ្វេង រួចទាញជនរងគ្រោះមកខាងក្រោយឲ្យក្រាបចុះក្រោម ភ្លាមៗនោះបក្ខពួកជនសង្ស័យម្នាក់ទៀត បានចូលបើករថយន្ត រហូតដល់ចំណុចទឹកស្អាត ផ្លូវជាតិលេខ២ ក្នុងស្រុកកណ្តាលស្ទឹង ខេត្តកណ្តាល ជនសង្ស័យបានដោះអាវចងស្លាបសេក និងចងជើងជនរងគ្រោះ ហើយទម្លាក់ជនរងគ្រោះនៅទីនោះ ។ បន្ទាប់មកជនសង្ស័យបានបើករថយន្តគេចខ្លួន តាមផ្លូវជាតិលេខ២ បកចូលភ្នំពេញ តែត្រូវកម្លាំងសមត្ថកិច្ចកងម៉ូតូប្រដេញ របស់ការិយាល័យព្រហ្មទណ្ឌកម្រិតស្រាលរាជធានីភ្នំពេញ សហការជាមួយសមត្ថកិច្ចខណ្ឌដង្កោ បានប្រដេញរហូតមកដល់ចំណុចវត្តប្រធាតុ ជនសង្ស័យបានបើករថយន្តទៅបុកនឹងដើមឈើទៅមុខលែងរួច បន្ទាប់មកជនសង្ស័យបានព្យាយាមបើកទ្វារថយន្តហើយរត់គេចចូលក្នុងព្រៃតែម្តង។

ក្នុងនោះដែរសមត្ថកិច្ចបានធ្វើការដកហូត យកមករក្សាទុកបណ្តោះអាសន្ននៅការិយាល័យព្រហ្មទណ្ឌកម្រិតស្រាល ដើម្បីកសាងសំណុំរឿងបន្តចាត់ការតាមនីតិវិធីច្បាប់៕