Post News Media ព័ត៌មានជាតិ បុរសជនជាតិចិន...

បុរសជនជាតិចិនម្នាក់ ត្រូវស៊ុកកញ្ចក់រលំសង្កត់លើ បណ្តាលឲ្យស្លាប់

ចែកចាយបន្ត

បាត់ដំបង: លោកអធិការក្រុងបាត់ដំបង បានប្រាប់ Post News ថា មានបុរសជនជាតិចិនម្នាក់គ្រោះថ្នាក់អំឡុងពេលបំពេញការងារ បណ្តាលឲ្យស្លាប់ពេលបញ្ជូនទៅមន្ទីរពេទ្យ។

ហេតុការណ៍នេះបានកើតឡើងកាលពីវេលាម៉ោង៩យប់ ថ្ងៃទី៣០ ខែមេសា ឆ្នាំ២០១៧ នៅចំណុចក្នុងក្រុមហ៊ុនវាងកាងចិន ស្ថិតក្នុងភូមិអូរត្រែង ឃុំផ្លូវមាស ស្រុករតនមណ្ឌល ខេត្តបាត់ដំបង។

លោកអធិការបានបន្តថា ជនរងគ្រោះមានឈ្មោះ ហ្វា ជិនស៊ីន ភេទប្រុស អាយុ៣០ឆ្នាំ រស់នៅខេត្ត ហ៊ួណាន ប្រទេសចិន កាន់លិខិតឆ្លងដែនលេខ E88498 810 ត្រូវបានស៊ុកញ្ចក់ទម្ងន់ ២២២៣០គីឡូ រលំសង្កត់លើ នៅពេលលើកចេញផ្ទេរចេញពីរថយន្ត កុងទឺន័រ។ ជនរងគ្រោះត្រូវបានដឹកបញ្ជូនមកដល់មន្ទីរពេទ្យបង្អែកខេត្តត្រូវដាច់ខ្យល់ស្លាប់។

ក្រោយពីកើតហេតុ ផ្នែកជំនាញ នៃអធិការដ្ឋាននគរបាលក្រុង សហការជាមួយការិយាល័យជំនាញ នៃស្នងការដ្ឋាននគរបាលខេត្តបាត់ដំបង លោក ព្រះរាជអាជ្ញា និងគ្រូពេទ្យ បានចុះពិនិត្យធ្វើកោសល្យវិច័យលើសាកសព លទ្ធផលបញ្ជាក់ថា សាកសពពិតជាស្លាប់ដោយ សារមានវត្ថុរឹងរលំសង្កត់ពីលើ បណ្តាលឲ្យសពបាក់ជើងទាំង២ ស្នាមជាំដាច់រលត់លើទ្រូងសពពិតប្រាកដមែន។ ចំណែកសាកសព ត្រូវបានសមត្ថកិច្ចប្រគល់ទៅឲ្យក្រុមគ្រួសារយកទៅរាជធានីភ្នំពេញ៕