Post News Media ព័ត៌មានជាតិ រន្ធត់! ម៉ូតូ...

រន្ធត់! ម៉ូតូស៊ីរ៉ុសបត់ឆ្វេង ត្រូវស៊ាំយ៉ុងមកពីមុខបុកពេញទំហឹង ស្លាប់ម្នាក់និងរបួសធ្ងន់៣នាក់

ចែកចាយបន្ត

ពោធិ៍សាត់: លោកឯម រុន អធិការនគរបាលស្រុកក្រគរ បានប្រាប់ Post Newsថា មានករណីគ្រោះថ្នាក់ចរាចរណ៍មួយ បង្កឡើងដោយរថយន្តម៉ាកស៊ាំយ៉ុង មួយគ្រឿង បើកបរខ្វះការប្រុងប្រយត្ន័ បានជ្រុលទៅបុកម៉ូតូម៉ាក ស៊ីរ៉ុស មួយគ្រឿងពេញទំហឹងលាន់ដូចរន្ទះ បណ្តាលឲ្យមនុស្សចំនួន៣នាក់ រងរបួសធ្ងន់ និងម្នាក់ស្លាប់បាត់បង់ជីវិត។

ហេតុការណ៍នេះបានកើតឡើងកាលពីវេលាម៉ោង ១១និង៣០នាទី ព្រឹកថ្ងៃទី១៤ ខែឧសភា ឆ្នាំ២០១៧ ស្ថិតនៅចំណុចផ្លូវជាតិលេខ៥ ចន្លោះគីឡូម៉ែត្រលេខ ១៣៨-១៣៩ ក្នុងភូមិអារ៉ងព្រួច ឃុំអន្សាចំបក់ ស្រុកក្រគរ ខេត្តពោធិ៍សាត់។

សមត្ថកិច្ចបានឲ្យដឹងថា គ្រោះថ្នាក់ចរាចរណ៍នេះ បង្កឡើងដោយរថយន្ត ម៉ាកស៊ាំយ៉ុង ពាក់ស្លាកលេខ ភ្នំពេញ2N-2498 ពណ៌ស បើកបរក្នុងទិសដៅពីលិចទៅកើត លុះដល់ចំណុចកើតហេតុ ក៏បានបុកជាមួយនឹងម៉ូតូម៉ាកស៊ីរ៉ុស គ្មានស្លាកលេខ ពណ៌ខ្មៅ កំពុងជិះក្នុងទិសដៅពីកើតទៅលិចច្រាស់ទិសគ្នាពេញទំហឹង លាន់ដូចរន្ទះ បណ្តាលឲ្យមនុស្ស៤នាក់ ទី១ឈ្មោះ ហ៊ុល វាសន អាយុ១៨ឆ្នាំ ភេទប្រុស ស្នាក់នៅភូមិថ្កោលធំ ឃុំអន្សាចំបក់ ស្រុកក្រគរ ខេត្តពោធិ៍សាត់ ជាអ្នកបើកបរម៉ូតូ របួសធ្ងន់, ទី២ឈ្មោះ ឈឹម ចាន់អេង អាយុ២២ ឆ្នាំ ភេទប្រុស របួសធ្ងន់, ទី៣ឈ្មោះ ឈឹម ចាន់ហុង អាយុ២០ឆ្នាំ ភេទប្រុស ស្លាប់បាត់បង់ជីវិត និងជនរងគ្រោះទី៤ឈ្មោះ គា កុយ អាយុ២០ឆ្នាំ ភេទប្រុស របួសធ្ងន់។ ទាំង៣នាក់ ស្នាក់នៅភូមិពន្លៃ ឃុំពន្លៃ ស្រុកបរិបូរណ៍ ខេត្តកំពង់ឆ្នាំង។ ជនរងគ្រោះដែលរងរបួសធ្ងន់ទាំង៣នាក់ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកខេត្តពោធិ៍សាត់។

ក្រោយកើតហេតុ សមត្ថកិច្ចធ្វើការវាស់វែងនាំយកម៉ូតូនិងរថយន្ត យកទៅរក្សាទុក ដើម្បីរង់ចាំធ្វើការដោះស្រាយគ្នាពេលក្រោយតាមផ្លូវច្បាប់។ ចំណែកសាកសពជនរងគ្រោះត្រូវបានសមត្ថកិច្ចធ្វើកំណត់ហេតុ ប្រគល់ទៅឲ្យក្រុមគ្រួសារធ្វើបុណ្យតាមប្រពៃណី៕