Post News Media ព័ត៌មានជាតិ Update៖ រយ:ពេ...

Update៖ រយ:ពេល៣ម៉ោងសមត្ថកិច្ចកម្ពុជាឃាត់ខ្លួនជនជាតិនីហ្សេរីយ៉ាបានជាង៥០នាក់

ចែកចាយបន្ត

ភ្នំពេញ: កម្លាំងនគរបាលនាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោវេសន៍ក្រសួងមហាផ្ទៃ បើកប្រតិបត្តិការ ចុះត្រួតពិនិត្យនិងឆែកឆេរការស្នាក់នៅ និងការប្រកបការងារ របស់ជនបរទេស នៅចំណុច២ទីតាំងផ្សេងគ្នា ក្នុងខណ្ឌចំការមន និងខណ្ឌមានជ័យ ឃាត់ខ្លួនបានបុរសជនជាតិស្បែកខ្មៅសរុបទាំងអស់ចំនួន៥៣នាក់ យកមកធ្វើការសាកសួរ។
ប្រតិបត្តិការនេះ បានធ្វើឡើងតាំងពីវេលាម៉ោង៣ សៀល រហូតដល់វេលាម៉ោង៥ល្ងាច ថ្ងៃទី៣ ខែឧសភា ឆ្នាំ២០១៧ ។

សមត្ថកិច្ចដែលចូលរួមក្នុងការបង្ក្រាបខាងលើ បានឲ្យដឹងថា ប្រតិបត្តិការនេះដែរមានការសម្របសម្រួល ដោយលោក សៀង សុខ ព្រះរាជអាជ្ញារង អមសាលាដំបូងរាជធានីភ្នំពេញ ដឹកនាំកម្លាំងដោយ លោក ឧត្តមសេនីយ៍ទោ អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ សហការជាមួយនិងនគរបាលគ្រប់គ្រងជនបរទេស នៃស្នងការដ្ឋាននគរបាលរាជធានីភ្នំពេញ នគរបាលប៉ុស្តិ៍ផ្សារដើមថ្កូវ និងនគរបាលខណ្ឌចំការមន ប៉ុស្តិ៍បឹងទំពុន និងនគរបាលខណ្ឌមានជ័យផងដែរ។

សមត្ថកិច្ចបានឲ្យដឹងថា ក្នុងការចុះត្រួតពិនិត្យខាងលើនេះដែរ សមត្ថកិច្ចបានធ្វើការត្រួតពិនិត្យនិងឆែកឆេរនៅចំណុច២ទីតាំងផ្សេងគ្នា ដោយទីតាំងទី១ ស្ថិតនៅក្នុងភូមិគ្រឹះមហាលាភ ផ្លូវ៤៣០ ក្នុងភូមិ១ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។ ជាលទ្ធផល សមត្ថកិច្ចឃាត់ខ្លួនបានជនជាតិនីហ្សេរីយ៉ាចំនួន១៨នាក់ ដែលបានឆ្លងដែនមកស្នាក់នៅនិងប្រកបការងារខុសច្បាប់ក្នុងប្រទេសកម្ពុជា ។ ខណ:ដែលសមត្ថកិច្ចកំពុងបំពេញប្រតិបត្តិការ ស្រាប់តែមានជនជាតិនីហ្សេរីយ៉ាចំនួន៤នាក់ បានផ្លោះរបងភូមិគ្រឹះមហាលាភខាងលើរត់គេចខ្លួន ហើយត្រូវសមត្ថកិច្ចដេញតាមរហូតមកដល់ចំណុចទីតាំងទី២ ស្ថិតនៅចំណុចផ្ទះល្វែង ផ្លូវ៣៥បេតេ ក្នុងភូមិក្បាលទំនប់៣ សង្កាត់បឹងទំពុន ខណ្ឌមានជ័យ ក៏រកឃើញទីតាំងស្នាក់នៅរបស់ជនជាតិខាងលើបន្ថែមទៀតតែម្តង ដោយក្នុងនោះសមត្ថកិច្ចបានបន្តឆែកឆេរនិងត្រួតពិនិត្យរកឃើញជនជាតិនីហ្សេរីយ៉ា ខុសច្បាប់ចំនួន៣៥នាក់ បន្ថែមទៀត ។ សរុបទាំងអស់ជនជាតិនីហ្សេរីយ៉ា ដែលឃាត់បានទាំង២ទីតាំងមានចំនួន៥៣នាក់ សុទ្ធតែជាមនុស្សប្រុសទាំងអស់។

ដូច្នេះហើយចំពោះជនជាតិនីហ្សេរីយ៉ា សរុបទាំង២ទីតាំងមានចំនួន៥៣នាក់ខាងលើ ត្រូវបានសមត្ថកិច្ចបញ្ជូនខ្លួនតាមរថយន្ត មកកាន់ អគ្គនាយកដ្ឋានអន្តោប្រវេសន៍ក្រសួងមហាផ្ទៃ ដើម្បីកសាងសំណុំរឿងចាត់ការតាមនីតិវិធីច្បាប់របស់ប្រទេសកម្ពុជាបន្តទៀត៕

ចែកចាយបន្ត