Post News Media ព័ត៌មានជាតិ ចន្លោះប្រហោងម...

ចន្លោះប្រហោងមន្ត្រីជំនាញព្រំដែន ឲ្យនាំជ្រូកចូលពីវៀតណាម និងលួចផ្លាស់ប្តូរស្លាកលេខរថយន្ត ត្រូវអ្នកចិញ្ចឹមជ្រូកក្នុងស្រុកចាប់ឃាត់ជ្រូកដើម្បីត្រួតពិនិត្យ រកលិខិតស្នាម

ចែកចាយបន្ត

កណ្តាល: អ្នកចិញ្ចឹមជ្រូកក្នុងស្រុកនិយាយថា ការនាំចូលជ្រូកនាំឲ្យអ្នកចិញ្ចឹមក្នុងស្រុកខាតបង់ ប៉ុន្តែអ្នកនាំចូលលើកឡើងថា បើមិននាំចូលមិនអាចផ្គត់ផ្គង់ទីផ្សារគ្រប់គ្រាន់ ហើយសាច់ជ្រូកនឹងឡើងថ្លៃ ធ្វើឲ្យប៉ះពាល់ដល់អ្នកទទួលទាន។

កម្លាំងអគ្គនាយដ្ឋានសុខភាពសត្វនិងផលិតកម្មសត្វសហការជាមួយសមាគមន៍អ្នកចិញ្ចឹមសត្វ ឃាត់រថយន្តដឹកជ្រូកឆ្លងដែនចូលកម្ពុជាមិនគោរពច្បាប់ ដើម្បីត្រួតពិនិត្យ បន្ទាប់ពីទទួលព័ត៌មានថា មានរថយន្តដឹកជ្រូក៤គ្រឿងដឹកជ្រូករស់ចូល ចូលមកកាន់ទីផ្សារក្នុងប្រទេសកម្ពុជា ដោយមិនគោរពច្បាប់កម្លាំងនៃអគ្គនាយកដ្ឋានសុខភាពសត្វនិងផលិតកម្មសត្វសហការជាមួយសមាគមន៍ អ្នកចិញ្ចឹមសត្វនៅកម្ពុជា និងពេទ្យសត្វខេត្តកណ្តាល តាមឃាត់បានដោយរថយន្ត៣គ្រឿងឃាត់បាននៅតាមបណ្តោយផ្លូវជាតិលេខ១ និងរថយន្តមួយចំនួនទៀតឃាត់នៅផ្លូវជាតិលេខ២ ដោយរថយន្តឃាត់នៅផ្លូវជាតិលេខ២ ប្រគល់ទៅឲ្យជំនាញពេទ្យសត្វតាកែវ។

ការចុះឃាត់រថយន្តដឹកសត្វជ្រូកទាំង៤គ្រឿងនេះធ្វើឡើងកាលពីរសៀលថ្ងៃទី៣ខែឧសភា ឆ្នាំ២០១៧ ក្នុងស្រុកកៀនស្វាយ និងស្រុកបាទី ខេត្តតាកែវ ជាប់ព្រំប្រទល់ ខេត្តកណ្តាល។

លោក ញឹប សាវ៉ាត ជាប្រជាកសិករចិញ្ចឹមសត្វជ្រូករស់នៅក្នុងភូមិកំពង់ស្វាយ ឃុំកំពង់ស្វាយ ស្រុកកៀនស្វាយ ខេត្តកណ្តាល បាននិយាយថា តម្លៃជ្រូកក្នុងស្រុកបច្ចុប្បន្ននេះ មានការធ្លាក់ចុះយ៉ាងគំហុកធ្វើឲ្យពួកគាត់ជាអ្នកចិញ្ចឹមជ្រូក នៅក្នុងស្រុកមានការខាតបង់ប្រាក់ក្នុង១ឆ្នាំរាប់សិបម៉ឺនដុល្លារ នេះគ្រាន់តែលោកជាម្ចាស់កសិដ្ឋានតូចតាចមួយផង ចុះទម្រាំកសិដ្ឋានធំមួយចំនួនទៀតតើវាខាតបង់យ៉ាងណាដែរ ។

