Post News Media ព័ត៌មានជាតិ លួចទូរសព្ទគេហ...

លួចទូរសព្ទគេហើយទៅពួនក្នុងបន្ទប់ទឹក ម្ចាស់គេរកឃើញចាប់ប្រគល់ឲ្យសមត្ថកិច្ច

ចែកចាយបន្ត

ភ្នំពេញ: យុវជនសង្ស័យម្នាក់ បានធ្វើសកម្មភាពលួចទូរសព្ទចំនួន២គ្រឿង ហើយទៅសម្ងំពួនក្នុងបន្ទប់ទឹក ហើយត្រូវម្ចាស់ទូរសព្ទរកឃើញចាប់ប្រគល់ឲ្យសមត្ថកិច្ចចោមចៅតែម្តង។

ហេតុការណ៍ភ្ញាក់ផ្អើលខាងលើនេះបានកើតឡើងពីវេលាម៉ោង១១និង៤០នាទី យប់ថ្ងៃទី៧ ខែឧសភា ឆ្នាំ២០១៧ ស្ថិតនៅផ្ទះបន្ទប់ជួល ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

ជនសង្ស័យខាងលើមានឈ្មោះ ធី ខ្មៅ អាយុ១៧ឆ្នាំ មុខរបរមិនពិតប្រាកដស្នាក់នៅមិនពិតប្រាកដ។ ចំណែកជនរងគ្រោះមានឈ្មោះ នូ ហិនចាន់ សុវណ្ណរាជ អាយុ១៧ឆ្នាំ មុខរបរជាងភ្លើង ស្នាក់នៅបន្ទប់ជួលភូមិកើតហេតុខាងលើ។

ប្រភពព័ត៌មានពីសមត្ថកិច្ចបានឲ្យដឹងថា មុនពេលកើតហេតុ ជនរងគ្រោះនិងមិត្តភក្តិ៣ទៅ៤នាក់ ផ្សេងទៀតបានដេកលេងនៅក្នុងបន្ទប់ដោយមិនបានបិតទ្វារទេ ហើយក៏ដេកលក់មួយភាំងក៏ភ្ញាក់មកវិញ ហើយរកទូរសព្ទមិនឃើញ ទើបដាស់គ្នាឲ្យភ្ញាក់ជួយរក លុះរកមិនឃើញអើតមើលក្នុងបន្ទប់ទឹក ស្រាប់តែឃើញជនសង្ស័យក្នុងបន្ទប់ទឹក ហើយក៏ឆែកមើលក្នុងហោប៉ៅជនសង្ស័យឃើញទូរសព្ទ២គ្រឿង ហើយក៏ចាប់ប្រគល់ឲ្យសមត្ថកិច្ចតែម្តង។
ក្រោយពេលកើតហេតុសមត្ថកិច្ចប៉ុស្តិ៍ចោមចៅបានសាកសួនិងបញ្ជូនទៅផ្នែកជំនាញដើម្បីចាត់ការបន្ត។

បច្ចុប្បន្នជនសង្ស័យត្រូវបានឃុំខ្លួនបណ្តោះអាសន្ននៅផ្នែកព្រហ្មទណ្ឌខណ្ឌពោធិ៍សែនជ័យដើម្បីចាត់ការតាមនីតិវិធី៕