លោកបានបន្តថា ដោយសារតែតម្លៃជ្រូករស់មានតម្លៃទាបបែបនេះ ទើបនាំគ្នាបង្កើតជាសមាគមន៍អ្នកចិញ្ចឹមសត្វនៅកម្ពុជា ដើម្បីផ្តល់ព័ត៌មានដល់ជំនាញពាក់ព័ន្ធនានា ឲ្យជួយទប់ស្កាត់ការនាំសត្វជ្រូកចូលនេះ ប្រសិនបើមិនជួយទប់ស្កាត់ការនាំជ្រូកចូលនេះ អ្នកដែលខាតបង់គឺប្រជាពលរដ្ឋខ្មែរយើង។

បើតាមលោក អុល ដូរិន ប្រធានពេទ្យសត្វខេត្តកណ្តាលបានប្រាប់ថា ការឃាត់រថយន្តដឹកសត្វជ្រូកនាពេលនេះគឺយើងឃាត់ដើម្បីត្រួតពិនិត្យមើលមានឯកសារដឹកជញ្ជូនសត្វឆ្លងដែនឬមិនមានតែប៉ុណ្ណោះ។ ប៉ុន្តែពេលរថយន្តដែលឃាត់បាននោះ គឺពិនិត្យឃើញថា ការដឹកជញ្ជូនគឺមានឯកសារត្រឹមត្រូវទៅតាមការកំណត់។ ប៉ុន្តែអ្វីដែលខុសនោះគឺរថយន្តខុសស្លាកលេខក្នុងលិខិតអនុញ្ញាតរថយន្តដឹកជញ្ជូនពាក់ស្លាកលេខក្រចេះ3A-0205តែស្លាកលេខនៅជាប់និងរថយន្តគឺតាកែវ3A-2275 ចំណែក១គ្រឿងទៀត គឺដោះស្លាកលេខចេញទុកក្នុងឡាន គឺភ្នំពេញ3A-8909 ដែលមានម្ចាស់ក្រុមហ៊ុនគឺលោក ជឹម សុខ ជាម្ចាសក្រុមហ៊ុនអង្គសុខរិទ្ធមានជ័យ ចំណែករថយន្តមួយចំនួនទៀត គឺគេមានឯកសារត្រឹមត្រូវទៅតាមការកំណត់។ លោកបានបន្ថែមថា រថយន្តរបស់ក្រុមហ៊ុនលោក ជឹម សុខ គឺយើងមិនបានពិន័យអ្វីនោះទេគឺគ្រាន់ហៅអ្នកបើកបររថយន្តធ្វើកិច្ចសន្យាឲ្យឈប់ដោះស្លាកលេខចេញ ចំណែកក្រុមហ៊ុនត្រូវត្រៀមរថយន្តក្នុង១ជើងត្រូវមានរថយន្ត២គ្រឿងព្រោះខ្លាចពេលត្រូវការដឹកចេញស្រាប់តែរថយន្តខូចជៀសវាងដោះស្លាកដូរចុះដូរឡើងដូចពេលអីចឹង។ ទាក់ទិននិងការផ្លាស់ប្តូររថយន្តនេះលោក ជឹម សុខ ប្រធានក្រុមហ៊ុនបានប្រាប់អ្នកយកព័ត៌មានថា ការដឹកជញ្ជូនជ្រូកពីប្រទេសវៀតណាមចូលមកកាន់ប្រទេសកម្ពុជានេះ គឺលោកមានលិខិតអនុញ្ញាតពីក្រសួងកសិកម្មរុក្ខាប្រម៉ាញ់និងនេសាទ ត្រឹមត្រូវដោយដឹកជញ្ជូនចូល២៥០ក្បាលក្នុង១ថ្ងៃ ហើយចំពោះសមត្ថកិច្ចឃាត់រថយន្តលោកនោះគឺពាក់ព័ន្ធនឹងស្លាកលេខរថយន្តមិនត្រូវជាមួយនិងឯកសារដឹកជញ្ជូន ។ លោកបានបញ្ជាក់បន្ថែមថា ការនាំជ្រូករស់ចូលមកកាន់ក្នុងស្រុកនេះ គឺលោកមានលិខិតឌីអិលឌី ចេញដោយបសុពេទ្យវៀតណាមត្រឹមត្រូវ លោកមិននាំជ្រូកមានជំងឺចូលមកក្នុងស្រុកបង្កឲ្យប៉ះពាល់សុខភាពប្រជាពលរដ្ឋនោះទេ។ លោក ឆាយ សុខហួរ ប្រធានអ្នកសត្វនៅកម្ពុជា បាននិយាយថា ការដែលលោកខិតខំសហការជាមួយជំនាញនានា គឺលោកចង់ជម្រុញឲ្យមានការចិញ្ចឹមសត្វក្នុងស្រុក កាត់បន្ថយការនាំចូលពីប្រទេសជិតខាង ដើម្បីកំណើនសេដ្ឋកិច្ចក្នុងស្រុកនិងសុខភាពពលរដ្ឋក្នុងស្រុកផងដែរ។
បន្ទាប់មកនៅម៉ោងប្រមាណ១០យប់ថ្ងៃទី០៥ ខែឧសភា ឆ្នាំ២០១៧នេះ មានប្រជាពលរដ្ឋជាង១០០នាក់ ដែលជាកសិករចឹញ្ចឹមជ្រូកមកពីឃុំនានា ក្នុងស្រុកកៀនស្វាយ ខេត្តកណ្តាល នាំគ្នាឡោមព័ទ្ធរថយន្ត ដឹកជ្រូកមួយគ្រឿង ផ្ទុកជ្រូកជាង១០០ក្បាល ដើម្បីសំណូមពរឲ្យរាជរដ្ឋាភិបាល និងភាគីពាក់ព័ន្ធ ចូលទប់ស្កាត់ការនាំចូល ជ្រូកខុសច្បាប់ពីវៀតណាម មកកម្ពុជា។

ប្រជាពលរដ្ឋបានឲ្យដឹងទៀតថា ការសំណូមពរនេះ ព្រោះតែការហូរចូលនៃជ្រូកវៀតណាមខុសច្បាប់ បានធ្វើឲ្យការចឹញ្ចឹមជ្រូកនៅកម្ពុជាធ្លាក់ចុះ ដោយសារមិនអាច ប្រកួតប្រជែងនឹងជ្រូកនាំចូលបាន។

ប្រជាពលរដ្ឋបានបន្ថែមថា នៅព្រឹកថ្ងៃទី០៥ ខែឧសភានេះ រថយន្តដឹកជ្រូកខាងលើ ត្រូវបានមន្ត្រីអគ្គនាយកដ្ឋានសុខភាពសត្វ និងផលិតកម្មសត្វ សហការជាមួយសមាគមអ្នកចិញ្ចឹមជ្រូកកម្ពុជា និងពេទ្យសត្វខេត្តកណ្តាល ឃាត់បាននៅចំណុចឃុំដីឥដ្ឋ ស្រុកកៀនស្វាយ ខេត្តកណ្តាល ដើម្បីពិនិត្យខ្លាចក្រែងសត្វជ្រូកទាំងនោះជម្ងឺ ក្រោយពិនិត្យរួចរកឃើញថា ការដឹកជញ្ជូនជ្រូកនេះ មានឯកសារមិនត្រឹមត្រូវឡើយ ក៏ឃាត់ទុកនឹងមានការបាញ់ទឹកឲ្យជ្រូក ខ្លាចងាប់។ ប៉ុន្តែនៅម៉ោងប្រមាណជា១០យប់ថ្ងៃទី០៥ ខែឧសភានេះ ស្រាប់តែមានប្រជាពលរដ្ឋ ស្រុកកៀនស្វាយ មកឡោមព័ទ្ធ និងសំណូមពរឲ្យជួយទប់ស្កាត់ការនាំចូលជ្រូកពីវៀតណាម៕